ភ្នំពេញ៖ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ​និងក្រុមការងារអន្តរក្រសួង នៅថ្ងៃទី២៩ ខែវិច្ឆិកានេះបានអញ្ជើញចុះត្រួតពិនិត្យទីតាំងរៀបចំដំឡើងឆាកប្រគំតន្ត្រី ​ទីតាំងរៀបចំស្តង់តាំង​ពិព័រណ៍​ និងទីតាំងកម្សាន្តសប្បាយនានាទៀត ត្រៀមព្រឹត្តិការណ៍បុណ្យសមុទ្រលើកទី៩ជុំទី៣ នៅខេត្តព្រះសីហនុ ​ដែលនឹងចាប់ផ្តើមនៅថ្ងៃទី៩ ខែធ្នូខាងមុខនេះ។

ឯកឧត្តមរដ្ឋមន្ត្រី ថោង ខុន ថ្លែងថា មកដល់ពេលនេះ ​យើងបានត្រៀមខ្លួនរាល់អស់ហើយ ក្នុង​ការ​រៀបចំព្រឹត្តិការណ៍​បុណ្យសមុទ្រលើកទី៩ ជុំទី៣ ឆ្នាំ២០២២ ​នៅខេត្តព្រះសីហនុ ចាប់ពីថ្ងៃទី​៩ដល់ថ្ងៃទី១១ ខែធ្នូ ហើយនឹងរៀបចំមហាសន្និបាតក្លឹបឆ្នេរស្អាតពិភពលោកគ្នា​ ផ្តើមពីថ្ងៃទី៩ រហូតដល់ថ្ងៃទី១៤ ​ខែធ្នូនោះដែរ។

ឯកឧត្តម បន្តថា នៅសល់ពេលប្រមាណតែ១០ថ្ងៃទៀតប៉ុណ្ណោះ ព្រឹត្តិការណ៍​បុណ្យសមុទ្រ អមដោយ​ព្រឹត្តិការណ៍មហាសន្និបាតក្លឹបឆ្នេរស្អាតពិភពលោក​នឹងឈានចូលមកដល់ ហើយនៅ​តាមទីតាំងមួយចំនួន ​គឺបានចាប់ផ្តើមរៀបចំដំឡើងឆាកប្រគុំដន្ត្រី ​រៀបចំស្តង់ពិព័រណ៍ និងទីតាំង​កម្សាន្ត​សប្បាយនានាទៀត ​ក៏ត្រូវបាននិងកំពុងរៀបចំបណ្តើរៗហើយ។

ឯកឧត្តម ថោង ខុន បន្តថា ព្រឹត្តិការណ៍បុណ្យសមុទ្រឆ្នាំ២០២២នេះ ​គឺយើងខិតខំរៀបចំឲ្យថ្មី ល្អប្លែក និង​សប្បាយជាងបណ្តាឆ្នាំកន្លងទៅ ​ដោយសារព្រឹត្តិការណ៍​បុណ្យ​សមុទ្រឆ្នាំនេះ គឺមានប្រតិភូ​ជាន់​ខ្ពស់១២០រូបតំណាងក្លឹបឆ្នេរស្អាតជាងបំផុតលើពិភពលោកជិត៣០ឆ្នេរមកពីតាមបណ្តាប្រទេស គេក៏​នឹង​អញ្ជើញចូលរួមកម្សាន្តជាមួយយើងផងដែរ ហើយឆ្នាំនេះក៏ជាឆ្នាំដំបូងដែលយើងបានរួមគ្នា​រៀបចំ​បុណ្យ​សមុទ្រឡើងវិញ ​ខណៈព្រឹត្តិការណ៍នេះ ​បានអាកខាន​ពីរឆ្នាំ​ដោយសារការរាតត្បាត​មេរោគកូវីដ១៩។

ឯកឧត្តម បញ្ជាក់ថា ប្រតិភូក្លិបឆ្នេរសមុទ្របំផុតស្អាតជាងគេលើសកលលោក ដែលបាន​បញ្ជាក់ថា​នឹងចូលរួម រួមមាន៖ ប្រទេសអ៊ីស្រាអែល បារាំង អេស្ប៉ាញ ព័រទុយហ្កាល់ ​កាណាដា ប្រេស៊ីល ម៉ារ៉ុក កូតឌីវ័រ ម៉ូសំប៊ិក​ សេណេហ្កាល់ អង់ហ្គោឡា ប្រទេសក្នុងតំបន់សមុទ្រការីបង់ ​វៀតណាម ថៃ ចិន ជប៉ុន កូរ៉េខាងត្បូង ហ្វីលីពីន។

ឯកឧត្តមរដ្ឋមន្ត្រី បន្តថា បុណ្យសមុទ្រនៅខេត្តព្រះសីហនុ មានស្តង់តាំងពិព័រណ៍​ជាង៣៥០ស្តង់ រួមមានស្តង់តាមក្រសួងស្ថានប័ន ស្តង់ក្លឹបឆ្នេរស្អាត ស្តង់ផលិតផលក្នុងស្រុក ស្តង់ស្ថានទូតបរទេស ស្តង់បង្ហាញភូមិម្ហូបអាហារ ​តង់វីថីមហាអាហារ ស្តង់អាហារខ្មែរ​ ស្តង់សហគ្រាស ​សំភារៈគ្រឿចក្រ សំលៀកបំពាក់​ គ្រឿង​អេឡិចត្រូនិចជាច្រើនទៀត​ អមដោយព្រឹត្តិការណ៍បាញ់កាំជ្រួច ប្រគំដន្ត្រី​ខ្នាតធំ ប្រកួតកីឡា៦ប្រភេទកីឡា ​និងមានកម្មវិធីកម្សាន្តសប្បាយតូចៗជាច្រើនទៀត ៕អត្ថបទ ស៊ុមសុខជា