ភ្នំពេញ៖ គណៈកម្មការជាតិយូណេស្កូកម្ពុជា នៃក្រសួងវប្បធម៌ និងវិចិត្រសិល្បៈ ក្រុមការងារ លេខាធិការដ្ឋាន​នៃ​គណៈ​កម្មាធិការជាតិស្មារតីចងចាំពិភពលោក​ យូណេស្កូភ្នំពេញ យូណេស្កូបាងកក ​ព្រឹកថ្ងៃទី៣០ ​ខែវិចិ្ឆកានេះ ​បានរៀបចំសិក្ខាសាលាស្តីពី ការផ្សព្វផ្សាយ​អំពី​បេតិកភណ្ឌឯកសារដែលបានចុះបញ្ជីក្នុង “ស្មារតីចងចាំពិភពលោក» ​និងរំលឹកខួបលើកទី៣០ នៃការបង្កើត​ “កម្មវិធីស្មារតីចងចាំពិភពលោក»។

លោក ឯក ប៊ុនថា តំណាងក្រុមការងារលេខាធិការដ្ឋាន​ នៃគណៈកម្មការជាតិស្មារតីចងចាំពិភព​លោក ​បានឲ្យដឹងថា សិក្ខាសាលានេះធ្វើឡើងក្នុងគោលបំណងបង្កើនការយល់ដឹងដល់សិក្ខាកាម អំពី​បេតិកភណ្ឌឯកសារ និងកម្មវិធីស្មារតីចងចាំពិភពលោក រួមទាំងផ្សព្វផ្សាយអំពីបេតិកភណ្ឌ​ឯកសារ​ដែល​បានចុះបញ្ជីក្នុងស្មារតីចងចាំ​ ពិភពលោក ថ្នាក់អន្តជាតិ និងតំបន់​ (បណ្ណសារទួលស្លែង រឿងអីណាវបុស្បា និងឯកសារសំឡេងនិទានរឿង រាមកេរ្តិ៍ដោយតាគ្រុឌ) ​និងប្រមូលព័ត៌មាន និងធាតុចូលពីសិក្ខាកាម ដើម្បីរៀបចំទម្រង់សម្រង់បេតិកភណ្ឌឯកសារ ថ្នាក់ខេត្ត ​និងថ្នាក់ជាតិ និងពិនិត្យលទ្ធភាពលើការរៀបចំបញ្ជីថ្នាក់ជាតិ ដើម្បីតៀមធ្វើការចុះបញ្ជីនាពេលអនាគត។

លោក ហង្ស និស្ស័យ ​ប្រធានសារមនី្ទរឧក្រិដ្ឋកម្មប្រល័យពូជសាសន៍ទួលស្លែង ​បានលើកឡើងពី​បណ្ណ​សារទួលស្លែង បានចុះបញ្ជីស្មារតីចងចាំពិភពលោក​ ថ្នាក់អន្តរជាតិកាលពីថ្ងៃទី៣១ ខែតុលា ឆ្នាំ២០១៧។

កម្ពុជានៅឆ្នាំ២០០៨ ​បានចុះបណ្ណសារទួលស្លែង ក្នុងបញ្ជីស្មារតីចងចាំថ្នាក់តំបន់ ហើយបន្តចុះចូល​ក្នុង​ថ្នាក់​អន្តរជាតិនៅឆ្នាំ២០០៩។

បន្ថែមពីនេះ ​ក៏មានបេតិកភណ្ឌឯកសារពីរផ្សេងទៀត​ ដែល​កម្ពុជា​បាន​ចុះក្នុងបញ្ជីជាបន្តបន្ទាប់ ពោល​គឺឯកសារ សំឡេងនិទានរឿងរាមកេរ្តិ៍ ​ដោយតាគ្រុឌ ​ឆ្នាំ២០១៤ ​និងរឿង​អីណាវបុស្បា? (Panji tales manuscripts) ឆ្នាំ២០១៧។

កម្ពុជានៅមាន​បេតិកភណ្ឌឯកសារ​ជាច្រើន​ទៀតដូចជា ​ប្រភេទ​អត្ថបទ (សិលាចារឹក សៀវភៅ សាស្ត្រាស្លឹករឹត ​ក្រាំង) រូបភាព (រូបថត-ផែនទី-គំនូរ) ឯកសារសំឡេង ​(ថាស កាសែត)។ ដែល បេតិកភណ្ឌទាំងនេះ​ទាមទារ​ឲ្យមានការការពារ ​និងអភិរក្សមុន​នឹង​ឈាន​ទៅ​រក​ការ​បាត់បង់ជាបណ្តើរៗ​ ដូចដែល ​លើកឡើងខាងដើម៕អត្ថបទ៖ រដ្ឋា