ភ្នំពេញ៖ ក្នុងថ្ងៃខួប៦ឆ្នាំ នៃការដាក់បញ្ចូលចាប៉ីដងវែង​ក្នុងបញ្ជីបេតិកភណ្ឌវប្បធម៌​អរូបីនៃ​មនុស្ស​ជាតិ​របស់អង្គការយូណេស្កូ ​មន្រ្តីជាន់ខ្ពស់នៃក្រសួងវប្បធម៌ ​និងវិចិត្រសិល្បៈ បានជំរុញ​ដល់ភាគីពាក់ព័ន្ធបន្តលើស្ទួយសិល្បៈចាប៉ីដងវែងតាមគ្រប់រូបភាព ។

មានប្រសាសន៍ប្រាប់BTV នៅថ្ងៃទី៣០ ខែវិច្ឆិកានេះ ឯកឧត្តម ឡុង ប៉ុណ្ណាស៊ីរីវត្ថ ​រដ្ឋលេខាធិការ និងជាអ្នកនាំពាក្យក្រសួងវប្បធម៌ ​បាន​ជំរុញ​ដល់សាធារណៈជន ​និងភាគីពាក់ព័ន្ធបន្តលើក​ស្ទួយ​សិល្បៈចាប៉ីដងវែង ​តាមគ្រប់រូបភាព ពោលដូចជា ​ស្ថាប័នរដ្ឋ​ ឫឯកជន ​ពេលរៀបចំកម្មវិធីផ្សេងៗ អាចអញ្ជើញ​អ្នកជំនាញចាប៉ីដងវែង​ ចូលរួមក្នុងវិធី ដើម្បីទទួលបានថវិការជាការលើក​ទឹកដល់​ពួកគាត់។ ក្រៅពីនេះ ​ឯកឧត្តម បានលើកឡើងពីគោលនយោបាយរបស់រាជរដ្ឋាភិបាល ពាក់ព័ន្ធ​នឹងវិស័យវប្បធម៌ សិល្បៈខ្មែរផងដែរ។

លោក ពេជ្រ សារ៉ាត់ ប្រធានសមាគមចាប៉ីអមតៈ បានឲ្យដឹងដែរថា ក្នុងនាមជាពលរដ្ឋខ្មែរមួយរូប​និង​ជាអ្នកបន្តវេនជំនាន់ក្រោយផ្នែកចាប៉ី ពិតជាមានក្តីរំភើបរីករាយ ​ដែលបានចូលរួមថែរក្សា អភិរក្សា ​ផ្សព្វផ្សាយ មរតក​វប្បធម៌​ខ្មែរ ​ដែល​បាន​បន្សល់ទុក​ពីដូនតាជំនាន់មុន។ហើយដើម្បីអបអរខួប៦ឆ្នាំ ​នៃការដាក់​បញ្ចូល​ចាប៉ីដងវែង ក្នុងបញ្ជីបេតិកភណ្ឌវប្បធម៌អរូបី​នៃ​មនុស្សជាតិ​របស់អង្គការយូណេស្កូ ​សមាគមចាប៉ីអមតៈ​ បានរៀបចំពិធីនៅផ្សារទំនើបសូរិយា រាជធានី​ភ្នំពេញ ដោយមានការលេងចាប៉ី និងបង្រៀនចាប៉ីជាដើម។

ចាប៉ីដងវែង​ជាសម្បត្តិបេតិកភណ្ឌដ៏មានតម្លៃ មិនអាចកាត់ថ្លៃបានរបស់ព្រះរាជាណាចក្រកម្ពុជា ត្រូវបាន​ដាក់បញ្ចូលក្នុងបញ្ជីសម្បត្តិបេតិកភណ្ឌវប្បធម៌អរូបីនៃមនុស្សជាតិ ​របស់អង្គការយូណេស្កូ នាថ្ងៃទី៣០ វិច្ឆិកា ២០១៦ ស្ថិតនៅទីក្រុងអាឌីស​ អាបាបា ប្រទេសអេត្យូពី។

គិតត្រឹមថ្ងៃទី៣០ ខែវិច្ឆិកា ឆ្នាំ២០២២ ប្រទេសកម្ពុជា មានសម្បត្តិបេតិកភណ្ឌវប្បធម៌អរូបី​នៃមនុស្ស​ជាតិចំនួន៦​ ដែលបានដាក់បញ្ចូលក្នុងបញ្ជីសម្បត្តិបេតិកភណ្ឌពិភពលោក ​ក្នុងនោះរួមមាន៖របាំព្រះរាជទ្រព្យ ​ល្ខោនស្រមោលស្បែកធំ ​ល្បែងទាញព្រ័ត្រ​ ចាប៉ីដងវែង ​ល្ខោនខោល​វត្តស្វាយ​អណ្ដែត និង គុនល្បុក្កតោ៕ អត្ថបទ៖ទូច សោភ័ណ