ភ្នំពេញ៖ សិស្សថ្នាក់ទី១២ នឹងត្រូវប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី ៥ខែ ធ្នូ ឆ្នាំ ២០២២ខាងមុខ។ ខណៈការប្រឡងកាន់តែខិតជិតមកដល់ សិស្សដែលកំពុងត្រៀមសម្រាប់​ការ​ប្រឡងបានបង្ហាញការជឿជាក់ថាអាចសម្រេចបានលទ្ធផលល្អ ក្រោមហេតុផលការសិក្សា​ពេញ​មួយឆ្នាំ ​របស់ពួកគេដំណើរការប្រសើរ​ ពុំមានការបិទសាលាដូចឆ្នាំកន្លងនោះទេ។

គិតត្រឹមពេលនេះ ការប្រឡងបាក់ឌុបសម្រាប់សិស្សថ្នាក់ទី ១២ គឺនៅសល់រយៈពេលមិនដល់មួយ​សប្ដាហ៍​នោះទេ។ កាលបរិច្ឆេទការប្រឡង ​គឺនឹងប្រព្រឹត្តិទៅនៅថ្ងៃទី ៥ ​និងថ្ងៃទី ៦ខែធ្នូ ឆ្នាំ ២០២២។ គិតមកទល់ពេលនេះ ​តាមរយៈកម្មវិធីសិក្សានៅតាមគ្រឹះស្ថានសិក្សា ក៏ជាវិសមាកាលឈប់សម្រាក​សម្រាប់​សិស្សផងដែរ។

កំឡុងពេលវិសមកាលនេះ ​សិស្សថ្នាក់ទី ១២មួយចំនួន​ នៅតែបន្តមកសាលារៀនជារៀងរាល់ថ្ងៃ ក្នុង​គោលដៅជួបជុំមិត្តិរួមថ្នាក់សិក្សាជាក្រុមរួមគ្នា។ ​ជាក់ស្ដែងយុវជនចំនួន ៣រូប ​នៅវិទ្យាល័យបាក់ទូក បានមកជុំគ្នាសិក្សានៅសាលារៀនតាំងពីព្រឹកព្រលឹម។ ខណៈកំពុងសិក្សានេះ ពួកគេបានលើក​ឡើង​នូវភាពជឿជាក់សម្រាប់ការប្រឡងនាពេលខាងមុខ។

ភាពជឿជាក់ដោយសារ ឆ្នាំសិក្សារបស់ពួកគេដំណើរការបានប្រសើរ សិក្សាបានពេញលេញពុំមាន​ការ​បិទផ្អាក​ដំណើរការសាលារៀនដូចជាឆ្នាំសិក្សាកន្លងនោះទេ។

ពាក់ព័ន្ធនឹងការប្រឡងសញ្ញាបត្របាក់ឌុប ​ក្នុងឆ្នាំនេះ​គឺមិនខុសពីការប្រឡងរាល់ឆ្នាំនោះទេ។ ក្រសួងអប់រំ ​យុវជន និងកីឡា គឺនៅតែរក្សាគោលការណ៍ ចេះគឺជាប់ ដដែល។

ក្រសួងអប់រំ កំណត់យកថ្ងៃទី ២ ខែធ្នូ សម្រាប់ប្រធានគណៈមេប្រយោគទូទាំងប្រទេស​ប្រចាំ​រាជ​ធានី-ខេត្ត ​ដឹកប្រធានវិញ្ញាសារទៅកាន់រាជធានី-ខេត្តរបស់ខ្លួនផងដែរ។ ឈានដល់ថ្ងៃទី ៤ មុនការ​ប្រឡង​មួយថ្ងៃ គឺប្រធានមណ្ឌលត្រូវបិទបញ្ជីឈ្មោះបេក្ខជន តារាងវិញ្ញាសារ បទបញ្ញត្តិសម្រាប់ការ​ប្រឡង​ ប្លង់បន្ទប់ ​ស្លាកលេខបន្ទប់ ​នៅតាមបន្ទប់ប្រឡងនីមួយៗ។

ក្រោយពីការប្រឡងបិទបញ្ចប់​ ក្រសួងអប់រំ យុវជន និងកីឡា កំណត់យកថ្ងៃទី ៧ ខែធ្នូ សម្រាប់ការ​បញ្ជូន​ហិបកិច្ចការរបស់បេក្ខជនទូទាំងប្រទេសត្រឡប់មករាជធានីភ្នំពេញ ​ដើម្បីធ្វើការពិនិត្យនានា មុននឹងឈានដល់ការកែក្រដាសកិច្ចការ៕ អត្ថបទ៖ គឹមហុក