​បាល់ទាត់៖ ​លោក Hansi Flick គ្រូ​បង្វឹក​ក្រុម Bayern Munich បាន​ឲ្យ​ដឹង​ថា លោក​បាន​ស្នើ​សុំ​ទៅ​ក្លិប​ថា ​ចង់​ចាកចេញនៅ​ដំណាច់​រដូវ​កាល​នេះ​។ ​លោក Flick ដែល​មាន​កិច្ចសន្យា​រហូតដល់​ឆ្នាំ២០២៣ បាន​ឲ្យ​អ្នកសារព័ត៌មាន​ដឹង​បែបនេះ​កាលពី​ចុង​សប្ដាហ៍​កន្លងទៅ​ ក្រោយ​ការប្រកួត​ក្រប​ខណ្ឌ Bundesliga ដែល Bayern Munich យកឈ្នះ Wolfsburg ឡើង​នាំ​មុខដាច់ ក្នុង​តារាង​ដល់ ៧​ពិន្ទុ​។

​​ការ​សំរេច​ចិត្ត​ពី​អនាគត​របស់​លោក Hansi Flick គឺ​តាំងពី​ពេល Bayern Munich ធ្លាក់​ពី Champions League ក្រោម​ថ្វី​ជើង Paris Saint Germain សប្ដាហ៍​មុន​។ ​Flick ក៏បាន​ក្លាយ​ជា​បេក្ខជន​នាំ​មុខ​គេ​ ក្នុង​ការ​បន្ត​តំណែង​ដឹកនាំ​ក្រុម​ជម្រើស​ជាតិ​អាល្លឺម៉ង់ ​នៅ​ពេល​ដែល Joachim Low លាឈប់​បន្ទាប់ពី Euro ឆ្នាំនេះ​។ ​លោក Hansi Flick ដែល​ធ្លាប់​ជា​ជំនួយការ​លោក Joachim Low ដែរ​នោះ បាន​និយាយ​ក្រោយ​ចប់​ការ​ប្រកួត​ជាមួយ PSG ថា អនាគត​របស់​លោក​នៅ​ស្ថិត​ក្នុង​ការពិចារណា​នៅឡើយ​។

​​អតីត​កីឡាករ​ឆ្នើម​របស់​ក្លិប Bayern Munich លោក Lothar Matthaus ក៏បាន​បង្ហើប​ដែរ​ថា សហព័ន្ធ​កីឡាបាល់ទាត់​អាល្លឺម៉ង់ និង​លោក Hansi Flick ធ្លាប់​បាន​ជជែក​គ្នា​តាម​ទូរស័ព្ទ ខណៈ​គ្រូ​បង្វឹក​វ័យ ៥៦​ឆ្នាំ​រូប​នេះ​ ត្រូវ​បាន​សហព័ន្ធ​បាល់ទាត់​អាល្លឺម៉ង់​ចាត់ទុកជា​ជំរើស​ទី​១ ដែល​មក​ជំនួស​លោក Joachim Low​។ ​លោក Lothar Matthaus ដដែល​ក៏បាន​លើកឡើង​ដែរ​ថា អ្នកចាត់ការ Leipzig បច្ចុប្បន្ន​លោក Julian Nagelsmann ក៏បាន​ក្លាយ​ជា​ជំរើស​ទី​១ ដែរ ​ប្រសិន​លោក Hansi Flick ចាក​ចេញ​មែន​នោះ​៕

​​អត្ថបទ​៖​នាង សុភា​វុ​ធ