អ៊ុយក្រែន៖ ក្រុមអ្នកការទូតបានទទួលដំណឹងពីការលើកឡើង ជុំវិញជម្លោះក្នុងប្រទេសអ៊ុយក្រែនថា វីរុសបាក់តេរី និងភ្នាក់ងារបង្កជំងឺផ្សេងទៀតអាចត្រូវបានគេប្រើជាឧបករណ៍នៃសង្គ្រាម។ គណៈប្រតិភូរាប់រយនាក់បានមកជួបជុំគ្នានៅទីក្រុងហ្សឺណែវ ប្រទេសស្វីស កាលពីថ្ងៃចន្ទដើម្បីពិភាក្សាអំពីការគំរាមកំហែងនៃអាវុធជីវសាស្ត្រ។
អនុសញ្ញាអាវុធជីវសាស្ត្របានហាមឃាត់ការផលិត ស្តុកទុក និងការប្រើប្រាស់អាវុធប្រភេទនេះ។ ក្រុមអ្នកការទូត និងអ្នកជំនាញសន្តិសុខសុខភាពបានមកជួបប្រជុំគ្នាជាលើកដំបូងក្នុងរយៈពេល ៦ឆ្នាំដើម្បីពិនិត្យឡើងវិញសន្ធិសញ្ញានេះ។ លោកស្រី Nakamitsu Izumi អ្នកតំណាងជាន់ខ្ពស់ទទួលបន្ទុកកិច្ចការរំសាយអាវុធ របស់អង្គការសហប្រជាជាតិបាននិយាយថា ខណៈនាំមកនូវសុវត្ថិភាពជីវសាស្ត្រ និងសន្តិសុខជីវសាស្ត្រ មកប្រើប្រាស់ជាក់ស្តែងកាន់តែច្រើនឡើង ជំងឺរាតត្បាតក៏បានបង្ហាញពីការរំខានដែលអាចកើតមានឡើង ប្រសិនបើភ្នាក់ងារជីវសាស្ត្រត្រូវបានប្រើប្រាស់ក្នុងលក្ខណៈចេតនាជាអាវុធនៃសង្គ្រាម ឬភេរវកម្ម។
លោកស្រី Nakamitsu បានជំរុញឱ្យបណ្តាប្រទេសជាសមាជិកស៊ើបអង្កេត និងឆ្លើយតបចំពោះការរំលោភបំពានណាមួយ។ ប៉ុន្តែគណៈប្រតិភូមួយចំនួនបារម្ភថា អ្នកដែលមកពីប្រទេសរុស្ស៊ីអាចប្រើប្រាស់វេទិការបស់ពួកគេនៅក្នុងសន្និសីទ ដើម្បីបន្តយុទ្ធនាការផ្សព្វផ្សាយព័ត៌មានមិនពិតបន្ថែមទៀត។ មេដឹកនាំនៅទីក្រុងមូស្គូបានអះអាងថា មន្ត្រីសហរដ្ឋអាមេរិកបានគាំទ្រមន្ទីរពិសោធន៍អាវុធជីវសាស្ត្រសម្ងាត់នៅក្នុងប្រទេសអ៊ុយក្រែន។ អ្នកតំណាងរុស្ស៊ីប្រចាំអង្គការសហប្រជាជាតិនៅទីក្រុងហ្សឺណែវ លោក Gennady Gatilov បានលើកឡើងជាថ្មីនូវការអះអាងទាំងនោះនៅក្នុងសុន្ទរកថាបើកកិច្ចប្រជុំរបស់លោក៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
