​អ៊ុយ​ក្រែ​ន៖ យោធា​​អ៊ុយ​ក្រែ​ន​និយាយថា ខ្លួន​បាន​រកឃើញ​បំណែក​មី​ស៊ី​ល​បំពាក់​ក្បាល​គ្រាប់​នុយក្លេអ៊ែរ​បាញ់​ដោយ​រុស្ស៊ី​ ដែលមាន​ក្បាល​គ្រាប់​មិនអាច​ផ្ទុះ​នៅ​ភាគ​ខាងលិច​ប្រទេស​អ៊ុយ​ក្រែ​ន ហើយ​គោលបំណង​ជាក់ស្តែង​របស់​ពួកគេ​គឺ​ដើម្បី​ធ្វើ​ឲ្យ​រំខាន​ដល់​ការការពារ​ដែនអាកាស​។​

​លោក Mykola Danyliuk អ្នកតំណាង​អង្គភាព​ស្រាវជ្រាវ​របស់​កងកម្លាំង​ប្រដាប់អាវុធ​អ៊ុយ​ក្រែ​ន ​បាន​និយាយ​ក្នុង​សន្និសីទ​សារព័ត៌មាន​ថា បំណែក​មី​ស៊ី​ល​ដែល​បាន​ធ្លា​ក់នៅ​តំបន់​ភាគ​ខាងលិច​ទីក្រុង Lviv និង Khmelnytskyi កាលពី​ថ្ងៃទី​31 ខែតុលា ត្រូវបាន​គេ​កំណត់ថា​ ជា​ផ្នែក​មី​ស៊ី​ល​តម្រង់​គោលដៅ Kh-55​។ មី​ស៊ី​ល Kh-55 ត្រូវបាន​ផលិតឡើង​ដោយ​សហភាពសូវៀត​ក្នុង​ទសវត្សរ៍​ឆ្នាំ​1970 សម្រាប់​ប្រើប្រាស់​លើ​គោលដៅ​យុទ្ធសាស្ត្រ​។ វា​ត្រូវបាន​បម្រុង​ទុកជា​ចម្បង​ដើម្បី​ផ្ទុក​ក្បាល​គ្រាប់​នុយក្លេអ៊ែរ និង​ត្រូវបាន​បាញ់​ចេញពី​យន្តហោះ​ទម្លាក់​គ្រាប់បែក​។​ ​មន្ត្រី​រូបនេះ​បាន​និយាយថា ការសាកល្បង​លើ​បំណែក​ពុំបាន​បង្ហាញ​ពី​កម្រិត​ខុស​ប្រក្រតី​នៃ​វិទ្យុសកម្មនោះទេ​។ ក្រសួងការពារជាតិ​រុស្ស៊ីពុំបាន​ឆ្លើយតប​ភ្លាមៗ ​ចំពោះ​សំណើសុំ​ការអត្ថាធិប្បាយ​នោះទេ​។​

លោក Danyliuk និយាយថា មី​ស៊ី​ល​ត្រូវបាន​បំពាក់​ដោយ​ក្បាល​គ្រាប់​ដែល​មិន​ផ្ទុះ ដែល​ក្បាល​គ្រាប់​មួយ​ក្នុងចំណោម​នោះ​ត្រូវបាន​ដាក់តាំង​បង្ហាញ​ នៅលើ​វេទិកា​នៃ​មជ្ឈមណ្ឌល​សន្និសីទ​ក្នុង​ទីក្រុង Kyiv ជា​កន្លែង​ដែល​លោក​កំពុង​រៀបចំ​សន្និសីទ​សារព័ត៌មាន​។ ​លោក Danyliuk និយាយថា ​មី​ស៊ី​ល Kh-55 ពុំ​ត្រូវបាន​ប្រើប្រាស់​ដោយ​រុស្ស៊ី​ក្នុងប្រទេស​អ៊ុយ​ក្រែ​ន​មុន​ថ្ងៃទី31 ខែតុលា​នោះទេ​។ ទោះបីជា​ដូច្នេះមី​ស៊ី​ល​នេះ​បានបង្ហាញ​ពី​កម្រិត​នៃ​គ្រោះថ្នាក់ ​ដោយសារតែ​ថាមពល​កម្លាំង​ចលនា និង​ឥន្ធនៈ​របស់​វា​។ នេះ​គឺជា​ភស្តុតាង​ដោយ​ការប៉ះពាល់​នៃ​មី​ស៊ី​ល Kh-55 ធ្លាក់ចូល​ទៅក្នុង​អគារ​លំនៅឋាន​មួយ ហើយ​ការប្រើប្រាស់​មី​ស៊ី​ល​ប្រភេទ​នេះគឺមាន​បំណង​ធ្វើ​ឲ្យ​រំខាន​ការយកចិត្តទុកដាក់ ​នៃ​ប្រព័ន្ធ​ការពារ​ដែនអាកាស​រប​ស់អ៊ុយ​ក្រែ​ន៕

អត្ថបទ៖ ប៊ុនថន