ភ្នំពេញ៖ ឯកឧត្តមសាស្ត្រាចារ្យ ស៊ា ហួង រដ្ឋលេខាធិការក្រសួងសុខាភិបាល បានអះអាងថា កម្ពុជា សម្រេចបានលទ្ធផលល្អក្នុងការប្រយុទ្ធប្រឆាំង នឹងជំងឺអេដស៍ បើប្រៀបធៀបទៅនឹងបណ្តាប្រទេសនៅក្នុងតំបន់។
ការថ្លែងរបស់ឯកឧត្តមសាស្ត្រាចារ្យ ស៊ា ហួង យ៉ាងដូច្នេះក្នុងពិធីបើកសិក្ខាសាលាពិគ្រោះយោបល់ស្តីពី " របកគំហើញ និងអនុសាសន៍ក្នុងការពិនិត្យពាក់កណ្តាលគម្រោង នៃផែនការយុទ្ធសាស្ត្រសម្រាប់បង្ការ ថែទាំជំងឺអេដស៍ និងកាមរោគ ក្នុងវិស័យសុខាភិបាល ២០២១-២០២៥, និងមានការចូលរួមពីឯកឧត្តមវេជ្ជបណ្ឌិត ទា ផលា អនុប្រធានអាជ្ញាធរជាតិប្រយុទ្ធនឹងជំងឺអេដស៍ លោកស្រី ប៉ាទ្រីស្យា អ៊ុងពីន ប្រធានប្រតិបត្តិអង្គការ UNAIDS ប្រចាំកម្ពុជា,នាព្រឹកថ្ងៃទី២៩ ខែវិច្ឆិកា ឆ្នាំ២០២២នេះ។
ឯកឧត្តម រដ្ឋលេខាធិការ បានលើកឡើងទៀតថា តាមការប៉ាន់ស្មានដោយអង្គការ UNAIDS កម្ពុជា បានប្រែក្លាយពីប្រទេសដែលមានអត្រាប្រេវ៉ាឡង់ នៃមេរោគអេដស៍ខ្ពស់ក្នុងតំបន់អាស៊ីកាលពីទសត្សរ៍ ឆ្នាំ២០០៣ មាន ១,១% ឱ្យថយចុះមកត្រឹម ០,៦% ឆ្នាំ២០២១ ហើយកម្ពុជាបានស្ថិតក្នុងចំណោមប្រទេសទាំង៧ ទូទាំងសកលលោក សម្រេចបានទិសដៅ ៩០-៩០-៩០ នៅឆ្នាំ២០១៧ គឺបីឆ្នាំពេលកំណត់។ បើប្រៀបធៀបទៅនឹងទិសដៅ ៩៥-៩៥-៩៥ ដែលយើងបានកំណត់ត្រឹមឆ្នាំ២០២៥ កម្ពុជាសម្រេចបាន ៨៤% នៃអ្នកផ្ទុកមេរោគអេដស៍ បានដឹងពីស្ថានភាពមេរោគអេដស៍ ៩៩% នៃអ្នកដឹងពីស្ថានភាពផ្ទុកមេរោគអេដស៍ បានទទួលការព្យាបាលដោយឱសថប្រឆាំងមេរោគអេដស៍ និង ៩៧% នៃអ្នកកំពុងទទួលការព្យាបាលដោយ ឱសថប្រឆាំងមេរោគអេដស៍ មានបន្ទុកមេរោគអេដស៍ក្នុងឈាមត្រូវបានបង្ក្រាប។
បើតាមលោកវេជ្ជបណ្ឌិត អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ បានឲ្យដឹងថា សិក្ខាសាលាថ្ងៃនេះ យើងនឹងធ្វើឡើងពេញមួយថ្ងៃ ដែលមានការបង្ហាញដោយសង្ខេបតាមសមាសភាពនីមួយៗ នៅពេលព្រឹក និងមានក្រុមពិភាក្សានៅពេលល្ងាច ក្នុងគោលបំណងរួមគឺ៖ ធ្វើសុពលភាពនៃរបកគំហើញ និងអនុសាសន៍នៃការពិនិត្យពាក់កណ្តាលគម្រោងនៃផែនការយុទ្ធសាស្ត សម្រាប់បង្ការ ថែទាំ និងព្យាបាលជំងឺអេដស៍ និងកាមរោគក្នុងវិស័យសុខាភិបាលឆ្នាំ២០២១-២០២៥ ឱ្យមានការចូលរួមពីគ្រប់ភាគីពាក់ព័ន្ធ សហគមន៍នៃប្រជាជនចំណុច និងពិភាក្សាពីអាទិភាពជាយុទ្ធសាស្ត្រ និងកំណត់វិធីសាស្ត្រសម្រាប់ការអនុវត្តក្នុងរយៈពេល៣ឆ្នាំខាងមុខទៀត ដើម្បីរៀបចំលើកសំណើមូលនិធិសកលឆ្នាំ ២០២៤-២០២៦ នៅឆ្នាំក្រោយ។
លោកវេជ្ជបណ្ឌិត អ៊ុក វិជ្ជា បានបញ្ជាក់ទៀតថា ការពិនិត្យឡើងវិញពាក់កណ្តាលនៃផែនការយុទ្ធសាស្ត្រ គឺយើងធ្វើឡើងត្រូវចំពេលដែលយើងត្រូវមើលឡើងវិញ ពីនាវានុវត្តន៍ ភាពបទបែននៃកម្មវិធី និរន្តរភាពនៃកម្មវិធី និងការឆ្លើយតបដោយផ្តោតលើប្រជាជនជាគោលកំណត់ សកម្មភាពជាអាទិភាព រៀបចំយុទ្ធសាស្ដ្រសម្រាប់អនុវត្តសកម្មភាពទាំងនោះ ហើយយើងទាំងអស់គ្នាត្រូវខិតខំប្រឹងប្រែងបន្ថែមទៀត ដើម្បីអាចឈានទៅបញ្ចប់អេដស៍នៅប្រទេសកម្ពុជា៕អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
