​ភ្នំពេញ៖ ក្នុងជំនួប​ពិភាក្សា​ការងារ​រវាង​ឯកឧត្តម សោម សុគន្ធ រដ្ឋលេខាធិការ​ប្រចាំការ តំណាង​ដ៏​ខ្ពង់ខ្ពស់​លោកជំទាវ បណ្ឌិតសភា​ចា​រ្យ ភឿង ស​កុ​ណា រដ្ឋ​ម​ន្រី្ត​ក្រសួង​វប្បធម៌ និង​វិចិត្រសិល្បៈ ជាមួយ​អ្នកដឹកនាំ​ប្រតិភូ​អភិបាលក្រុង ប៊ុ​ស្ស៊ី​សាំង​ហ្ស​ក (Bussy saint George’s) លោក ស៊ុន ឆ​វិ​ទ្ធ តំណាងអោយ​សហគម​ខ្មែរ Bussy-77 នៃ​តំបន់​Department de Seine et Marne 77 នៃ​ប្រទេស​បារាំង និង​លោក YANN DUBOSC (​យ៉ាន់ ឌុយ​បូស​) អភិបាលក្រុងប៊ុ​ស្ស៊ី​សាំង​ហ្ស​ក (Bussy saint George’s), នាទី​សី្ត​ការ​ក្រសួង រសៀល​ថ្ងៃទី​៣០ ខែ​វិ​ចិ្ឆ​កា ឆ្នាំ​២០២២​នេះ​។

​លោក YANN DUBOSC (​យ៉ាន់ ឌុយ​បូស​) អភិបាលក្រុង ប៊ុ​ស្ស៊ី​សាំង​ហ្ស​ក បាន​សម្តែង​នូវ​សេចក្តីសោមនស្ស​រីករាយ និង​គោរព​ថ្លែងអំណរគុណ​យ៉ាង​ជ្រាលជ្រៅ​ ចំពោះ ឯកឧត្តម សោម សុគន្ធ ដែល​បាន​អនុញ្ញាតឱ្យ លោក​និង​គណៈប្រតិភូ ចូលជួប​សម្តែង​ការគួរសម និង​ពិភាក្សា​ការងារ ក៏ដូចជា​ជម្រាបជូន​អំពី​កិច្ចការងារ​ដែល​ក្រុង​ប៊ុ​ស្ស៊ី​សាំង​ហ្ស​ក (Bussy saint George’s) នៃ​ប្រទេស​បារាំង កំពុង​គាំទ្រ និង​អនុវត្ត គឺ​កាលពី​ថ្ងៃ​២៩ ខែ​វិ​ចិ្ឆ​កា ឆ្នាំ​២០២២ គណៈប្រតិភូ បាន​ចុះ​កិច្ចព្រមព្រៀង​សហ​ប្រតិ​ប​តិ្ត​ការ​រវាង​ក្រុង​ប៊ុ​ស្ស៊ី​សាំង​ហ្ស​ក នៃ​ប្រទេស​បារាំង និង​រដ្ឋបាលខេត្ត​កំពង់ឆ្នាំង​នៃ​ព្រះរាជាណាចក្រ​កម្ពុជា ក្នុង​គោលបំណង​អនុវត្ត​គ្របដណ្តប់​លើ​រាល់​សកម្មភាព​កិច្ច សហប្រតិបត្តិ​ការអភិវឌ្ឍ​ន៍ និង​វិនិយោគ ក្នុង​តំបន់​ទាំងពីរ (​ក្រុង (Bussy saint George’s និង​ខេត្តកំពង់ឆ្នាំង​) ដោយ​គោរព​នូវ​អធិបតេយ្យភាព និង​ផលប្រយោជន៍​នៃ​គូភាគី និង​គោរព​តាមច្បាប់ និង​បទ​ប្បញ្ញត្តិ​នានា​ជាធរ​មាននៃ​ប្រទេស​ទាំងពីរ​។ ទន្ទឹមនឹងនោះ​អត្ថន័យ​នៃ​កិច្ចព្រមព្រៀង​នេះ គឺ​ផ្តោត​សំខាន់​លើ​ការអប់រំ សិល្បៈ​វប្បធម៌ និង​វិស័យសេដ្ឋកិច្ច សង្គម ដើម្បី​ប្រែក្លាយ​ឲ្យ​ការអភិវឌ្ឍន៍ និង​ការវិនិយោគ​នានា កាន់តែ​ប្រសើរ​ជាមួយគ្នា​។

​ក្នុងជំនួប​ខាងលើនេះ ថ្នាក់ដឹកនាំ​ទាំងពីរ បាន​ពិភាក្សាគ្នា ដោយ​យកចិត្តទុកដាក់ និង​ទទួលបាន​លទ្ធផល​ល្អជា​ច្រើន ដូចជា​៖ កម្ពុជា​-​បារាំង អាច​ផ្លាស់ប្តូរ​វិស័យ​សិល្បៈ​វប្បធម៌ រវាង​ក្រសួង​វប្បធម៌ និង​វិចិត្រសិល្បៈ និង​ក្រុង​ប៊ុ​ស្ស៊ី​សាំង​ហ្ស​ក​។

​លោកអភិបាលក្រុង ប៊ុ​ស្ស៊ី​សាំង​ហ្ស​ក បាន​បន្តទៀតថា សព្វថ្ងៃ​អាជ្ញាធរ​ក្រុង បាន​គាំទ្រ​សមាគម​ខ្មែរ នៅ​ក្រុង​ប៊ុ​ស្ស៊ី​សាំង​ហ្ស​ក ដែល​មកដល់ពេលនេះ​មាន​ជាង​៣៥០០​នាក់​។ ដូច្នេះ​ លោក​មាន​កី្ត​រំភើប​រីករាយ ទើប​មកកាន់​ប្រទេស​កម្ពុជា ដើម្បី​ធ្វើ​កិច្ច​សហ​ប្រតិ​ប​តិ្ត​ការ​ជាមួយគ្នា​បន្តទៀត​។​

​នាឱកាស​នោះ​ឯកឧត្តម សោម សុគន្ធ ក្នុងនាម​លោកជំទាវ រដ្ឋ​ម​ន្រី្ត​ក្រសួង​វប្បធម៌ និង​វិចិត្រសិល្បៈ មាន​សេចក្តី​រីករាយ និង​ធ្វើ​កិច្ច​សហ​ប្រតិ​ប​តិ្ត​កា​រលើ​វិស័យ​សិល្បៈ​វប្បធម៌ និង​រងចាំ​ជួយ​ជានិច្ច និង​សូម​ជូនពរ​លោក YANN DUBOSC (​យ៉ាន់ ឌុយ​បូស​) អភិបាលក្រុង និង​គណៈប្រតិភូ​នៃ​ប្រទេស​បារាំង សូម​មាន​សុខ​ភាពល្អ និង​ទទួលបាន​ជោគជ័យ​ក្នុង​ដំណើរ​ទស្សនកិច្ច​ផ្លូវការ​នេះ​៕​ អត្ថបទ៖ រដ្ឋា​