ភ្នំពេញ ៖ នាព្រឹកថ្ងៃទី១៩ មេសា នេះ រដ្ឋាភិបាលនៃសាធារណៈរដ្ឋកូរ៉េ បាន​ផ្តល់សម្ភារៈបរិក្ខាពេទ្យ ដល់​ក្រសួងសុខាភិបាល តាមរយៈកម្មវិធីប្រយុទ្ធប្រឆាំង​ជំងឺកូវីដ19។

ការផ្តល់ជំនួយនេះត្រូវបានធ្វើឡើងតាមរយៈទីភ្នាក់ងារសហប្រតិបត្តិការអន្តរជាតិកូរ៉េ (KOICA) ក្នុងគោលបំណងដើម្បីជួយក្រសួង​សុខាភិបាលក្នុងការ​ប្រយុទ្ធប្រឆាំង​​ជំងឺកូវីដ19នៅក្នុងប្រទេសកម្ពុជា។

សម្ភារៈបរិក្ខាពេទ្យដែលផ្តល់ឲ្យនៅពេលនេះរួមមាន RNA ExtractionKits ចំនួន18,750 SD Biosensor ចំនួន14,400 សំលីដើម្បីធ្វើការប្រមូល​យក​សំណាក​ (swap) ចំនួន42,000 និងសំភារៈមួយចំនួនទៀត​ដើម្បីចាំបាច់សម្រាប់​ប្រើប្រាស់​ក្នុងបន្ទប់ពិសោធន៍​ ដើម្បីពិនិត្យរកមេរោគកូវីដ19 ដែលមានទឹកប្រាក់​សរុប​ប្រមាណជា350,000ដុល្លារអាមេរិក។ សម្ភារៈបរិក្ខាពេទ្យទាំងនេះ នឹងត្រូវបានប្រើប្រាស់​ដោយមន្ទីពិសោធន៍ជាតិ​នៃវិទ្យាស្ថានជាតិសុខភាព​សាធារណៈ ដើម្បីពិនិត្យរកមេរោគកូវីដ19។