កំពង់ឆ្នាំង ៖ នៅថ្ងៃទី០១ ខែធ្នូ ឆ្នាំ២០២២នេះ ទិវាជនមានពិការភាពកម្ពុជាលើកទី២២ និងទិវាជនពិការអន្តរជាតិលើកទី៣៨ ក្រោមប្រធានបទ ”ពិការភាពទាំងអស់ មិនអាចកំណត់ដោយការមើលនឹងភ្នែកនោះទេ» ត្រូវបានប្រារព្វឡើងនៅសួនសម្តេចចៅហ្វាវាំងស្ថិតក្នុងសង្កាត់ប្អេរ ក្រុងកំពង់ឆ្នាំង និងមានការចូលរួមពីលោក ឈៀង ចន្ធី ប្រធានមន្ទីរសង្គមកិច្ច យុវនិតិសម្បទា និងអតីតយុទ្ធជនខេត្ត រួមនិងថ្នាក់ដឹកនាំតាមមន្ទីរនានាផងដែរ ។

លោកស្រី អុំ អមរារ័ត្ន ប្រធានអង្គការសាអូរី បានថ្លែងថា៖ អង្គការសាអូរី ចង់អោយជនមានពិការភាពអាចមានឱកាស​ទទួលបាននូវ​ជំនាញពិតប្រាកដ ដើម្បីមានលទ្ធភាពទទួលបាននូវការងារ និងប្រាក់ចំណូលសមរម្យ ព្រមទាំងរស់នៅដោយសេចក្ដីថ្លៃថ្នូរ។ បេសកកម្មផ្តល់នូវជំនាញវិជ្ជាជីវៈ និងមុខរបរសមរម្យដើម្បីបង្កើនប្រាក់ចំណូល ធ្វើយ៉ាងណាឲ្យជីវភាព របស់ពួកគាត់​បាន​ប្រសើរឡើងតាមរយៈតម្បាញសាអូរី។ គុណតម្លៃគឺគោរពរាល់សេចក្ដីសម្រេចចិត្តរបស់ជនមានពិការភាព ព្រមទាំងផ្តល់ឱកាស ជំរុញការអភិវឌ្ឍសមត្ថភាព និងសក្តានុពលរបស់ជនមានពិការភាព។ គោលដៅលើកកម្ពស់ និងអភិវឌ្ឍន៍សេដ្ឋកិច្​ចដល់ជន​មានពិការភាពគ្រប់រូបភាពតាមយៈការធ្វើសមាហរណកម្មជនមានពិការភាពទៅក្នុងការបណ្តុះបណ្តាលវិជ្ជាជីវៈ។ ផែនការសកម្មភាពរបស់អង្គការសាអូរី បានខិតខំបំពេញតួនាទីរបស់ខ្លួន យ៉ាងយកចិត្តទុកដាក់ក្រោមគម្រោង «ការលើកកម្ពស់​សមភាពយេនឌ័រ និងសមត្ថភាពរបស់ស្ត្រីមានពិការភាព»ដែលបានទទួលការគាំទ្រពីមូលនិធិវ៉យ អ៊ុកស្វាមកម្ពុជា និងគម្រោង “ ការបណ្តុះបណ្តាលវិជ្ជាជីវ:តាមេយ:តម្បាញដោយដៃសាអូរី »។

​លោក ឈៀង ចន្ធី ប្រធានមន្ទីរសង្គមកិច្ច យុវនិតិសម្បទា និងអតីយុទ្ធជន បានសំណេះសំណាលសាកសួរ​សុខទុក្ខបងប្អូនជនពិការ​ទាំងអស់ដែលបានអញ្ជើញចូលរួមក្នុងពិធីនេះ។ លោកបានមានថ្លែងថា ព្រះរាជាណាចក្រកម្ពុជា ប្រារព្ធទិវាជនពិការកម្ពុជា​លើកទី២៤នេះឡើង គឺដើម្បីរំលឹកគុណូបការដល់វិរជនស្នេហាជាតិ ដែលបានលះបង់សាច់ស្រស់ឈាមស្រស់ដើម្បីជាតិមាតុភូមិ និងប្រជាជនកម្ពុជា ក្នុងរបបប្រល័យពូជសាសន៍ ដែលបានបន្សល់ទុកនូវផលវិបាកជាច្រើន ក្នុងនោះរួមមាន ស្រ្តីមេម៉ាយ កុមារកំព្រា ជនពិការ ព្រមទាំងគ្រាប់មីន និងកាកសំណល់ជាតិផ្ទុះសល់ពីសង្គ្រាមផងដែរ៕ អត្ថបទ ៖ ហុង វាស្នា