ភ្នំពេញ៖ លោកជំទាវកិត្តិសង្គហបណ្ឌិត ម៉ែន សំអន ​ឧបនាយករដ្ឋមន្រ្តី និងជាអនុប្រធានក្រុមប្រឹក្សាជាតិរណសិរ្យសាមគ្គីអភិវឌ្ឍន៍មាតុភូមិកម្ពុជា ថ្លែងថា ៤៤ឆ្នាំ នៃថ្ងៃបង្កើតរណសិរ្យសាមគ្គីសង្គ្រោះជាតិ ជាការចងចាំជាប្រវត្តិសាស្រ្ត នៅក្នុងដួងចិត្តរបស់ប្រជាពលរដ្ឋខ្មែរគ្រប់រូប។

ថ្លែងក្នុងពិធីអបអរសាទរខួបអនុស្សាវរីយ៍លើកទី៤៤ ទិវាកំណើតរណសិរ្យសាមគ្គី អភិវឌ្ឍន៍មាតុភូមិ កម្ពុជាតំណាងដ៏ខ្ពង់ខ្ពស់របស់សម្តេចពញាចក្រី ហេង សំរិន ប្រធានរដ្ឋសភា និងជាប្រធានក្រុម​ប្រឹក្សា​ជាតិរណសិរ្យសាមគ្គី អភិវឌ្ឍន៍មាតុភូមិកម្ពុជា នៅថ្ងៃទី០២ ខែធ្នូ ឆ្នាំ២០២២ លោកជំទាវកិត្តិសង្គហបណ្ឌិត ម៉ែន សំអន ​ឧបនាយករដ្ឋមន្រ្តី និងជាអនុប្រធានក្រុមប្រឹក្សា​ជាតិរណសិរ្យសាមគ្គី អភិវឌ្ឍន៍មាតុភូមិកម្ពុជា ​មានប្រសាសន៍ថា​ អង្គមិទ្ទិញខួបលើកទី៤៤នាថ្ងៃនេះ គឺជាព្រឹត្តិការណ៍ជាតិ​មួយដ៏មានសារៈសំខាន់ បំផុតចំពោះបុព្វហេតុនៃការរស់រានមាន​ជីវិតឡើងវិញ​របស់មាតុភូមិ ​និងប្រជាជនកម្ពុជា​ ដោយសារ រណសិរ្ស ២ធ្នូ មិនត្រឹមតែសង្គ្រោះប្រជាជបឱ្យចាកផុត​ពីគ្រោះមហន្តរាយនៃរបបប្រល័យពូជសាសន៍ប៉ុណ្ណោះទេ ​ប៉ុន្តែ រណសិរ្ស ២ធ្នូ នៅបានជួយស្តារ កសាង ​និងអភិវឌ្ឍន៍ប្រទេសឲ្យមានការរីកចម្រើនលើគ្រប់វិស័យ ធ្វើឱ្យមាតុភូមិកម្ពុជាមានការកែប្រែ​មុខមាត់ថ្មីជាបន្តបន្ទាប់ ។

លោកជំទាវកិត្តិសង្គហបណ្ឌិត ថ្លែងថា អស់រយៈពេល ៤៤ឆ្នាំ កន្លងផុតទៅ ប្រជាពលរដ្ឋទាំងអស់គា្ន​នៅតែចងចាំជានិច្ចនូវ ​អតីតកាលដ៏ងងឹតសូន្យសុងដែលពោរពេញទៅដោយទុក្ខវេទនា ការឈឺចាប់​ខ្លោចផ្សារ និរាសព្រាត់ប្រាស់ ក្នុងរយៈពេល ៣ឆ្នាំ ៨ខែ និង ២០ថ្ងៃ ក្រោមរបបកម្ពុជា​ប្រជាធិបតេយ្យ​ខ្មែរក្រហម​បានឡើយ ​ដោយសារតែអង្គកា​រ របស់ប៉ុលពត បានប្លន់យកទាំងស្រុងនូវសមិទ្ធផល​នៃការ​តស៊ូរបស់ប្រជាជនកម្ពុជា​ ដើម្បីឯករាជ្យ សន្តិភាព និងសេរីភាព ហើយបានបំផ្លាញអស់នូវ​តម្លៃរបស់​មនុស្ស ក៏ដូចជារចនាសម្ព័ន្ធនៃសង្គមជាតិទាំងមូល។

លោកជំទាវកិត្តិសង្គហបណ្ឌិត បញ្ជាក់ថា រយៈពេល៤៤​ ឆ្នាំបានកន្លងផុតទៅក៏ពិតមែន ប៉ុន្តែ​ព្រឹត្តិការណ៍​ជាប្រវត្តិសាស្ត្រនេះនៅតែស្ថិតក្នុងដួងចិត្ត និងការចងចាំនៃប្រជាពលរដ្ឋខ្មែរ​គ្រប់ៗរូប និងផ្អែកលើមូលដ្ឋាននេះហើយ​ ដែលធ្វើឲ្យប្រជាជនកម្ពុជាយល់ដឹងយ៉ាងច្បាស់ថា រណសិរ្ស ២ធ្នូ គឺជាបុព្វការីដ៏មានមហាគុណូបការៈចំពោះជាតិ មាតុភូមិ និងប្រជាជនកម្ពុជា៕ អត្ថបទ៖ សេក ឧត្តម