ភ្នំពេញ ៖ ឯកឧត្តម សាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត នៃក្រសួងសុខាភិបាល ព្រឹកថ្ងៃទី១ ខែធ្នូ ឆ្នាំ២០២២នេះ បានអញ្ជើញបើកវគ្គបណ្តុះបណ្តាលគ្រូបង្គោល ស្តីពីជំនាញវះកាត់ចោះ ដោយអ្នកជំនាញ មកពីសាកលវិទ្យាល័យ យូតាស សហរដ្ឋអាមេរិក។

​ក្នុងពិធីបើកវគ្គបណ្តុះបណ្តាលខាងលើនេះ មានការចូលរួមពីសំណាក់ ឯកឧត្តមសាស្ត្រាចារ្យ សាផុន វឌ្ឍនៈ សាកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល, លោក ស៊ា សំណាង ប្រធានសមាគមនិកាយ សាសនា ចក្រ នៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ, Dr. Raymond Priceស្ថាបនិកនិង ជានាយក នៃមជ្ឈម ណ្ឌល វះកាត់សកល។

បើតាមឯកឧត្តម សាស្រ្តាចារ្យ ឡឹម តារា អគ្គនាយករងមនី្ទរពេទ្យកាល់ម៉ែត បានឲ្យដឹងថា វគ្គបណ្តុះបណ្តាល បន្តបន្ថែមបច្ចេកទេសជំនាញ នៃការវៈកាត់ចោះ ដែលជាការវៈកាត់តូច និងមានសារៈសំខាន់ ដែលធ្វើឲ្យ អ្នកជំងឺ ពុំសូវមានការឈឺចាប់ និងឆាប់ជាសៈស្បើយ។

​ឯកឧត្តម សាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត បានកោតសរសើរ និងអរគុណដ៏ជ្រាលជ្រៅ បំផុតចំពោះសមាគមនិកាយសាសនាចក្រ នៃព្រះយេស៊ូវ គ្រីស្ទនៃពួកបរិសុទ្ធថ្ងៃចុងក្រោយដែលបានខិតខំប្រឹងប្រែង ក្នុងការឧបត្ថម្ភគាំទ្របេសកកម្មបង្កើត សកម្មភាពសហ ប្រតិបត្តិការក្នុងវិស័យអប់រំបណ្តុះបណ្តាលជំនាញវិជ្ជាជីវៈ និង ផ្លាស់ ប្តូរបទពិសោធន៍ដល់គ្រូពេទ្យ តាមរយៈការ បញ្ជូន ក្រុម សាស្ត្រាចារ្យ និងវេជ្ជបណ្ឌិតឯកទេស នៃសាកល វិទ្យាល័យ យូតាស(Utah) សហរដ្ឋអាមេរិក មកធ្វើការបណ្តុះ បណ្តាលដល់គ្រូបង្គោល និងរៀបចំបង្កើតជាមជ្ឈមណ្ឌល ឧត្តមភាព សម្រាប់ការបណ្តុះបណ្តាល Laparoscopy នៅមន្ទីរពេទ្យកាល់ម៉ែត។

ឯកឧត្តម សាស្រ្តាចារ្យ ឈាង រ៉ា បានបញ្ជាក់ទៀតថា មន្ទីរពេទ្យកាល់ម៉ែត បានប្រើប្រាស់ ជំនាញវះកាត់ចោះនេះ ក្នុងបច្ចេកទេសវះកាត់ជូនអ្នកជំងឺ ចាប់តាំងពីឆ្នាំ១៩៩៩ មករហូតដល់បច្ចុប្បន្ន ហើយសង្ឃឹមថា តាមរយៈ ការជួយ ពង្រឹង លើជំនាញនិងការផ្លាស់ប្តូរបទពិសោធន៍ជាមួយវេជ្ជបណ្ឌិតឯកទេស នៃសាកលវិទ្យាល័យយូតាស(Utah) នឹង បង្កើន សមត្ថភាពបន្ថែមកាន់តែល្អប្រសើរដល់វេជ្ជបណ្ឌិតឯកទេសមន្ទីរពេទ្យកាល់ម៉ែត និស្សិតDES មកពី សាកល វិទ្យា ល័យវិទ្យាសាស្ត្រសុខាភិបាល សំដៅពង្រីកវិសាលភាពបច្ចេកទេសវះកាត់ចោះ នៅតាមមន្ទីរពេទ្យទូទាំងប្រទេសកម្ពុជា ដែលពិតជាមានសារៈសំខាន់យ៉ាងធំធេងក្នុងការរួមចំណែកអភិវឌ្ឍន៍វិស័យសុខាភិបាល ស្របតាមគោល នយោបាយ របស់រាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចកាលសម្តេច តែងតែយកចិត្ដទុកដាក់គិតគូរ ជួយឧបត្ថម្ភគាំទ្រ និងផ្ដល់អាទិភាពដល់វិស័យសុខាភិបាល៕ អត្ថបទ ៖ រដ្ឋា