ភ្នំពេញ៖ Yokohama Management school based on philosophy ជាស្ថាប័នអប់រំនៅប្រទេសជប៉ុន នៅថ្ងៃទី​២ ខែធ្នូ ឆ្នាំ​២០២២នេះ បានមកសហការដោយចុះអនុស្សរណៈជាមួយ​មជ្ឈមណ្ឌលសហប្រតិបត្តិការកម្ពុជា-ជប៉ុន និងសមាគមពាណិជ្ជកម្ម និងវិនិយោគកម្ពុជា-ជប៉ុន។

ការចុះអនុស្សរណៈយោគយល់រវាង Yokohama Management school based on philosophy និងមជ្ឈមណ្ឌលសហប្រតិបត្តិការកម្ពុជា-ជប៉ុន ធ្វើឡើងក្នុងគោលបំណង​រាប់បញ្ចូលទាំងទាំងការផ្តល់ថវិកាឧបត្ថម្ភ ទៅដល់​មជ្ឈមណ្ឌលសហប្រតិបត្តិការកម្ពុជា-ជប៉ុន CJCC ដើម្បីប្រើប្រាស់ក្នុងការបកប្រែសៀវភៅរបស់លោក Inamori ដែលមានចំណងជើងថា "Ikikata"ពីភាសាជប៉ុនមកជាភាសាខ្មែរ និងបោះពុម្ពផ្សាយសៀវភៅ ដែលបានបកប្រែនោះនៅក្នុងប្រទេសកម្ពុជា។

រីឯការចុះ​ហត្ថលេខាលើអនុស្សរណៈយោគយល់ ជាមួយសមាគមពាណិជ្ជកម្ម និងវិនិយោគកម្ពុជា-ជប៉ុន គឺក្នុងគោលបំណងបង្កើតឱកាសរួមគ្នារវាងភាគីជប៉ុន និងកម្ពុជា ដោយផ្អែកលើទស្សនវិជ្ជាធុរកិច្ចរបស់លោក Inamori និងទស្សនវិជ្ជាអាជីវកម្មកម្ពុជាដោយផ្អែកលើព្រះពុទ្ធសាសនា។

លើសពីពិធីចុះហត្ថលេខាលើអនុស្សរណៈយោគយល់ កម្មវិធីក៏មានវគ្គចែករំលែកចំនួនបីអំពីទស្សនវិជ្ជា និងក្រមសីលធម៌អាជីវកម្ម ដែលចែករំលែកដោយលោក Hamada Soichiro តំណាង Yokohama Management school based on philosophy ឯកឧត្ដមបណ្ឌិត ម៉ី កល្យាណ ប្រធានក្រុមប្រឹក្សាភិបាល សមាគមពាណិជ្ជកម្ម និងវិនិយោគកម្ពុជា-ជប៉ុន រួមទាំងអ្នកជំនាញជាច្រើនផ្សេងទៀត។

ពិធីចុះហត្ថលេខាលើអនុស្សរណៈយោគយល់នេះ ក៏មានការរំពឹងថា​នឹងធ្វើឱ្យទំនាក់ទំនងការទូតរវាងប្រជាជន និងប្រជាជនកាន់តែមានការរីកចម្រើនបន្ថែមទៀត រវាងកម្ពុជា និងជប៉ុន តាមរយៈការផ្លាស់ប្តូរគំនិតក្នុងវិស័យធុរកិច្ច។ ជាពិសេស គឺស្របពេលដែល​ប្រទេសកម្ពុជា និងជប៉ុន នឹងប្រារព្ធខួបលើកទី​៧០ នៃទំនាក់ទំនងការទូតនៅឆ្នាំ២០២៣​ខាងមុខនេះ។ ជាមួយគ្នានេះដែរ ការបង្កើតឱកាសសិក្សា ការបកប្រែ និងការបោះពុម្ពសៀវភៅរបស់លោក Inamori នឹងផ្តល់អត្ថប្រយោជន៍ជាច្រើនសម្រាប់ធុរកិច្ចជននៅកម្ពុជា ក្នុងការលើកកម្ពស់ក្រមសីលធម៌អាជីវកម្មរបស់ពួកគេ៕អត្ថបទ៖ គឹមហុក