កោះកុង៖ មន្រ្តីជាន់ខ្ពស់នៃក្រសួងសេដ្ឋកិច្ច ជំរុញដល់រដ្ឋបាលខេត្ត ក្រុងស្រុក ឃុំសង្កាត់ មន្ទីរអង្គភាព​ជុំវិញខេត្ត ​គប្បីធ្វើយ៉ាងណាអនុវត្តការចុះបញ្ជីដីរដ្ឋនេះឱ្យ​បានចប់​ជា​ស្ថាពរត្រឹម​ដំណាច់​ឆ្នាំ២០២៣ខាងមុខ ​ដើម្បីងាយស្រួលគ្រប់គ្រងប្រកប​ដោយប្រសិទ្ធភាព ​ចៀសវាង​បាត់បង់គ្មាន​ហេតុផលច្បាស់លាស់ ​តាមរយៈឃុបឃិតគ្នាដែលប្រឈមនឹងទោសទណ្ឌ។

ថ្លែងនៅរសៀលថ្ងៃទី២៨ ខែ វិច្ឆិកា លោក ម៉ាក់ ចាន់ដារ៉ា ​ប្រធាននាយកដ្ឋាននៃក្រសួងសេដ្ឋកិច្ច​ និងហិរញ្ញវត្ថុ បាន​បង្ហាញ​ពី​ទិន្នន័យ​បឋម​ថា ដីរដ្ឋប្រមាណ ១៤៨ទីតាំង​នៅក្នុងខេត្ត​កោះកុង បាន​ចុះបញ្ជីធ្វើ​ប័ណ្ណ​សម្គាល់​កម្មសិទ្ធិ​រួចរាល់​ហើយ​ ប៉ុន្តែមាន២៤៤ទីតាំង​ផ្សេងទៀត​មិនទាន់​អនុវត្តចុះបញ្ជីនោះទេ។

លោក ម៉ាក់ ចាន់ដារ៉ា ក៏ណែនាំដល់រដ្ឋបាលខេត្ត ​ក្រុងស្រុកឃុំសង្កាត់ មន្ទីរ និង​អង្គភាពពាក់ព័ន្ធ ពន្លឿន​ការស្រង់​ទិន្នន័យ​សារពើ​ភណ្ឌរបស់ខ្លួនឲ្យបានច្បាស់លាស់​ រួចស្នើ​សុំចុះ​បញ្ជីដីរដ្ឋ​ចំពោះ​ទីតាំង​ណាមិនមានវិវាទ​កម្មរវាង​រដ្ឋនិងរដ្ឋ​ ឬវិស័យឯកជន។ ​ហើយបុគ្គលតំណាងអង្គភាព​សាមីចាំ​បាច់​ចូលរួម​សហការ ​ជាមួយក្រុមការងារអន្តរក្រសួង ​និង​អ្នកពាក់ព័ន្ធ ​ក្នុង​បំពេញសលាកប័ត្រ​ព័ត៌មាន ​និង​សំណុំ​ឯកសារផ្សេងៗ។​

បន្ទាប់​ពី​បាន​ស្តាប់​ព័ត៌មាន​ពីទីតាំងដីរដ្ឋមិនទាន់ចុះបញ្ជីធ្វើប័ណ្ណសម្គាល់កម្មសិទ្ធិនេះដែរ ​លោក អ៊ុក ភ័ក្ត្រា ​អភិបាលរងកោះកុង​ សំណូមពរដល់រដ្ឋបាលក្រុងស្រុក ​ឃុំសង្កាត់ មន្ទីរអង្គភាពជុំវិញ ករណី​មាន​ចម្ងល់​អ្វីមិន​យល់ពីនីតិវិធីចុះបញ្ជី ​អាច​ចោទ​ជា​សំណួរ​មកកាន់​មន្រ្តី​ជំនាញរបស់​ក្រសួង​សេដ្ឋកិច្ច ​ឬក្រសួង​ដែនដីបាន ​ក្នុងន័យ​ងាយស្រួល​អនុវត្តទៅ​តាមច្បាប់កំណត់។

បើតាម​លោកអភិបាលរងខេត្តកោះកុង ​ការចូលរួមអនុវត្តធ្វើបញ្ជីសារពើភណ្ឌរបស់រដ្ឋ ជាកាតព្វកិច្ច​របស់​សាមីមន្ទីរអង្គភាព​ រដ្ឋបាលក្រុងស្រុក ​ឃុំសង្កាត់ ​កុំឱ្យ​សាច​ទឹក​ដាក់គ្នា​ទៅវិញ​ទៅមក ឬប្រឈម​ចំពោះមុខច្បាប់​ យោង​ទៅតាមការ​សម្រេចរបស់រាជរដ្ឋាភិបាលកម្ពុជា៕ អត្ថបទ៖ ឈឹម មករា