ភ្នំពេញ៖ ក្នុងកិច្ចប្រជុំ នៃលើកទី ១៧គណៈកម្មាធិការអន្តររដ្ឋាភិបាលដើម្បីការការពារ​បេតិកភណ្ឌអរូបី ​នៃអង្គការយូណេស្កូ នៅថ្ងៃទី ២៩ ខែវិច្ឆិកា ឆ្នាំ ២០២២ វេលាម៉ោង ១៦:៣១នាទីម៉ោងនៅទីក្រុងរ៉ាបាត ប្រទេសម៉ារុក ត្រូវគ្នានឹងម៉ោង ២២:៣១នាទី នៅប្រទេស​កម្ពុជាយើង គឺ​បាន​គោះ​ញញួរ សម្រេចដាក់សម្បតិ្ត​បេតិកភណ្ឌវប្បធម៌អរូបី​នៃមនុស្សជាតិ​របស់​កម្ពុជា គឺ «គុនល្បុក្កតោ» និងឯកសារនានាទៀត ចូលក្នុងបញ្ជីបេតិកភណ្ឌពិភពលោក របស់​អង្គការUNESCO។

បណ្តាពលរដ្ឋខ្មែរនៅរាជធានីភ្នំពេញ បានបង្ហាញការសប្បាយចិត្តជាខ្លាំង និងមានមោទនភាព​ចំពោះ​រាជរដ្ឋាភិបាលកម្ពុជា ​ដែលបានខិតខំថែរក្សា អភិរក្ស សម្បត្តិវប្បធម៌ ​គុនល្បុក្កតោកម្ពុជា រហូតដល់ អង្គការUNESCO ផ្តល់ការគាំទ្រជាសកល ​និងបានសម្រេចចុះបញ្ជី ​គុនល្បុក្កតោ របស់កម្ពុជា​ ចូលក្នុងបញ្ជីសម្បត្តិបេតិកភណ្ឌវប្បធម៌អរូបីពិភពលោក ​នៅក្នុងកិច្ចប្រជុំលើកទី ១៧ គណៈកម្មាធិការអន្តររដ្ឋាភិបាលដើម្បីការការពារបេតិកភណ្ឌអរូបី ​នៃអង្គការយូណេស្កូ នៅប្រទេសម៉ារុក។

សូមបញ្ជាក់ថា តាមFacebookផ្លូវការរបស់ក្រសួងវប្បធម៌ និងវិចិត្រសិល្បៈបានសរសេរថា “គុនល្បុក្កតោ” ត្រូវបានកិច្ច​ប្រជុំ​លើកទី១៧នៃ គណៈកម្មាធិការអន្តររដ្ឋាភិបាលដើម្បីការការ​ពារបេតិកភណ្ឌអរូបី ​នៃអង្គការយូណេស្កូ ​បានអនុម័តចុះគុនល្បុក្កតោក្នុងបញ្ជីតំណាង​បេតិកភណ្ឌ​វប្បធម៌​អរូបីនៃមនុស្សជាតិរបស់អង្គការយូណេស្កូក្នុងសេចក្តីសម្រេច ​17.COM7.b.1។

គុនល្បុក្កតោ ​ជាក្បាច់គុនបុរាណខ្មែរដែលចាក់ឫសចាក់​គល់យ៉ាងជ្រៅ​នៅក្នុងសង្គមខ្មែរ​ជាច្រើន​សតវត្សមកហើយៗបន្តរស់រានក្នុងសង្គមខ្មែររហូតដល់បច្ចុប្បន្ន។ ចម្លាក់លើជញ្ជាំងប្រាសាទ​សម័យ​អង្គរជាភស្តុតាង​បង្ហាញច្បាស់អំពីការហាត់សមក្បាច់គុននេះដែរ។ ការបង្ហាត់បង្ហាញក្បាច់គុនល្បុក្កតោតៗគ្នាពីជំនាន់​មួយទៅជំនាន់មួយ​ គឺដើម្បីពង្រឹងប្រាជ្ញាស្មារតី និង​សមត្ថភាពការពារខ្លួនពីសត្វសហាវព្រមទាំង​សត្រូវនានាផង និងការពារសង្គមជាតិ​និង​មាតុភូមិផង។

ដោយមានការយកចិត្តទុកដាក់របស់រាជរដ្ឋាភិបាលកម្ពុជា ​ព្រមទាំងការខិតខំប្រឹងប្រែង​របស់​សហគមន៍ គ្រូគុន សិស្សគុនល្បុក្កតោទាំងអស់​ ក្បាច់គុនល្បុក្កតោកម្ពុជា​ត្រូវបានអភិរក្ស ​លើកតម្លៃ និង​ផ្សព្វផ្សាយយ៉ាងទូលំទូលាយនៅលើក្នុងប្រទេស ​និងលើឆាកអន្តរជាតិ៕ អត្ថបទ ស៊ុម សុខជា