​អេស្ប៉ាញ៖ នគរបាល​និយាយថា ស្ថានទូត​អាមេរិក​ក្នុង​ទីក្រុង​ម៉ា​ឌ្រី​ដ ប្រទេស​អេស្ប៉ាញ កាលពី​ថ្ងៃ​ព្រហស្បតិ៍បាន​ស្ទាក់​ចាប់បាន​កញ្ចប់​មួយ​គួរឱ្យ​សង្ស័យ ដែលមាន​រូបរាង​ដូច​ទៅនឹង​លិខិត​បង្កប់​គ្រឿងផ្ទុះ​ចំនួន ៥ ដែល​ត្រូវបាន​រកឃើញ​នៅក្នុង​ប្រទេស​អេ​ស្ប៉ា​ញ​។ ​

​កញ្ចប់​នេះ​ត្រូវបាន​រកឃើញ​នៅ​ស្ថានទូត​អាមេរិក​ដោយ​មន្ត្រី​សន្តិសុខ ហើយ​ក្រោយមក​ត្រូវបាន​បំផ្ទុះ​ក្រោម​ការគ្រប់គ្រង​ដោយ​នគរបាល​។ ប្រទេស​អេស្បាញបាន​រឹតបន្តឹង​សន្តិសុខ​នៅ​ជុំវិញ​អគារ​សាធារណៈ បន្ទាប់ពី​កញ្ចប់​ទីមួយ​ត្រូវបាន​ផ្ញើរ​ទៅកាន់​នាយករដ្ឋមន្ត្រីលោក Pedro Sanchez កាលពី​ថ្ងៃទី24 ខែវិច្ឆិកា ហើយ​កាលពី​ថ្ងៃ​ពុធកញ្ចប់​ទី​ពីរបាន​ផ្ញើ​ទៅកាន់​ឯកអគ្គរដ្ឋទូត​អ៊ុយ​ក្រែ​ន​ប្រចាំ​ប្រទេស​អេ​ស្ប៉ា​ញ ដែល​បាន​ផ្ទុះ​បណ្តាល​ឲ្យ​មន្ត្រី​សន្តិសុខ​ម្នាក់​រងរបួស​ស្រាល​។ ពេលនេះ​សន្តិសុខ​ត្រូវបាន​បង្កើន​នៅ​ជុំវិញ​ស្ថានទូត​។​ ​កាលពី​យប់​ថ្ងៃ​ពុធ ក្រុមហ៊ុន Instalaza ជា​ក្រុមហ៊ុន​ផលិត​សព្វាវុធ​នៅ​ទីក្រុង Zaragoza ភាគ​ឦសាន​ប្រទេស​អេ​ស្ប៉ា​ញដែល​បាន​បញ្ជូន​រ៉ុក្កែត C90 ជាង ១,០០០គ្រឿង​ឲ្យ​ប្រទេស​អ៊ុយ​ក្រែ​ន បានទទួល​កញ្ចប់​មាន​ផ្ទុក​គ្រឿងផ្ទុះ​មួយ​ផ្សេងទៀត ហើយ​កាលពី​ថ្ងៃ​ព្រហស្បតិ៍មូលដ្ឋាន​ទ័ពអាកាស​ដែល​បំពាក់​ផ្កាយរណប​អឺរ៉ុប ក្រសួងការពារជាតិ​អេ​ស្ប៉ា​ញ និង​ស្ថានទូត​អាមេរិក​បានទទួល​កញ្ចប់​លិខិត​បង្កប់​គ្រឿងផ្ទុះ​ដូចគ្នានេះ​។

បន្ទាប់ពី​ទទួលបាន​កញ្ចប់​លិខិត​មាន​គ្រឿងផ្ទុះ​ចូលទៅ​ស្ថានទូត​អ៊ុយ​ក្រែ​ន​បាន​បំផ្ទុះ រដ្ឋមន្ត្រីការបរទេស​អ៊ុយ​ក្រែ​ន លោក Dmytro Kuleba បាន​បញ្ជា​ឱ្យ​ស្ថានទូត​ទាំងអស់​របស់​ទីក្រុង Kyiv នៅ​បរទេស​ពង្រឹង​សន្តិសុខ​ជាបន្ទាន់​។​ ​ឯកអគ្គរដ្ឋទូត​អ៊ុយ​ក្រែ​ន​ប្រចាំ​ប្រទេស​អេស្បាញលោក Serhii Pohoreltsev ទំនងជា​ដាក់​កំហុស​លើ​រុស្ស៊ី​។ លោក​បាន​និយាយ​ទៅកាន់​ស្ថានីយ​ទូរទស្សន៍​អេ​ស្ប៉ា​ញ TVE ថា យើង​ទទួលបាន​ការណែនាំ​ពី​ក្រសួង​នៅ​ប្រទេស​អ៊ុយ​ក្រែ​ន ​ដែល​បានផ្តល់​ឱ្យនូវ​ស្ថានភាព​ត្រូវ​ត្រៀមលក្ខណៈ​សម្រាប់​ឧប្បត្តិហេតុ​ណាមួយ ជា​សកម្មភាព​របស់​រុស្ស៊ី​នៅ​ខាងក្រៅ​ប្រទេស​៕

អត្ថបទ៖ ប៊ុនថន