ព្រះវិហារ៖ ឯកឧត្តម គីម រិទ្ធី អភិបាលនៃគណៈអភិបាលខេត្ត បានដឹកនាំប្រតិភូខេត្តព្រះវិហារ នៃព្រះរាជាណាចក្រកម្ពុជា ចូលរួមក្នុងកិច្ចប្រជុំទ្វេភាគី ស្តីពីទំនាក់ទំនងការអភិវឌ្ឍន៍ កម្ពុជា-ថៃ នៅខេត្តឧប៊ុនរាជាធានី នៃព្រះរាជាណាចក្រថៃ ក្នុងគោលបំណងដើម្បីរឹតចំណងសាមគ្គីភាព មិត្តភាព និងកិច្ចប្រតិបត្តិការរវាងខេត្តជាប់ព្រំដែននៃប្រទេសទាំងពីរឱ្យកាន់តែរឹងមាំបន្ថែមទៀត ។

ក្នុងកិច្ចប្រជុំនៅរសៀលថ្ងៃទី២៨ ខែវិច្ឆិកា កន្លងមកទៅ ក៏មានការអញ្ជើញចូលរូមពីសំណាក់ ឯកឧត្តមឧត្តមសេនីយ៍ឯក ស្រី ឌឹក មេ បញ្ជាការកងពលធំអន្តរាគមន៍លេខ៣ មេបញ្ជាការកង​កម្លាំង​ប្រដាប់អាវុធ ថ្នាក់ដឹកនាំមន្ទីរអង្គភាពជំនាញ ក្នុងប្រតិភូខេត្តព្រះវិហារ នៃព្រះរាជាណាចក្រកម្ពុជា ។

ដោយឡែកខាងភាគីថៃដឹកនាំដោយ ឯកឧត្តមឧត្តមសេនីយ៍ទោ វីរៈយុទ្ធ រ៉ាក់ ឈីប មេបញ្ជាការ​កង​កម្លាំងសុរនារី ​ឯកឧត្តម សំភីត ​សយសាក់គូ អភិបាលរងខេត្តឧប៊ុនរាជាធានី មេបញ្ជាការកង​កម្លាំងប្រដាប់អាវុធ ​និងគណៈប្រតិភូអមដំណើរនៃព្រះរាជាណាចក្រថៃ ។

ក្នុងឱកាសនោះឯកឧត្តម គីម រិទ្ធី ព្រមទាំងគណៈប្រតិភូ ​ក៏បានជួបសំណេះសំណាល ជាមួយ និស្សិតកម្ពុជា​ដែលបានទទួល​អាហាររូបករណ៍​ មកពីបណ្តាខេត្តក្នុងប្រទេសកម្ពុជា​ កំពុង​សិក្សា​ថ្នាក់អនុបណ្ឌិត ​ថ្នាក់បរិញ្ញាបត្រ នៅសកលវិទ្យាល័យរាចាផាត់​ ខេត្តអូប៊ុនរាជធានី ក៏ដូចជា​បង្ហាញនូវ វឌ្ឍនភាព ស្ថានភាព ទិដ្ឋភាពនៃការអភិវឌ្ឍនានារបស់កម្ពុជានាពេល​ បច្ចុប្បន្នដល់ក្មួយៗ និង​ជំរុញឱ្យសិស្ស និស្សិត ត្រូវខិតខំប្រឹងប្រែងសិក្សា ​ដើម្បីប្រយោជន៍ ផ្ទាល់ខ្លួន និងប្រទេស​ជាតិ​យើង ព្រមទាំងបានចូលរួមការលេង​កីឡាបាល់ទាត់ ​ដើម្បី​ជំរុញ ​ចំណងមិត្តភាពរវាង​ប្រតិភូខេត្ត​ព្រះវិហារ ​នៃប្រទេសកម្ពុជា និងប្រតិភូ ​ខេត្តឧប៊ុនរាជធានី នៃប្រទេសថៃ និងបានទស្សនា​នូវការ​សម្តែងសិល្បៈ របស់សិស្ស និស្សិតកម្ពុជា ​និងសិស្ស និង ​និស្សិតថៃ ដើម្បីចែករំលែកនូវ​វប្បធម៌គ្នា​ទៅវិញទៅមក៕