ភ្នំពេញ៖ សម្ដេចវិបុលសេនាភក្តី សាយ ឈុំ ប្រធានព្រឹទ្ធសភាជាតិ បានថ្លែងទៅកាន់គណៈប្រតិ ភូផ្នែកនយោបាយ នៃសភាប្រើភាសាបារាំងថា (APF) រដ្ឋសភា និងរាជរដ្ឋាភិបាលកម្ពុជាបានបើកជំហរជានិច្ច ចំពោះមិត្តភក្តិបរទេស ឬដៃគូអន្តរជាតិទាំងអស់ អាចស្វែងយល់នយោបាយ និងការអនុវត្តលទ្ធិប្រជាធិបតេយ្យរបស់កម្ពុជា ។

ក្នុងជំនួបជាមួយ ឯកឧត្តម Christophe-André Frassa ប្រធានគណៈកម្មការនយោបាយនៃសភាប្រើភាសាបារាំង នៅថ្ងៃទី១ ខែធ្នូ ឆ្នាំ២០២២ សម្ដេចវិបុលសេនាភក្តី មានប្រសាសន៍ថា លំហប្រជាធិបតេយ្យ សិទ្ធិសេរីភាពបញ្ចេញមតិ សិទ្ធិធ្វើនយោបាយ សិទ្ធិក្នុងការជួបជុំរបស់ប្រជាពលរដ្ឋ គណបក្សនយោបាយ អង្គការសារព័ត៌មាន អង្គការសង្គមស៊ីវិល បាននឹងកំពុងដំណើរការដោយសេរី គ្មានការរើសអើង និងគ្មានការគំរាមកំហែង នៅក្នុងប្រទេសកម្ពុជា ។

សម្ដេចបន្តថា ចាប់តាំងពីឆ្នាំ១៩៩៣ កម្ពុជាអនុវត្តការបោះឆ្នោតយ៉ាងទៀងទាត់តាមពេលវេលាកំណត់ ដូចមានចែងក្នុងរដ្ឋធម្មនុញ្ញ និងច្បាប់ជាធរមាន ។ កាលពីការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥កន្លងទៅ បានប្រព្រឹត្តទៅដោយសេរី ត្រឹមត្រូវ យុត្តិធម៌ គ្មានការគំរាមកំហែង គ្មានអំពើហិង្សា ដែលទាំងអស់គ្នាទទួលយកបាន និងមានអ្នកសង្កេតការណ៍ជាតិ និងអន្តរជាតិ ចូលរួមគ្រប់ដំណាក់កាលមុនបោះឆ្នោត អំឡុងពេលបោះឆ្នោត និងក្រោយការបោះឆ្នោត ។

សម្ដេចប្រធានព្រឹទ្ធសភា បានបន្ថែមថា សភាកម្ពុជា និងរាជរដ្ឋាភិបាលកម្ពុជា ផ្តល់សារៈសំខាន់ធ្វើកិច្ចសហប្រតិបត្តិការ ដោយបើកចំហរជាមួយមិត្តភក្តិបរទេស និងដៃគូអន្តរជាតិទាំងអស់ ដែលចង់ឈ្វេងយល់អំពីស្ថានភាពនយោបាយ លទ្ធិប្រជាធិបតេយ្យ ការគោរពសិទ្ធិមនុស្ស និងការបញ្ចេញមតិនៅកម្ពុជា ។

ក្នុងជំនួបនោះ ឯកឧត្តម Christophe-André Frassa លើកឡើងថា ក្នុងដំណើរទស្សនកិច្ចនៅកម្ពុជា មានគោលបំណងស្វែងយល់​អំពីការវិវឌ្ឍជាវិជ្ជមាន នៃប្រទេសកម្ពុជា ក្នុងក្របខ័ណ្ឌសភាប្រើភាសាបារាំង ។ ជាមួយគ្នានេះ ឯកឧត្តមបានវាយតម្លៃខ្ពស់ ចំពោះទំនាក់ទំនង និងកិច្ចសហប្រតិបត្តិការយ៉ាងជិតស្និទ្ធរវាងប្រទេសកម្ពុជា ជាមួយប្រទេសប្រើភាសាបារាំង ។

សម្តេចប្រធានព្រឹទ្ធសភា បានគូសបញ្ជាក់ថា សភាកម្ពុជាបានដើរតួនាទីដ៏សកម្មក្នុងវេទិកាសភានិយាយ ភាសាបារាំងនៅក្នុងតំបន់ និងសកលលោក ។ សហប្រតិបត្តិការល្អរវាងសភាកម្ពុជា និងហ្រ្វង់កូហ្វូនី បានប្រព្រឹត្តទៅដោយរលូនលើគ្រប់យន្តការទាំងអស់ នៃAPF ព្រមទាំងកិច្ចសហប្រតិបត្តិការបច្ចេកទេស ៕ អត្ថបទ បាន សុខរិទ្ធិ