សៀមរាប៖ មជ្ឈមណ្ឌលស្តារលទ្ធភាពពលកម្មកាយសម្បទាខេត្តសៀមរាប បានបើកដំណើរការជាផ្លូវការឡើងវិញនៅទីតាំងថ្មី។ ​ការបើកដំណើរការនេះប្រព្រឹត្តិទៅនៅថ្ងៃទី ១ ខែធ្នូ ឆ្នាំ ២០២២។

មជ្ឈមណ្ឌលស្តារលទ្ធភាពពលកម្មកាយសម្បទា ខេត្តសៀមរាប ​បានបើកដំណើរឡើងវិញ ក្រោយ​ផ្លាស់​ពីទីតាំង​នៅជាប់មន្ទីពេទ្យបង្អែកខេត្ត ​មកនៅកន្លែងថ្មីដែលជាដីរបស់ក្រសួង​សង្គមកិច្ច​ផ្ទាល់តែម្តង។

ក្នុងឱកាសដាក់ដំណើរការនៅទីតាំងថ្មីនេះ ឯកឧត្តម ស៊ឹម សុធន ប្រតិភូរាជរដ្ឋាភិបាលទទួលបន្ទុក​ជានាយកនៃមូលនិធិជនពិការ ​បានថ្លែងថា ​វាជាការ​វិវត្តន៍​ស្របទៅនឹងកំណើននៃតម្រូវការ​សេវា​ស្តារលទ្ធភាពពលកម្មកាយសម្បទា ​ក៏ដូចជាចូលរួមគាំទ្រដល់ជនពិការក្នុងជីវិតរស់នៅប្រចាំថ្ងៃ ប្រកបដោយភាពថ្លៃថ្នូរនិងស្មើភាពគា្នក្នុងសង្គម។

ឯកឧត្តម ក៏បានថ្លែងអំណរគុណ ដល់កិច្ចសហការក្នុងភាពជាដៃគូ របស់រដ្ឋាភិបាលនិងប្រជាជន​អូស្រ្តាលី ​តាមរយៈកម្មវិធីACCESS ក៏ដូចជាអាជ្ញាធរ ​និងដៃគូពាក់ព័ន្ធផ្សេងទៀតចំពោះការគាំទ្រ ដល់មូលនិធិជនពិការ ​មជ្ឈមណ្ឌលស្ដារ ​ក៏ដូចជាដល់ជនពិការនៅកម្ពុជា។

ក្នុងឱកាសដដែលនេះ ឯកឧត្តម ផាប្លូ កាង ឯកអគ្គរាជទូតនៃស្ថានទូតអូស្រ្តាលីប្រចាំកម្ពុជា បាន​លើកឡើងដែរថា ​ក្នុងភាពជាដៃគូអភិវឌ្ឍន៍​ រដ្ឋាភិបាលអូស្រ្តាលី តែងតែគាំទ្រលើសកម្មភាព​នានា​ដែលសំដៅដល់ការលើកកម្ពស់សមភាព ​សុខភាព​ និងស្តារលទ្ធភាពពលកម្មដល់ប្រជាជនកម្ពុជា ដូចជាអ្វីដែលមាននៅទីនេះ ​គឺរដ្ឋាភិបាលអូស្រ្តាលីតាមរយៈកម្មវិធី ACCESS ​បានចូលរួមជាថវិកា​បដិភាគ​ជាមួយមូលនិធិជនពិការ ក្នុងការកសាង​ និងរៀបចំអាគារនៃមជ្ឈមណ្ឌលស្តារខេត្តសៀមរាប​នេះឡើងវិញ។

កន្លងមក មជ្ឈមណ្ឌលស្តារខេត្តសៀមរាប ​មានជនពិការចំនួនជាង ៨,០០០នាក់ បានមកទទួលសេវា​ស្តារ​ពី​មជ្ឈមណ្ឌលនេះ ​គិតចាប់តាំងពីឆ្នាំ១៩៩១មក​ ហើយចំនួននេះនៅមានចំនួនទាបនៅឡើយ​បើប្រៀបធៀបនឹងតម្រូវការជាក់ស្តែងរបស់ជនពិការក្នុងខេត្តសៀមរាប និងខេត្តជាប់ព្រំប្រទល់​ផ្សេងទៀត ​ដោយសារកង្វះនៃការផ្សព្វផ្សាយអំពីសេវាស្តារ​ កង្វះកិច្ចសហការពីស្ថាប័នពាក់ព័ន្ធ តម្រូវ​ការនៃឧបករណ៍ជំនួយរួមទាំងរទេះរុញមានការកើនឡើង និងធនធានមនុស្ស​និងធនធាន​ថវិកានៅមានកម្រិត៕ អត្ថបទ៖ គឹមហុក