​ទួរគី៖ ប្រធានាធិបតី​​ទួរគី​លោក Tayyip Erdogan បានបញ្ជាក់​ជាថ្មី​នូវ​ការប្តេជ្ញាចិត្ត​របស់​ប្រទេស​ទួរគី​ ដើម្បី​បង្កើត​ច្រករបៀង​សន្តិសុខ​ប្រវែង ៣០​គីឡូម៉ែត្រ​តាម​បណ្តោយ​ព្រំដែន​ភាគខាងត្បូង​ជាមួយ​ប្រទេស​ស៊ី​រី​កាលពី​ថ្ងៃ​ចន្ទ​ ខណៈ​ការរំពឹងទុក​នៃប្រតិបត្តិ​ការ​យោធា​ថ្មី​បាន​កើនឡើង​កាលពី​ចុង​សប្តាហ៍​។

ថ្លែង​បន្ទាប់ពី​កិច្ចប្រជុំ​គណៈរដ្ឋមន្ត្រី​នៅក្នុង​រដ្ឋធានី ​Ankara លោក ​Erdogan បាន​និយាយថា គ្មាន​នរណាម្នាក់​នឹងត្រូវ​បាន​រំខាន​ដោយ​ប្រតិបត្តិការ​យោធា​របស់​​ទួរគី​ចូលទៅក្នុង​ប្រទេស​ស៊ី​រី​នោះទេ​។ កាំភ្លើង​ធំ​ផ្លោងត្រូវបាន​បាញ់​ជា​រៀងរាល់ថ្ងៃ​ពី​ប្រទេស​ទួរគី វាយប្រហារ​ទៅលើ​គោលដៅអង្គភាព​ការពារ​ប្រជាជន​ឃឺ​ដ ​(YPG) រយៈពេល​មួយ​សប្តាហ៍ ខណៈ​យន្តហោះ​ចម្បាំង​បានធ្វើការ​វាយប្រហារ​តាម​អាកាស​។​ កងទ័ព​ទួរគីត្រូវការ​ពេល​តែ​ពីរ​បី​ថ្ងៃ​ប៉ុណ្ណោះ​ដើម្បី​ត្រៀមខ្លួន​សម្រាប់​ការវាយលុក​លើទឹក​ដី​ប្រទេស​ស៊ី​រី​ភាគ​ខាងជើង ហើយ​ការសម្រេចចិត្ត​បែបនេះ​បានធ្វើ​ឡើង​នៅក្នុង​កិច្ចប្រជុំ​គណៈរដ្ឋមន្ត្រី​កាលពី​ថ្ងៃ​ចន្ទ ខណៈ​កងកម្លាំង​ទួរគី​បាន​បាញ់​ផ្លោង​លើ​កងជីវពល​ឃឺ​ដ​ឆ្លងកាត់​ព្រំដែន​។ នៅ​ពេលដែល​ការសម្រេច​ចិត្តជា​ផ្លូវការ​ ត្រូវបាន​គេ​រំពឹងទុក​បន្ទាប់ពី​កិច្ចប្រជុំ​គណៈរដ្ឋមន្ត្រី លោក Erdogan ពុំបាន​និយាយ​​ដោយផ្ទាល់​អំពី​បញ្ហា​នេះ​ក្នុងអំឡុងពេល​សុន្ទរកថា​របស់​លោ​កឡើ​យ​។​

​ការកើនឡើង​ការបាញ់​ផ្លោង​កាន់តែខ្លាំង​នៅតាម​បណ្តោយ​ព្រំដែន កើតមានឡើង​បន្ទាប់ពី​ការ​វាយ​ប្រហារ​ដោយ​គ្រាប់​បែក​ដ៏​ឃោរឃៅ​ នៅក្នុង​ទីក្រុង​អ៊ី​ស្តង់​ប៊ុល​ប្រទេស​ទួ​រ​កី​កាលពី​ពីរ​សប្តាហ៍​មុន ​ដែល​ទីក្រុង​អង់កា​រ៉ា​បានដាក់​កំហុស​ទៅលើ​កងជីវពល​អង្គកា​រពារ​ប្រជាជន​ឃឺ​ដ ​(YPG)។ ប៉ុន្តែ​អង្គភាព YPG បាន​បដិសេធ​ការជាប់​ពាក់ព័ន្ធ​ក្នុងការ​បំផ្ទុះ​គ្រាប់បែក​នេះ ហើយ​បាន​ឆ្លើយតប​រាល់ពេល​ចំពោះ​ការវាយប្រហារ​ឆ្លង​ព្រំដែន​ ដោយ​ការបាញ់​ផ្លោង​កាំភ្លើង​ធំ​។ កន្លង​មក​ទួរគី​បាន​បើក​ការ​វាយ​លុក​ដោយ​យោធា​នៅក្នុង​ប្រទេស​ស៊ី​រី ​ទៅលើ​អង្គភាព​ការពារ​ប្រជាជន​ឃឺ​ដ ​(YPG) ដោយ​ចាត់ទុកថា ​អង្គភាព​នេះ​ជា​ស្លាប​របស់​គណបក្ស​ពលករ​ឃឺ​ដ (PKK) ដែល​ប្រទេស​ទួរគី សហរដ្ឋអាមេរិក និង​សហភាព​អឺរ៉ុប​ចាត់ទុកជា​ក្រុម​ភេរ​វករ៕

អត្ថបទ៖ ប៊ុនថន