ភ្នំពេញ៖ រដ្ឋាភិបាល នៃចក្រភពអង់គ្លេស បាន​ចាប់ផ្តើមដាក់សេនានុព័ន្ធយោធា​របស់ខ្លួនជាលើកដំបូងប្រចាំ​នៅព្រះរាជាណាចក្រ​កម្ពុជា ប៉ុន្តែ មាននិវេសដ្ឋាននៅប្រទេសសិង្ហបុរី ខណៈការផ្តើមដាក់សេនានុពន្ធនេះ គឺដើម្បីពង្រឹងកិច្ចសហប្រតិបត្តិការ ផ្នែកយោធារវាងកម្ពុជា និងអង់គ្លេសឲ្យកាន់តែមានភាពរីកចំរើនបន្ថែមទៀត។

បន្ទាប់ពីចាប់ផ្តើមដាក់សេនានុព័ន្ធប្រចាំនៅកម្ពុជា កាលពីខែតុលា ឆ្នាំ២០២២កន្លងទៅថ្មីៗនេះ នៅរសៀលថ្ងៃទី១ ខែធ្នូ ឆ្នាំ២០២២នេះ លោកវរសេនីយ៍ឯក JAMIE MURRAY ដែលជាសេនានុព័ន្ធ នៃចក្រភពអង់គ្លេស​ប្រចាំកម្ពុជានោះ បានជួបពិភាក្សាការងារមួយចំនួន ជាមួយឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក ដោយកិច្ចជំនួបនោះភាគីទាំងពីរ បានពិភាក្សាគ្នាជាច្រើនលើវិស័យយោធា។

ថ្លែងនៅក្នុងជំនួបនេះ ឧត្តមសេនីយ៍ឯក ហ៊ុន ម៉ាណែត បានសម្តែងនូវការពេញចិត្តចំពោះការតែងតាំងសេនានុព័ន្ធ នៃចក្រភពអង់គ្លេសប្រចាំនៅកម្ពុជា ជាលើកដំបូងក្នុងរយៈពេលជាង ៥០ឆ្នាំកន្លងមកនេះ ដែលពិតជាបានឆ្លុះបញ្ចាំងអំពីឆន្ទៈ និងចក្ខុវិស័យរបស់ចក្រភពអង់គ្លេស ក្នុងការពង្រីកទំនាក់ទំនង រវាងប្រទេសទាំងពីរលើវិស័យការពារជាតិ។

ឆ្លៀតឱកាសនោះផងដែរ លោកឧត្តមសេនីយ៍ ក៏បានថ្លែងអំណរគុណចំពោះរាជរដ្ឋាភិបាល និងប្រជាជនអង់គ្លេស ដែលបានជួយឧបត្ថម្ភគាំទ្រកម្ពុជា ក្នុងដំណាក់កាលស្វែងរកសន្តិភាពនាទសវត្សរ៍ឆ្នាំ១៩៩០ និងបន្តរហូតមកដល់បច្ចុប្បន្ន ជាពិសេសក្នុងវិស័យពាណិជ្ជកម្ម, អប់រំ, ការបោសសម្អាតមីន និងការប្រយុទ្ធក្នុងជំងឺកូវីដ-១៩ ជាដើម។

ថ្លែងនៅក្នុងកិច្ចជំនួបនោះដែរ លោកសេនានុព័ន្ធអង់គ្លេស បានសម្តែងនូវក្តីរីករាយប្រកបដោយកិត្តិយស ដែលទទួលបានការតែងតាំងឱ្យបំពេញការងារការទូតយោធានៅកម្ពុជា ហើយលោកក៏បានបង្ហាញនូវក្តីសង្ឃឹមថា ជាមួយនឹងបទពិសោធន៍ការងារជាយូរឆ្នាំដែលលោកមាននៅក្នុងតំបន់អាស៊ីអាគ្នេយ៍ លោកនឹងខិតខំប្រឹងប្រែងធ្វើយ៉ាងណាបង្កើនទំនាក់ទំនងកិច្ចសហប្រតិបត្តិការរវាងកងទ័ពនៃប្រទេសទាំងពីរឱ្យបានជិតស្និទ្ធ និងមានចីរភាពទៅមុខបន្ថែមទៀតផងដែរ៕អត្ថបទ៖ បាន ចក់​