ភ្នំពេញ៖ អាជ្ញាធរប៉ុស្តិ៍នគរបាលរដ្ឋបាលវាលវង់ នៃអធិការដ្ឋាននគរបាលខណ្ឌ៧មករា ក្រោយ​ទទួល​បានបទបញ្ជាពីថ្នាក់ដឹកនាំ​ បានចុះយុទ្ធនាការធ្វើ​អត្តសញ្ញាណប័ណ្ណ​ជូន​ដល់ពលរដ្ឋ​ដែលរស់​នៅក្នុងមូលដ្ឋានតាមខ្នងផ្ទះ។

ជាក់ស្ដែងនៅព្រឹកថ្ងៃទី ០២ ខែធ្នូឆ្នាំ ២០២២ នេះ កម្លាំងនគរបាលប៉ុស្តិ៍នគរបាលរដ្ឋបាល ដឹកនាំ​ដោយលោកវរៈសេនីយ៍ទោ ក្រេត សិខរីន អធិការរងទទួលដឹកនាំពង្រីងប៉ុស្តិ៍រដ្ឋបាលវាលវង់ និង វរៈសេនីយ៍ត្រី អ៊ិន ភារម្យ នាយនគរបាលប៉ុស្តិ៍រដ្ឋបាលវាលវង់ ចុះថតនឹងធ្វើអត្តសញ្ញាណប័ណ្ណ​ជូន​ពលរដ្ឋដែលរស់នៅតំបន់បុរីកីឡា ដែលបងប្អូនពលរដ្ឋមួយចំនួន​អត្តសញ្ញាណប័ណ្ណហួស​សុពលភាព​និង​បងប្អូនមួយចំនួនមានកូនគ្រប់អាយុដែលត្រូវធ្វើអត្តសញ្ញាណប័ណ្ណ។

គួរបញ្ជាក់ផងដែរ ​កាលពីព្រឹកថ្ងៃទី៣០ ​ខែវិច្ឆិកា ឆ្នាំ ២០២២ ​លោកឧត្តមសេនីយ៍ឯក ស ថេត អគ្គ​ស្នងការរង និងជាស្នងការនគរបាលរាជធានីភ្នំពេញ ​បានបើកកិច្ចប្រជុំ ស្តីពីការត្រួតពិនិត្យ និង​ជំរុញ​បន្ថែមក្នុងការផ្សព្វផ្សាយ ​ដើម្បីពន្លឿនក្នុងការធ្វើអត្តសញ្ញាណប័ណ្ណសញ្ជាតិខ្មែរប្រភេទថ្មី ជូនដល់​ប្រជាពលរដ្ឋទាំង ២ភេទ ​ដែលគ្រប់អាយុ ១៥ឆ្នាំ ​និងសម្រាប់ប្រជាពលរដ្ឋ ដែលមាន​អត្តសញ្ញាណ​ប័ណ្ណហួសសុពលភាព​ និងសល់សុពលភាពត្រឹម ​៩០ថ្ងៃហួសសុពលភាព។

ក្នុងកិច្ចប្រជុំ ​លោកឧត្តមសេនីយ៍ឯក ស ថេត អគ្គស្នងការរង ​និងជាស្នងការនគរបាលរាជធានី​ភ្នំពេញ ​បានណែនាំដល់ការិយាល័យអត្តសញ្ញាណប័ណ្ណសញ្ជាតិខ្មែរ និងអធិការដ្ឋាននគរបាល​ខណ្ឌ​ទាំង ១៤ ព្រមទាំងប៉ុស្តិ៍នគរបាលរដ្ឋបាលទាំង​ ១០៥ ​ត្រូវចាប់ផ្ដើមចុះរៀបចំ​និង​ចុះ​ធ្វើ​អត្តសញ្ញាណ​ប័ណ្ណ​សញ្ជាតិខ្មែរ ​ដល់តាមភូមិ ​និងតាមខ្នងផ្ទះរបស់ប្រជាពលរដ្ឋ៕អត្ថបទ៖ កុម្ភៈ