ភ្នំពេញ៖ មន្ត្រីជាន់ខ្ពស់ក្រសួងអប់រំ យុវជន និងកីឡា បានឱ្យដឹងថា សហភាពអឺរ៉ុប បានប្រកាស​បន្តគាំទ្រកម្មវិធីអភិវឌ្ឍន៍សមត្ថភាពសិស្សផ្នែកអប់រំបច្ចេកទេស ដើម្បីជួយបង្កើន ពង្រឹង និងលើក​កម្ពស់​កម្លាំងផលិតនៅកម្ពុជាដែលនឹងធ្វើឱ្យកម្ពុជា​ អាចសម្រេច​បាន​នូវ​មហិច្ឆតា​ក្លាយ​ជាប្រទេស ដែល​មានចំណូលមធ្យម​កម្រិត​ខ្ពស់នៅឆ្នាំ២០៣០ ​និង​ក្លាយជាប្រទេសអភិវឌ្ឍន៍នៅឆ្នាំ២០៥០។

ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា តំណាង ឯកអគ្គរដ្ឋទូតសហភាពអឺរ៉ុប ​ប្រចាំកម្ពុជា ​និងដៃគូរពាក់ព័ន្ធមួយចំនួនទៀត ​កាលពីថ្ងៃទី២៩ ខែវិច្ឆិកា ម្សិលមិញ ​បានអញ្ជើញចូលរួមក្នុងពិធីបើកកិច្ចប្រជុំពិភាក្សា ​និងវេទិកា​ពិព័រណ៍​ស្នាដៃសិស្ស ផ្នែកអប់រំ​បច្ចេកទេស​ នៅវិទ្យាល័យ ​ចំណេះទូទៅ ​និងបច្ចេកទេស ហ៊ុន សែន ជម្ពូវ័ន រាជធានីភ្នំពេញ។

ឯកឧត្តមបណ្ឌិតសភាចារ្យ មានប្រសាសាសន៍ថា ​ចាប់ពីឆ្នាំ២០០៣ ​រហូតមកដល់ឆ្នាំនេះ សហភាព​អឺរ៉ុប បាន​រួមចំណែក​ជួយ​អភិវឌ្ឍន៍​វិស័យអប់រំនៅប្រទេសកម្ពុជាជាច្រើន ​ចាប់ពី​កម្រិត​មត្តេយ្យ សិក្សា ​រហូតដល់កម្រិតវិទ្យាល័យ​ រួមមានកម្មវិធីអាហារូបករណ៍​សិស្សក្រីក្រ ការ​កសាង​ហេដ្ឋារចនាសម្ព័ន្ធ រឹង និងទន់ ដល់សាលារៀន ​ការកសាងផែនការអភិវឌ្ឍសាលារៀន (ESP) ការបណ្តុះបណ្តាលសមត្ថ ភាពមន្ត្រីអប់រំថ្នាក់ជាតិ​ និងការកសាងសមត្ថភាពគ្រូបង្រៀន ។ល ។

ឯកឧត្តម បន្តថា ថ្មីៗនេះ EU តាមរយៈ ឯកឧត្តមឯកអគ្គរដ្ឋទូត ​និងតំណាងប្រទេសជាសមាជិកEU នៅ​តែបន្តជួយគាំទ្រ​បន្ថែមទៀត​ដល់កម្មវិធីអភិវឌ្ឍន៍​សមត្ថភាពសិស្សផ្នែកអប់រំបច្ចេកទេស ដើម្បីពង្រឹង និងលើកកម្ពស់គុណភាពផ្នែកអប់រំ​បច្ចេកទេស​នៅ​កម្រិតមធ្យមសិក្សាទុតិយភូមិ នៅ​តាមវិទ្យាល័យចំណេះទូ ទៅនិងបច្ចេកទេស ដើម្បីជួយបង្កើន ពង្រឹង ​និងលើកកម្ពស់កម្លាំង​ផលិត​នៅកម្ពុជា ដែលនឹងធ្វើឱ្យកម្ពុជា ​អាចសម្រេច​បាន​នូវ​មហិច្ឆតា​ក្លាយជាប្រទេស​ដែលមានចំណូល​មធ្យមកម្រិតខ្ពស់នៅឆ្នាំ២០៣០​ និងក្លាយជាប្រទេសអភិវឌ្ឍន៍​នៅឆ្នាំ២០៥០។

បច្ចុប្បន្ន គ្រឹះស្ថានសិក្សា​ ដែលផ្ដល់សេវា​អប់រំ​បច្ចេកទេស​តាមកម្មវិធីអប់រំបច្ចេកទេសកម្រិតមធ្យម សិក្សា (៩+៣) មាន២១​ នៅក្នុងរាជធានី-ខេត្តចំនួន១៨ ​ដែលក្នុងនោះ ​មានវិទ្យាល័យចំណេះទូទៅ និង ​បច្ចេកទេសរដ្ឋ ចំនួន១៤ វិទ្យាល័យចំណេះទូទៅ ​និងបច្ចេកទេសឯកជន ​ចំនួន០៣ និង​តាមសាកលវិទ្យាល័យ និងវិទ្យាស្ថាន​បណ្តុះបណ្តាល​បច្ចេកទេស​មួយចំនួនទៀតផងដែរ៕អត្ថបទ៖ ទូច សោភ័ណ