កំពង់ឆ្នាំង៖ លោក យ៉ាន់ ដូបូស អភិបាលក្រុង Bussy Siant Georges ប្រទេសបារាំង នារសៀលថ្ងៃទី២៩ ខែវិច្ឆិកា ឆ្នាំ២០២២នេះ បានថ្លែងកោដសរសើរចំពោះអាជ្ញាធរខេត្តកំពង់ឆ្នាំង ក្នុងការអភិវឌ្ឍន៍ប្រទេសបានយ៉ាងល្អលើគ្រប់វិស័យ មិនដូចការលើក​ឡើង​នៃជនមួយចំនួននៅក្រៅប្រទេសនោះឡើយ។ លោកបានថ្លែងបែបនេះនៅក្នុងការចូលរួមពិធីចុះកិច្ចព្រមព្រៀងសហប្រតិបត្តការរវាងខេត្តកំពង់ឆ្នាំអ និងក្រុង Bussy Siant Georges ប្រទេសបារាំង ដោយមានការអញ្ជើញចូលរួមជាអធិបតីពីឯកឧត្តបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ និងឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង។

 លោក យ៉ាន់ ដូបូស អភិបាលក្រុង Bussy Siant Georges ប្រទេសបារាំងបានបន្តថា៖ នៅពេលលោកបានចូលដល់ទឹកដីខេត្តកំពង់ឆ្នាំង លោកបានដឹងថា ប្រជាពលរដ្ឋកម្ពុជាបានរស់ដោយក្តីសុខសប្បាយក្រោមម្លប់សន្តិភាព មានការរីកចម្រើនលើគ្រប់វិស័យ រួមទាំង​ហេដ្ឋារចនាសម្ព័ន្ធផ្លូវថ្នល់ និងរមណីយដ្ឋានបែបធម្មជាតិផងដែរ។ ចំណែកវិស័យសុខាភិបាល អាជ្ញាធរខេត្តកំពង់ឆ្នាំងបានចូលរួមល្អ ក្នុងការថែរក្សាសុខុមាលភាពប្រជាពលរដ្ឋទាំងអស់ អោយជៀសផុតពីជំងឺកូវីដ១៩ មិនមានការឆ្លងរាលដាលក្នុងសហគមន៍ មិនមាន​ការពាក់ម៉ាស់នៅតាមទីសាធារណៈ គឺអាចធ្វើដំណើរបានដោយសេរី។ នៅក្នុងចុងឆ្នាំ២០២២នេះ អាជ្ញាធរខេត្តក៏បាន​រៀបចំពិធីបុណ្យអុំទូក បណ្តែតប្រទីប សំពះព្រះខែ និងបានរៀបចំទីកន្លែងកំសាន្តសម្រាប់អោយប្រជាពលរដ្ឋកម្ពុជាបានសប្បាយរីករាយទៀតផង។ កត្តាទាំងអស់នេះ គឺផ្ទុយស្រឡះពីការ​លើកឡើងរបស់ជនមួយចំនួននៅក្រៅប្រទេស ពាក់ព័ន្ធនឹងការរីកចម្រើនលើគ្រប់វិស័យរបស់កម្ពុជា។ លោកបានបន្តថា ក្រុង Bussy Siant Georges ប្រទេសបារាំង នឹងចុះកិច្ចព្រមព្រៀងជា​ដៃគូក្នុងការអភិវឌ្ឍន៍លើគ្រប់វិស័យជាមួយខេត្តកំពង់ឆ្នាំងដោយមិនរួញរាឡើយ។

 ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានថ្លែងកោដសរសើរដល់លោក យ៉ាន់ ដូបូស អភិបាលក្រុង Bussy Siant Georges ប្រទេសបារាំង ដែលបាននិយាយពិតលើអ្វីដែលរដ្ឋបាលខេត្តកំពង់ឆ្នាំងកំពុងមាន និងកំពុងធ្វើដើម្បីប្រជាពលរដ្ឋ ដើម្បីប្រទេសជាតិ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕ អត្ថបទ ៖ ហុង វាស្នា