ភ្នំពេញ៖ ក្រសួងបរិស្ថាន គ្រោងនឹងពង្រីកការធ្វើយុទ្ធនាការអន្ទាក់សូន្យ នៅខេត្តចំនួន៥ទៀត បន្ទាប់​ពីបាន​ធ្វើដោយជោគជ័យ នៅខេត្តចំនួន៦នាពេលកន្លងមក ខណៈកម្ពុជាជាប្រទេសទីមួយ​ នៅ​ក្នុងតំបន់ ដែលផ្ដួចផ្ដើម និងធ្វើយុទ្ធនាការអន្ទាក់សូន្យនេះ ។

ក្នុងកិច្ចសម្ភាសន៍ជាមួយ BTV ឯកឧត្តម នេត ភក្ត្រា រដ្ឋលេខាធិការ និង​ជា​អ្នកនាំ​ពាក្យ​ក្រសួង​បរិស្ថាន មានប្រសាសន៍ថា យុទ្ធនាការអន្ទាក់សូន្យនេះ មានគោល បំណងសំខាន់ចំនួន៣ ទី១. ដើម្បី​ផ្លាស់ប្ដូរនូវឥរិយាបថរបស់ពលរដ្ឋអំពីការហូបសាច់សត្វព្រៃ ការជួញ​ដូរ​សត្វ​ព្រៃ​ត្រូវ​តែ​បញ្ឈប់, ទី២. ដើម្បីឲ្យសាធារណជន បានយល់ដឹងអំពីផលប៉ះពាល់ នៃអន្ទាក់ ព្រោះ​មិន​មែន​ធ្វើ​ឲ្យ​ប៉ះពាល់​ដល់សត្វព្រៃនោះទេ ក៏ធ្វើឲ្យប៉ះពាល់ទៅដល់សុវត្ថភាព របស់ មនុស្សដែរ, ទី៣. ដើម្បី​ផ្លាស់​ប្ដូរ​នូវឥរិយាបថពលរដ្ឋ ដែលចូលចិត្តហូបសត្វព្រៃ សូមឲ្យ ពួកគាត់បញ្ឈប់ ព្រោះសត្វ​ព្រៃ​ធ្វើ​ឲ្យ​ប៉ះពាល់​ដល់សុខភាព និងខ្លួនរបស់វាសម្បូរដោយវីរុស ។

ឯកឧត្តមបានបន្តថា បន្ទាប់ពីមានការយល់ដឹងច្រើនពីពលរដ្ឋ ទៅលើបញ្ហាអន្ទាក់ បញ្ហា សត្វព្រៃ និង​មានការចូលរួមគាំទ្រដ៏ច្រើនលើសលុប នៃយុទ្ធនាការលើកទី១ ក្រសួងបរិស្ថាន និង​បន្ត​សហការ​ពី​អង្គការដៃគូ រួមទាំងអាជ្ញាធរមូលដ្ឋាន នឹងបន្តយុទ្ធនាការនៅខេត្តចំនួន៥ ដែល​ស្ថិត​នៅ​តំបន់​ជួរ​ភ្នំក្រវ៉ាញ ក្នុងនោះមានខេត្តបាត់ដំបង កំពង់ស្ពឺ កំពង់ឆ្នាំង កោះកុង និងខេត្តពោធិ៍សាត់ នៅ​ពេលខាងមុខ ។

ឯកឧត្តម នេត ភក្ត្រា បានបញ្ជាក់ថា សម្រាប់យុទ្ធនាការលើកទី១ គឺត្រូវបានធ្វើឡើងនៅ ខេត្ត​ក្រចេះ ស្ទឹងត្រែង រតនគិរី មណ្ឌលគិរី មណ្ឌលគិរី ព្រះវិហារ និងខេត្តកំពង់ធំ មានមនុស្ស ជាង​៣​លាននាក់ ទទួលបានសារនានា ក្នុងរយៈពេល៦ខែ គឺចាប់ពីខែមីនា ត្រូវបានបញ្ចប់នៅ ខែកញ្ញា ឆ្នាំ២០២២ ប៉ុន្តែការអប់រំផ្សព្វផ្សាយ នៅតែបន្តធ្វើក្នុងខេត្តទាំងអស់នេះ ។

គួរបញ្ជាក់ថា ជារៀងរាល់ឆ្នាំ មន្ត្រីអភិរក្សរបស់ក្រសួងបរិស្ថាន និងមន្ត្រីនៃអង្គការដៃគូ បាន​រក​ឃើញ​អន្ទាក់ជាច្រើន ដែលក្រុមព្រានបានដាក់ក្នុងព្រៃ ត្រូវបាននាំយកទៅបំផ្លាញ់ រួម ទាំង​សហការ​ជាមួយកងកម្លាំង បង្ក្រាបបានករណីជួញដូរ និងលក់សត្វព្រៃបានជាបន្តបន្ទាប់ ផងដែរ ៕ អត្ថបទ៖ បាន សុខរិទ្ធិ