ភ្នំពេញ៖ ឯកឧត្តមទេស រដ្ឋមន្រ្តី សុន គន្ធរ រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានសភាមុខរបរ និងមីក្រូសហគ្រាសកម្ពុជា មានប្រសាសន៍ថា បដិវត្តន៍ឧស្សាហកម្មទី៤ កំពុងមានឥទ្ធិពលយ៉ាងខ្លាំងសម្រាប់ ប្រជាជន និងមីក្រូសហគ្រាស ក៏ដូចជា​ការ​ប្រកួតប្រជែង​សេដ្ឋកិច្ច ​និងពាណិជ្ជកម្មជាតិ ​និងអន្តរជាតិ ដូច្នេះបើមិនមានការត្រៀមខ្លួនឲ្យបានគ្រប់ជ្រុង​ជ្រោយ​ជាមុនសម្រាប់ទទួលយក​ និងក្តាប់ការអនុវត្តភាពនាំមកដោយបដិវត្តន៍ថ្មីនេះ មីក្រូសហគ្រាស អាចជួបនឹងការខាតបង់ផលប្រយោជន៍យ៉ាងច្រើន។

ឯកឧត្តមទេស រដ្ឋមន្រ្តី សុន គន្ធរ រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានសភាមុខរបរ និងមីក្រូសហគ្រាសកម្ពុជា រួមជាមួយលោកជំទាវឧញ៉ា ទេព កូលាប ​សាកលវិទ្យាធិការ​នៃ​សាកលវិទ្យាល័យភ្នំពេញអន្តរជាតិ ​និងលោកឧកញ៉ាវេជ្ជបណ្ឌិត គួច ម៉េលី ស្ថាបនិកក្រុម​ប្រឹក្សាភិបាល នៃក្រុមហ៊ុនម៉េងលី ជេ នៅថ្ងៃទី១ខែធ្នូនេះ បានអញ្ជើញចូលរួមជាវាគ្មិនចែករំលែក​ចំណេះ​ដឹងក្នុងសិក្ខាសាលាស្តីពីអ្នកចាប់ផ្តើមអាជីវកម្មដំបូងត្រូវយល់ដឹងពីអ្វីខ្លះ? សិក្ខាសាលានេះ រៀបចំដោយសភាមុខរបរ និងមីក្រូសហគ្រាសកម្ពុជា ធ្វើឡើងនៅសាកលវិទ្យាល័យភ្នំពេញអន្តរជាតិ។

ឯកឧត្តម សុន គន្ធរ បានបញ្ជាក់ថា ឋិតក្នុងយុគសម័យ នៃចរន្តសកលភាវូពាណិជ្ជកម្ម និង​សមាហរណកម្មសេដ្ឋកិច្ចក្នុងតំបន់ និងពិភពលោក ព្រមទាំងការបង្កើតឡើងនូវតំបន់ពាណិជ្ជកម្ម​សេរី (FTA) សភាមុខរបរ ​និងមីក្រូសហគ្រាសកម្ពុជា ​មានភារកិច្ចជួយជំរុញ និងលើកទឹក​ចិត្ត​ដល់អាជីវករអាជីព និងមីក្រូសហគ្រិន ក្នុងផ្នែកផលិតកម្ម ​និងសេវាកម្ម ដោយប្រើប្រាស់វត្ថុធាតុ​ដើមក្នុងស្រុកជាចម្បង ​គួបផ្សំនឹងបច្ចេកវិទ្យាទំនើបៗ ​និងយុទ្ធសាស្ត្រពាណិជ្ជកម្មអេឡិចត្រូនិក ដើម្បីចូលរួមប្រកួតប្រជែង ​និងទទួលបានទីផ្សារ​ ទាំងនៅក្នុងតំបន់ និងពិភពលោក។

និស្សិត ដែលបានចូលរួមក្នុងសិក្ខាសាលា បានលើកឡើងថា បន្ទាប់ពីបានស្តាប់វាគ្មិនចែក​រំលែក​ចំណេះ​ដឹងនាពេលនេះ ​ គឺទទួលបានបទពិសោធន៍ជាច្រើន ​ទាក់ទងនឹងការប្រកបអាជីវកម្ម ។

កន្លងទៅ សភាមុខរបរ និងមីក្រូសហគ្រាសកម្ពុជា បានរៀបចំសិក្ខាសាលាជាច្រើនលើករួចមក​ហើយ ​ដោយមានវាគ្មិនជាសហគ្រិន ​ដែលមានបទពិសោធន៍ ​ពីវិស័យឯកជន និងវាគ្មិន​តំណាង​ក្រសួង ស្ថាប័នផ្សេងៗជាច្រើនទៀត ​ដើម្បីបកស្រាយចម្ងល់ទាក់ទងនឹងច្បាប់ ​ការចុះបញ្ជីក្រុមហ៊ុន និង​ប្រតិបត្តិការអាជីវកម្មមីក្រូ និងធុនតូច ៕អត្ថបទ៖ ទូច សោភ័ណ