អាមេរិក៖ យោងតាមរបាយការណ៍ដែលចេញផ្សាយ ដោយមន្ទីរបញ្ចកោណកាលពីថ្ងៃអង្គារបានឱ្យដឹងថា ប្រទេសចិនទំនងជានឹងស្តុកទុកក្បាលគ្រាប់នុយក្លេអ៊ែរចំនួន ១,៥០០គ្រាប់នៅត្រឹមឆ្នាំ២០៣៥ ប្រសិនបើប្រទេសនេះបន្តជាមួយនឹងល្បឿននៃការបង្កើតនុយក្លេអ៊ែរនាពេលបច្ចុប្បន្ន។
នៅពេលសួរអំពីជំហររបស់ប្រទេសចិនទាក់ទងនឹងរបាយការណ៍នេះ អ្នកនាំពាក្យមន្ទីរបញ្ចកោណលោក Pat Ryder បាននិយាយថា ការរីកសាយនុយក្លេអ៊ែរកាន់តែច្រើននាំឲ្យមានការព្រួយបារម្ភកាន់តែច្រើន និងនាំមកនូវកត្តាបង្កអស្ថិរភាពដល់តំបន់។ ក្នុងអំឡុងសន្និសីទព័ត៌មាននៅមន្ទីរបញ្ចកោណលោក Ryder បាននិយាយទៅកាន់ក្រុមអ្នកសារព័ត៌មានពីការវាយតម្លៃចុងក្រោយ អធិប្បាយអំពីបញ្ហាប្រឈមរបស់ក្រសួងការពារជាតិ និងលើកឡើងពីទិសដៅយុទ្ធសាស្ត្រយោធារបស់ប្រទេសចិន។ តួលេខនេះបានបញ្ជាក់អំពីការព្រួយបារម្ភរបស់សហរដ្ឋអាមេរិកកាន់តែខ្លាំងឡើង អំពីចេតនារបស់ចិនសម្រាប់ការពង្រីកឃ្លាំងអាវុធនុយក្លេអ៊ែររបស់ខ្លួន ទោះបីជាការព្យាករណ៍ពុំបានបង្ហាញថា ចិនកំពុងពន្លឿនការអភិវឌ្ឍន៍ក្បាលគ្រាប់នុយក្លេអ៊ែរ ដែលលឿនស្រាប់រួចទៅហើយក៏ដោយ។
របាយការណ៍ដែលផ្តោតចម្បងសំខាន់លើសកម្មភាពក្នុងឆ្នាំ២០២១ បាននិយាយថា បច្ចុប្បន្នចិនមានស្តុកទុកក្បាលគ្រាប់នុយក្លេអ៊ែរជាង ៤០០គ្រាប់។ មន្ត្រីរូបនេះបាននិយាយថា ការព្យាករណ៍របស់មន្ទីរបញ្ចកោណសម្រាប់ឃ្លាំងអាវុធស្តុកក្បាលគ្រាប់នុយក្លេអ៊ែររបស់ចិននឹងមានចំនួន ១០០០គ្រាប់នៅឆ្នាំ២០៣០ ដែលនៅតែពុំមានការប្រែប្រួលនោះទេ ដោយបញ្ជាក់ថា ការព្យាករណ៍សម្រាប់ឆ្នាំ២០៣៥ ដោយផ្អែកលើល្បឿននៃការពង្រីកឃ្លាំងអាវុធក៏ពុំមានការប្រែប្រួលដែរ។ ចិននិយាយថា ឃ្លាំងអាវុធរបស់ខ្លួនពុំបានកើនឡើងដូចឃ្លាំងអាវុធរបស់សហរដ្ឋអាមេរិក និងរុស្ស៊ីនោះទេ និងបាននិយាយថា ខ្លួនត្រៀមខ្លួនចូលតុចរចា ប៉ុន្តែលុះត្រាតែក្រុងវ៉ាស៊ីនតោនកាត់បន្ថយឃ្លាំងអាវុធនុយក្លេអ៊ែរឲ្យនៅកម្រិតស្មើនឹងចិន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
