ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបង្ហើបថា កាលពីពេលថ្មីៗនេះ មាន​កងកម្លាំងរក្សាសន្តិភាពកម្ពុជា ចំនួន៣នាក់ បានរងរបួស​ គ្រាកំពុងបំពេញបេសកកម្មបេសកកម្ម​ថែ​រក្សាសន្តិភាពអង្គការសហប្រជាជាតិ នៅប្រទេសមាលី ។

ការបង្ហើបអំពីដំណឹងនេះ ​បានធ្វើឡើងក្នុងឱកាសសម្តេចអញ្ជើញជាអធិបតីប្រារព្ធខួប១១ឆ្នាំ នៃ​ប្រតិបត្តិការរបស់ក្រុមហ៊ុនមីនេបៀ របស់ជប៉ុន នៅកម្ពុជា នាព្រឹកថ្ងៃទី០១ ខែធ្នូ ឆ្នាំ២០២២នេះ។

សម្តេចតេជោ ​នាយករដ្ឋមន្ត្រី ហ៊ុន សែន ​បានលើកឡើងថា «កងទ័ពយើងក្នុងប៉ុន្មានថ្ងៃមុននេះ របួស៣នាក់ ក្នុងប្រទេសម៉ាលី ដោយសារការដាក់មីនស្កាត់ផ្លូវ ក្នុងពេលដែលកងទ័ព​របស់​យើង​ធ្វើដំណើរ»។

បើតាមការឱ្យដឹងពី មជ្ឈមណ្ឌលជាតិរក្សាសន្តិភាពកម្ពុជា៖ កម្លាំងរក្សាសន្តិភាពកម្ពុជា៣រូប​ដែល​បានរងរបួសដោយរថយន្ត MPV ​ជាន់ផ្ទុះគ្រាប់មីនកែច្នៃ IEDនោះ ទី១.ព្រិន្ទបាលត្រី ពេញ រស្មី តែកុងទ្បាន (មិនទាន់ទទួលបានព័ត៌មានលំអិត ទី២.ព្រិន្ទបាលត្រី ម៉ី គឹមថុង បុគ្គលិកពេទ្យ របួសក្បាល របួសស្រាល និងទី៣.ព្រិន្ទបាលត្រី ម៉ែន ថារ៉ា បុគ្គលិកស្រាវជ្រាវរុករក ថ្លោះ​ចង្កេះ របួសធ្ងន់មិនទាន់កំរើកខ្លួនបាន។

បច្ចុប្បន្ន យោធិនរងគ្រោះត្រូវបានសង្គ្រោះតាម​ឧទ្ធម្ភាគចក្រ​ពីកន្លែងកើត​ហេតុដឹកជញ្ជូន​ទៅ​ព្យាបាលទីបញ្ជាការភូមិភាគខាងលិច​ Sector West (Tumbuktu) ដើម្បីទទួលការព្យាបាល​នៅ​មន្ទីពេទ្យកម្រិត២ នីហ្សេរីយ៉ា។

សូមបញ្ជាក់ថា បច្ចុប្បន្នកងទ័ពមួកខៀវរបស់កម្ពុជា ​ជា៨០០នាក់ កំពុងបំពេញ​បេសកកម្មរក្សា​សន្តិភាពUNស្ថិតនៅប្រទេស៤​ ដែលក្នុងនោះរួមមាន​ប្រទេសលីបង់​ ស៊ូដង់ខាងត្បូង ​ម៉ាលី និង​អាហ្វ្រិកកណ្តាល៕អត្ថបទ៖ ឈ្មោះ ស៊ុម សុខជា