ភ្នំពេញ៖ ប្រជាពលរដ្ឋខ្មែរ ​ដែលកំពុងរស់នៅ និងសិក្សានៅតំបន់អឺរ៉ុបជាច្រើននាក់​បានកំពុង​ត្រៀម​ខ្លួនរួចជា ស្រេចក្នុងការទទួល​បដិសណ្ឋារកិច្ច​ដំណើរទស្សនកិច្ចរបស់សម្តេចតេជោ​ ហ៊ុន សែន នាយករដ្ឋមន្រ្តី នៃកម្ពុជា និងជាប្រធានអាស៊ានប្តូរវេនឆ្នាំ២០២២ ​ទៅកាន់តំបន់អឺរ៉ុបនាថ្ងៃទី១២​ ខែធ្នូ ឆ្នាំ២០២២ខាងមុខនេះ ដើម្បីទៅចូលរួមកិច្ចប្រជុំកំពូល ​រំលឹកខួបលើកទី៤៥ នៃទំនាក់ទំនងអាស៊ាន និងសហភាពអឺរ៉ុប។

តាមរយៈវិដេអូឃ្លីប ដែលបានចេញដាច់ដោយ​ឡែកពីគ្នា ហើយទូរទស្សន៍BTV News ទទួល បាន​ជាបន្តបន្ទាប់នាថ្ងៃទី២ ខែធ្នូ ឆ្នាំ២០២២នេះ​ បងប្អូនខ្មែរ​ទាំងនោះ​បានលើកឡើងថា ពួកគេ​ពិតជា​សប្បាយចិត្តយ៉ាងខ្លាំង​បន្ទាប់​ពីបានដឹងថា សម្តេចតេជោ ហ៊ុន សែន ​នាយករដ្ឋមន្រ្តីកម្ពុជា នឹង​បំពេញ​ទស្សនកិច្ចនៅទីក្រុងប្រួហ្សែល ​ប្រទេសប៊ែលហ្សិក ​ហើយបើទោះបី​ដំណើរទស្សនកិច្ចរបស់​សម្តេចឆ្ងាយពីពួកគេរស់នៅ ​និងចំថ្ងៃដែលពួកគេកំពុងធ្វើការក្តីក៏បងប្អូនទាំងនោះ នឹងទៅទទួល​សម្តេច​ដោយស្មោះស្ម័គ្រ​ និងសុខចិត្ត ​ដោយសារតែ​ពួកគេ​បាន​ស្រលាញ់​គោរព​សម្តេច ដែលជា​មេដឹកនាំ​ប្រទេសប្រកបដោយសុខសន្តិភាពពេញលេញ​និងការអភិវឌ្ឍជាបន្តបន្ទាប់ ហើយមួយវិញ​ទៀត​ក៏បានផ្តល់ឱកាសឲ្យពួកគេបានរៀនសូត្រនៅក្រៅ ​ប្រទេសផងដែរនោះ។

តាមរយៈវីដេអូឃ្លីបនេះដែរ ប្រជាពលរដ្ឋខ្មែរ ​ដែលកំពុងរស់នៅតំបន់អឺរ៉ុបទាំងនោះក៏បាន ថ្លែង​កោតសរសើរ​ចំពោះភាពដឹកនាំរបស់សម្តេចតេជោ ​ដែលបានដឹកនាំកិច្ចប្រជុំកំពូលអាស៊ាន​លើក​ទី៤០ និង៤១ រួមនិងកិច្ចប្រជុំដទៃទៀតទទួល​បានផ្លែផ្កាយ៉ាងត្រចះត្រចង់ ប្រកបដោយសុវត្ថិភាព​គួរជាទីមោទន ​ខណៈកិច្ចប្រជុំកំពូលដ៏ធំនេះមានថ្នាក់ដឹកនាំ​ប្រទេសមហាអំណាច​ និងអង្គការធំៗ​មួយចំនួន​បានចូលរួម ដូចជាអាមេរិក ​ចិន ជប៉ុន កូរ៉េខាងត្បូង អង្គការសហប្រជាជាតិនិងប្រទេស​ជា​ច្រើនទៀតដែលជាសម្ព័ន្ធមិត្តរបស់អាស៊ាននោះ៕អត្ថបទ៖ បាន ចក់