ភ្នំពេញ៖ នៅថ្ងៃទី២៩ ខែវិច្ឆិកានេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានទទួលជួបឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតវិសាមញ្ញ និងពេញសមត្ថភាពជប៉ុនប្រចាំនៅកម្ពុជា ចូលជួបសំដែងការគួរជម្រាបលា ការបញ្ចប់អាណត្តិបេសកកម្មការទូតនៅកម្ពុជា។
ឯកឧត្តម មិកាមិ ម៉ាសាហ៊ីរ៉ូថ្លែងថា ទោះឯកឧត្តម បញ្ចប់អាណត្តិការទូតនៅកម្ពុជាក៏ដោយ ក៏ឯកឧត្តមនឹងជំរុញឲ្យមានជើងហោះហើរត្រង់កម្ពុជា ជប៉ុនឡើងវិញ។
បើតាមឯកឧត្តម ទ្រី ឈីវ ទីប្រឹក្សាក្រសួងទេសចរណ៍ថ្លែងឲ្យក្រោយជំនួបនេះថា វិបត្តិកូវីដ១៩ អូសបន្លាយជាង ២ឆ្នាំមកនេះ បានធ្វើឲ្យជើងហោះហើរត្រង់កម្ពុជាជប៉ុន បានផ្អាកដំណើរការ ហើយរហូតមកដល់ពេលនេះ ការបើកជើងហោះហើរត្រង់កម្ពុជា ជប៉ុន នៅមិនទាន់មានដំណើរការឡើងវិញទេ ហើយក្នុងជំនួបនេះ បើទោះឯកឧត្តម ឯកអគ្គរាជទូតជប៉ុន នឹងបញ្ចប់អណត្តិការទូតនៅកម្ពុជាក៏ដោយ ក៏ឯកឧត្តម នៅតែព្យាយាមជំរុញឲ្យក្រុមហ៊ុនអាកាសចរណ៍ជប៉ុន បើកជើងហោះហើរដឹកអ្នកដំណើរតាមផ្លូវអាកាសកម្ពុជា ជប៉ុនឡើងវិញ។
ឯកឧត្តមបន្តថា ក្នុងរយៈពេល ១០ខែឆ្នាំ២០២២នេះ ទេសចរកម្ពុជា ទៅកាន់ប្រទេសជប៉ុនប្រមាណជាង ៧០០០នាក់ ហើយទេសចរពីជប៉ុន មកទស្សនាកម្ពុជាវិញ គឺមានប្រមាណជិត ២ម៉ឺននាក់ ហើយការធ្វើដំណើរនោះ ភាគច្រើន គឺធ្វើតាមរយៈជើងហោះហើរកម្ពុជា កូរ៉េខាងត្បូងទៅកាន់ប្រទេសជប៉ុន ហើយភាគីទាំងពីរ ក៏បានប្តេជ្ញាផ្សព្វផ្សាយជំរុញលំហូរទេសចររវាងប្រទេសទាំងពីរកម្ពុជា ជប៉ុនឲ្យកាន់តែច្រើនថែមទៀត។
ឯកឧត្តម រដ្ឋមន្ត្រី ថោង ខុន ថ្លែងថា ប្រទេសជប៉ុន ជាប្រទេសដែលជួយមកកម្ពុជាលើគ្រប់វិស័យ ជាពិសេសវិស័យ អប់រំ វប្បធម៌ ធម្មជាតិ ប្រព័ន្ធហេដ្ឋារចនាសម្ព័ន្ធ ផ្លូវថ្នល់ ដែលជាប់ពាក់ព័ន្ធជាច្រើនជាមួយនឹងវិស័យទេសចរណ៍ ហើយក្រៅពីនេះ ជប៉ុនក៏មានផ្តល់ជំនួយបណ្តុះបណ្តាលជំនាញទេសចរណ៍ជាច្រើនទៀត ដូចជា ជំនាញមគ្គុទេសក៏ទេសចរណ៍និយាយភាសាជប៉ុន ជំនាញស្ប៉ា មាស្សាជាដើម។
ក្នុងជំនួបនេះដែរ ឯកឧត្តម ថោង ខុន ក៏បានថ្លែងអំណរគុណស្ថានទូតជប៉ុនដែលបានជួយបណ្តុះបណ្តាលវិស័យកីឡា ជាពិសេសកីឡាយូដូ និងការ៉ាតេ ដើម្បីត្រៀមប្រកួតកីឡាSEA GAMEឆ្នាំ២០២៣ ដែលកម្ពុជាធ្វើជាម្ចាស់ផ្ទះ ហើយឯកឧត្តមរដ្ឋមន្ត្រី ក៏ស្នើអញ្ជើញក្រុមគ្រួសារឯកឧត្តមអគ្គរាជទូតមកទស្សនាការប្រកួតកីឡានោះដែរ៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
