ប្រេស៊ីល៖ ក្រុមជួយសង្គ្រោះដែលមានសត្វសុនខហិតក្លិនកំពុងធ្វើការ ដើម្បីស្វែងរកអ្នកនៅរស់រានមានជីវិតដែលត្រូវបានកប់ក្រោមបំណាក់ដីកាលពីថ្ងៃព្រហស្បតិ៍។
អាជ្ញាធរនិយាយថា បំណាក់ដីបន្ទាប់ពីភ្លៀងធ្លាក់ខ្លាំងនៅភាគខាងត្បូងប្រទេសប្រេស៊ីល បណ្ដាលឲ្យមនុស្សច្រើននាក់បាត់ខ្លួននៅក្នុងរដ្ឋ Parana និងបានកាត់ផ្តាច់ដំណើរការចូលទៅកាន់កំពង់ផែដ៏សំខាន់មួយ សម្រាប់ការដឹកជញ្ជូនគ្រាប់ធញ្ញជាតិ និងស្ករ។ យោងតាមក្រុមមន្ត្រីដែលកំពុងធ្វើប្រតិបត្តិការជួយសង្គ្រោះបានឲ្យដឹងថា យ៉ាងហោចណាស់មនុស្ស ៣០នាក់ត្រូវបានកប់នៅក្រោមបំណាក់ដីនៅលើផ្លូវ Highway BR-376 ក្នុងទីក្រុង Guaratuba។ ក្រសួងពន្លត់អគ្គិភ័យបាននិយាយថា មនុស្សពីរនាក់ត្រូវបានបញ្ជាក់ថាស្លាប់ដោយបំណាក់ដីនេះ។
វីដេអូរបស់ក្រុមជួយសង្គ្រោះពីឧទ្ធម្ភាគចក្របានបង្ហាញ ឲ្យឃើញប្រជាជនត្រូវបានទាញឡើងមកកាន់ទីសុវត្ថិភាពពីដំបូលលំនៅឋាន ខណៈពួកគេរង់ចាំការជួយសង្គ្រោះ។ ទិដ្ឋភាពពីលើអាកាសបានបង្ហាញពីតំបន់ជាច្រើន នៅទីក្រុងដែលបានជន់លិចនៅក្រោមទឹកមានដីល្បាប់ ខណៈភ្លៀងនៅតែបន្តធ្លាក់កាលពីថ្ងៃព្រហស្បតិ៍។ ទឹកជំនន់នៅភាគឦសានប្រទេសប្រេស៊ីលបានបន្តប៉ះពាល់ដល់អាយុជីវិតរបស់ប្រជាជនជាច្រើន ខណៈទីក្រុងចំនួន១៧ នៅក្នុងរដ្ឋបានប្រកាសរដ្ឋក្នុងគ្រាអាសន្ន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
