ភ្នំពេញ៖ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអនុញ្ញាត​ជូនលោកស្រី Nadia Lasri, Senior Country Manager, Gavi-HSS and COVAX Facilitator ចូលជួបសំដែងការគួរសម និងពិភាក្សាការងារ, នាព្រឹកថ្ងៃទី២ ខែធ្នូ ឆ្នាំ២០២២នេះ។

ជាកិច្ចចាប់ផ្ដើម ឯកឧត្តមរដ្ឋមន្ត្រី បានសំដែងនូវការស្វាគមន៍ ​កោតសរសើរ និងថ្លែងអំណរគុណ​លោកសី ប្រធានគ្រប់គ្រងប្រចាំប្រទេសអង្គការ Gavi និងសហការី និងអង្គការទាំងមូល ដែល​តែងតែផ្ដល់នូវការឧបត្ថម្ភ​គាំទ្រ​ទាំងថវិកា និងបច្ចេកទេសលើការងារវ៉ាក់សាំងមូលដ្ឋាន ជាពិសេស​ក្នុងកាលៈទេសៈនៃការប្រយុទ្ធនឹងការរីករាលដាល ​ជំងឺកូវីដ-១៩ ដែលបានសម្របសម្រួល​ឱ្យកម្ពុជា​បានទទួលវ៉ាក់សាំងកូវីដ-១៩ មុនគេ តាមរយៈមជ្ឈមណ្ឌលកូវ៉ាក់ រួមទាំងប្រព័ន្ធត្រជាក់ផងដែរ។

លោកស្រី Nadia Lasri ប្រធានអង្គការ Gavi បានសម្តែងនូវការអបអរសាទរដល់រាជរដ្ឋាភិបាលកម្ពុជា ក្រោមការដឹកនាំបញ្ជាផ្ទាល់ប្រកបដោយគតិបណ្ឌិតរបស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្តី នៃព្រះរាជាណាចក្រកម្ពុជា ដែលគ្រប់គ្រងការរាលដាលនៃជំងឺកូវីដ-១៩ បានយ៉ាងល្អប្រសើរ ​ជំរុញឱ្យកម្ពុជាអាចបើក ​ដំណើរការឡើងវិញទាំង​សេដ្ឋកិច្ចនិងសង្គមតាំង​ពីខែវិច្ឆិកា​ ឆ្នាំ២០២១។

លោកស្រីប្រធានអង្គការ ក៏បានជម្រាបជូនថា​ ចាប់តាំងពីឆ្នាំ២០០០ ​រហូតមកបច្ចុប្បន្ន អង្គការ Gavi បានជួយគាំទ្រថវិកា​សម្រាប់ទិញវ៉ាក់សាំង សម្ភារៈបរិក្ខារ ប្រព័ន្ធត្រជាក់ ​និងសម្រាប់ប្រតិបត្តិការ សរុបជាង ​៩០លានដុល្លារអាមេរិក។ លើសពីនេះទៀត អង្គការ Gavi បាន ផ្តល់ជំនួយបច្ចេកទេស​លើការ​ពង្រឹងសមត្ថភាព​បុគ្គលិក​ផ្តល់ថ្នាំបង្ការ​ ពង្រឹងសម្ថភាពប្រព័ន្ធត្រជាក់ ​ទូទឹកកក បរិក្ខារ និងការគ្រប់គ្រងវ៉ាក់សាំង លើកកម្ពស់ការអប់រំសុខភាពសហគមន៍អំពីផល​ប្រយោជន៍​នៃការ​ចាក់វ៉ាក់សាំង ពង្រឹង សកម្មភាពតាមដានស្រាវជ្រាវជំងឺ១១មុខ របស់កម្មវិធីជាតិផ្តល់ថ្នាំបង្ការ។ អង្គការ Gavi ក៏​បានប្តេជ្ញាបន្តកិច្ចសហ- ប្រតិបត្តិការជាមួយក្រសួងសុខាភិបាល និងបានស្នើសុំការ​គាំទ្របន្ថែម​ទៀតពីអង្គការ Gavi។

ជាចុងក្រោយ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រី បានថ្លែងអំណរគុណអង្គការ Gavi និង​ស្នើសុំពង្រឹងកិច្ចសហប្រតិបត្តិការ ​ជាមួយក្រសួងសុខាភិបាលបន្ថែមទៀត ជាពិសេសលើការអភិវឌ្ឍ​ធនធានមនុស្ស។ ​កិច្ចជំនួបពិភាក្សាបានបញ្ចប់ ​ដោយលទ្ធផលគួរជាទីមោទនៈក្នុងស្មារតីសាមគ្គីភាព មិត្តភាព​ និងកិច្ចសហប្រតិបត្តិការរវាងកម្ពុជា និង Gavi៕អត្ថបទ៖ រដ្ឋា