ភ្នំពេញ៖ ការដោះស្រាយបញ្ហាប្រេងឆៅចំនួនជិត ៣០ម៉ឺនប៉ារែល ដែលកម្ពុជាទទួលបាន ៧០% នៃចំណូលសរុប នៅក្នុងការបែងចែកនោះ បច្ចុប្បន្នថវិកានេះ រាជរដ្ឋាភិបាលបានទទួលរួចហើយ ក្នុងទំហំទឹកប្រាក់ប្រមាណ ១៤លានដុល្លារអាមេរិក។

ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល លើកឡើងនៅក្នុង ពិធីសំណេះសំណាលជាមួយនិវត្តជន នៃក្រសួងរ៉ែនិងថាមពល នៅថ្ងៃទី៣០ ខែវិច្ឆិកា ឆ្នាំ២០២២នេះថា ការដោះស្រាយបញ្ចប់រឿងករណីប្រេងឆៅ ដែលត្រូវបាននាវា MT Strovolos ដឹកចេញពីកម្ពុជា ឆៅចំនួនជិត ៣០ម៉ឺនប៉ារែល ត្រូវបានដោះស្រាយរួចរាល់ ទៅតាមកិច្ចព្រមព្រៀង កាលពីថ្ងៃទី១០ ខែកញ្ញា កន្លងមកនេះ ដោយក្នុងនោះកម្ពុជាត្រូវទទួលបានចំណែកពីការបែងចែកនោះ មកដល់ពេលនេះត្រូវបានបញ្ចប់ទាំងស្រុង។

ចំណែកថវិកាដែលបានដោះស្រាយ ដែលជាចំណែកទទួលបានប្រមាណ ៧០%នោះ កម្ពុជាទទួលបានរួចថវិកានេះរួចរាល់ហើយ ក្នុងចំនួនប្រមាណ ១៤លានដុល្លារសហរដ្ឋអាមេរិក ក្នុងនោះ បើសរុបទាំងប្រាក់តម្កល់សម្រាប់ការធ្វើអាជីវកម្ម របស់ក្រុមហ៊ុន KrisEnergy ចំនួនប្រមាណ ៥ លានដុល្លារបន្ថែមទៀត សរុបទាំងអស់មានចំនួន ២៩លានដុល្លារសហរដ្ឋអាមេរិក មកដល់បច្ចុប្បន្នថវិកានេះ បានដាក់ចូលធនាគារជាតិនៃកម្ពុជារួចរាល់។

ឯកឧត្តម រដ្ឋមន្រ្តី បន្ថែមឲ្យដឹងថា ចំពោះប្លុកដែលក្រសួងដកអាជ្ញាប័ណ្ណ ពីក្រុមហ៊ុន KrisEnergy បច្ចុប្បន្នក្រសួងកំពុងស្វែងរកដៃគូវិនិយោគបន្ត ក្នុងនោះមានក្រុមហ៊ុនមួយចំនួន បានចាប់អារម្មណ៍លើការនិយោគលើប្លុកទាំងនោះបន្តផងដែរ។ ចំណែកតំបន់ប្រេង OCA ត្រួតគ្នាជាមួយប្រទេសថៃវិញ បច្ចុប្បន្នក្រសួងកំពុងរៀបចំមន្រ្តីជំនាញទាក់ទងគ្នា ក្នុងដំណើរការចរចាររវាងប្រទេសទាំងពីរផងដែរ៕ អត្ថបទ៖ សុន រ៉ាឌី