ភ្នំពេញ៖ សាលារាជធានីភ្នំពេញសម្រេចកំណត់ការពិន័យជាប្រាក់ចន្លោះពី ២លានរៀល ទៅដល់ ៥លានរៀលទៅលើបុគ្គលដែលត្រូវបានរកឃើញថា បានបំពានដោយចេតនាទៅលើវិធានការបិទខ្ទប់រាជធានីភ្នំពេញ។
ការពិន័យជាប្រាក់នេះ ត្រូវបានប្រកាសឱ្យដឹងជាសាធារណៈនៅក្នុងសេចក្ដីសម្រេចមួយចេញដោយសាលារាជធានីភ្នំពេញនៅយប់ថ្ងៃនេះ។
បើតាមសេចក្ដីសម្រេចនោះ បុគ្គលដែលត្រូវបានរកឃើញថាបានបំពានដោយចេតនាទៅលើវិធានការបិទខ្ទប់ភូមិសាស្ត្ររាជធានីភ្នំពេញ នឹងត្រូវពិន័យជាប្រាក់ទាបបំផុត ២លានរៀល និងខ្ពស់បំផុតរហូតដល់ ៥លានរៀល។
សេចក្ដីសម្រេចនោះក៏តម្រូវឱ្យអ្នកបំពានវិធានការរបស់រដ្ឋាភិបាល ត្រូវបង់ប្រាក់ពិន័យនេះនៅក្នុងរយៈពេលត្រឹមតែ ៣០ថ្ងៃប៉ុណ្ណោះ ចាប់ពីថ្ងៃដែលសមត្ថកិច្ចប្រគល់បង្កាន់ដៃទៅដល់បុគ្គលនោះ។
សាលារាជធានីភ្នំពេញ បានសម្រេចចេញតារាងតម្លៃផាកពិន័យនេះ បន្ទាប់ពីប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានសម្រេចឱ្យបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ដើម្បីទប់ស្កាត់ការឆ្លងរីករាលដាលកាន់តែខ្លាំងឡើងនៃមេរោគកូវីដ១៩។
បើតាមក្រសួងសុខាភិបាល មនុស្សដល់ទៅ ៦១៨នាក់បន្ថែមទៀត ត្រូវបានរកឃើញឆ្លងមេរោគកូវីដ១៩ ដែលនាំឱ្យកម្ពុជាមានអ្នកឆ្លងមេរោគផ្លូវដង្ហើមនេះសរុបរហូតដល់ ៦ ៣៨៩នាក់ហើយគិតត្រឹមថ្ងៃនេះ ក្នុងនោះអ្នកឆ្លងដល់ទៅ ៥ ៨៤៦នាក់ ឬស្មើនឹង ៩១.៥ភាគរយ បានឆ្លងមេរោគនេះពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
