បាល់ទាត់៖ ខ្សែប្រយុទ្ធ នួន បូរី បានធូរស្បើយពីបញ្ហារបួសជង្គង់ និងបានបង្ហាញខ្លួនសម្រាប់ក្លិបនគរបាលជាតិក្នុងការប្រកួត Metfone Cambodian League តទល់អង្គរថាយហ្គឺរនាពេលថ្មីៗនេះ។
កីឡាករធ្លាប់ជាប់ជម្រើសជាតិកម្ពុជាបញ្ជាក់ថា អាចចូលលេងបានធម្មតាវិញ ដោយបញ្ហារបួសជង្គង់ដែលកើតឡើងអំឡុងហ្វឹកហាត់កាល ៣ខែមុន បានល្អប្រសើរចន្លោះ ៨០ ទៅ ៩០% តែនៅមានអារម្មណ៍ស្រៀវខ្លះ។ គេថា នេះមិនមែនជារបួសដែលពិបាកខ្លាំងបំផុតសម្រាប់គេទេ តែអ្វីដែលគេមិនសប្បាយចិត្តនោះ គឺក្លិបកំពុងស្ថិតក្នុងស្ថានភាពមិនល្អ ក្រោយចាញ់ទាំង ៣ប្រកួតដំបូងនៅ MCL ២០២១។ កីឡាកររូបនេះបញ្ជាក់ថា បួសនេះមិនមែនជារបួសយ៉ាប់ជាងគេទេ តែវាចំពេលក្លិបកំពុងស្ថិតក្នុងស្ថានភាពយ៉ាប់ដែរ យើងត្រូវចំណាយពេលព្យាបាលវាទើបតែបាន ៣ខែហ្នឹង។ យើងត្រូវព្យាយាមហ្វឹកហាត់បន្ថែម ដើម្បីជួយក្រុមធ្វើម៉េចកុំឲ្យជួបស្ថានភាពបែបហ្នឹងទៀត។ បើយើងប្រឹងហាត់ខ្លាំងមួយខែទៀតអាចជា ១០០%។”
នួន បូរី មិនមែនជាកីឡាករស្នូលម្នាក់ទេ របស់នគរបាលជាតិដែលមានបញ្ហារបួស។ ក្នុងនោះក៏មានខ្សែបម្រើ ស៊ុន វណ្ណដេត ត្រូវសម្រាកដោយសាររបួសសរសៃពួរជង្គង់។ ចំណែក ខ្សែប្រយុទ្ធអាហ្វ្រិកខាងត្បូង Shane Booysen ក៏ត្រូវសម្រាក ដើម្បីឲ្យបញ្ហាសុខភាពរបស់គេកាន់តែប្រសើរ។ ទន្ទឹមនឹងនេះដូចបានជម្រាបជូន គឺក្រុមរបស់គ្រូបង្គោល អ៊ុង កនយ៉ានិត កំពុងស្ថិតក្នុងស្ថានភាពមិនល្អ ដោយពុំទាន់មានពិន្ទុឡើយ។ ៣ប្រកួតដំបូងនៅ MCL រដូវកាលនេះ ពួកគេបើកឆាកចាញ់អគ្គិសនីកម្ពុជា ២ទល់នឹង៣, ចាញ់អាស៊ីអឺរ៉ុបយូណាយធីត ៣ទល់នឹង២ និងចាញ់អង្គរថាយហ្គឺរ ០ទល់នឹង១៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
