​ភ្នំពេញ ៖ តំណាងអភិបាលរាជធានី និងរដ្ឋធានីអាស៊ាន ពិភាក្សាជាក្រុមផ្តោតលើការបន្ស៊ីរវាងផែនការ​អភិវឌ្ឍន៍ប្រកបដោយចីរភាព​នៅក្នុងទីក្រុង និងរដ្ឋបាលមូលដ្ឋានអាស៊ាន។

ការអនុវត្តគោលដៅអភិវឌ្ឍន៍ប្រកបដោយចីរភាពនៅកម្រិតមូលដ្ឋានជាប្រធានបទសំខាន់ក្នុងកិច្ចពិភាក្សា នៃវេទិកាអភិបាលក្រុង​អាស៊ាន AMF និងកិច្ចប្រជុំអភិបាលរាជធានី រដ្ឋធានីអាស៊ាន MGMAC ឆ្នាំ២០២២ គឺស្វែងយល់ពីកិច្ចសហប្រតិបត្តិការ និងការអនុវត្តគោលដៅអភិវឌ្ឍន៍ ប្រកបដោយចីរភាព ដែលបន្ស៊ីគ្នារវាងផែនការអភិវឌ្ឍន៍ប្រកប​ដោយចីរភាពក្នុង​ទីក្រុងនៅ​កម្រិតនីមួយៗ និងកម្រិតតំបន់ ក៏ដូចជានៅរដ្ឋបាលមូលដ្ឋានអាស៊ាន។

កិច្ចពិភាក្សានេះបានធ្វើឡើងនៅរសៀលថ្ងៃទី២ ខែធ្នូ ឆ្នាំ២០២២ នៅសណ្ឋាគារ រ៉េស៊ីដង់ សុខាភ្នំពេញ ដែលដឹកនាំដោយលោក ឡុង ឌីម៉ង់ អភិបាលរងខេតព្រះស៊ីហនុ និងលោកស្រី Madelaine Alfelor Gazman អតីតអភិបាលខេត្តអ៊ីរីហ្គា នៃប្រទេសហ្វីលីពីន និងជាទូតឆន្ទៈនៃសមាគមន៍ UCLG ASPAC ។

ជាកិច្ចចាប់ផ្តើមនៃកិច្ចពិភាក្សានេះ លោក ឡុង ឌីម៉ង់ បានលើកឡើងអំពីសក្តានុពលដែលខេត្តព្រះសីហនុមានស្រាប់ ហើយខេត្តព្រះសីហនុ គឺជាខេត្តមួយដែលមានការយកចិត្តទុកដាក់ច្រើនដូចបណ្តា រាជធានី ខេត្តដទៃទៀត ពីសំណាក់រាជរដ្ឋាភិបាលកម្ពុជា។ លោកបន្តថា ក្នុងរយៈពេលប៉ុន្មានឆ្នាំចុងក្រោយ​នេះរដ្ឋបាលខេត្តព្រះសីហនុ​បានពង្រីកមុខមាត់​ខ្លួនឯងឱ្យកាន់តែទំនើប កាន់តែឆ្លាតវៃ តាមរយៈការដាក់ចេញនូវយុទ្ធសាស្រ្តអភិវឌ្ឍន៍ថ្នាក់ក្រោមជាតិឥតឈប់ឈរលើគ្រប់វិស័យ ជាពិសេសវិស័យហេដ្ឋារចនាសម្ព័ន្ធ និងការផ្តល់ឱកាសលើវិនិយោគិនបរទេសមកបណ្តាក់ទុន ដើម្បីស្តារសេដ្ឋកិច្ចឡើងវិញ​ក្រោយវិបត្តិវីរុសឆ្លងសកលកូវីដ១៩ ដែលបានពន្យារពេលនៃវឌ្ឍនភាពរបស់ខ្លួន ដើម្បីសម្រេចគោលដៅអភិវឌ្ឍន៍ ប្រកបដោយចីរភាពរបស់អង្គការសហប្រជាជាតិ ។

លោកបានឱ្យដឹងថា កិច្ចពិភាក្សាមានការផ្លាស់ប្តូរបទពិសោធន៍គ្នាទៅវិញទៅមក លើកការបន្ស៊ីគ្នាង​រវាងផែនការយុទ្ធសាស្រ្តអភិវឌ្ឍ​ទីក្រុងនីមួយៗ រួមទំាងបញ្ហាប្រឈមដែលបានកើតឡើង ហើយធ្វើការប្រៀបធៀបទៅនឹងអ្វីដែលបានដាក់​ចេញដោយអង្គការសហ​ប្រជាជាតិ ដែលឆ្លើយតបទៅនឹងកម្រិតណាមួយ ដើម្បីដោះស្រាយឆ្ពោះទៅការសម្រេចគោលដៅអភិវឌ្ឍទីក្រុងប្រកបដោយចីរភាព។ លោកបានបន្ថែមថា ការអនុវត្តផែនការអភិវឌ្ឍប្របដោយចីរភាពរបស់អង្គការសហប្រជាជាតិនេះ មានសារៈសំខាន់ណាស់ ដើម្បីធ្វើយ៉ាងណាឆ្លើយបតឱ្យចំគោលដៅដែលបំរើផលប្រយោជន៍របស់ប្រជាពលរដ្ឋជាក់ស្តែង។

លោក ឡុង ឌីម៉ង់ បន្តថាចំពោះមតិយោបល់ និងបទពិសោធន៍ដែលបានលើកឡើងនៅក្នុងកិច្ចពិភាក្សានេះ និងត្រូវយកទៅបញ្ជូល​ក្នុងសេចក្តីថ្លែងការរួម នៅក្នុងវេទិកាអភិបាលក្រុងអាស៊ាន និងកិច្ចប្រជុំអភិបាលរាជធានី-រដ្ឋធានីអាស៊ាន ២០២២ នៅថ្ងៃទី០៣ ខែធ្នូ ឆ្នាំ២០២២។

សូមបញ្ជាក់ថា វេទិកា AMF និងកិច្ចប្រជុំ MGMAC ឆ្នាំ២០២២នេះ បានរៀបចំឱ្យមានក្រុមពិភាក្សា ចំនួន៥ក្រុម ដែលកិច្ចពិភាក្សាទី១ ផ្តោតលើការធ្វើហិរញ្ញប្បទានគម្រោងដែលមានចីរភាព ដើម្បីការអភិវឌ្ឍទីក្រុង។ កិច្ចពិភាក្សាទី២ ការអនុវត្តគោលដៅអភិវឌ្ឍន៍​ប្រកបដោយចីរភាពនៅកម្រិតមូលដ្ឋាន។ កិច្ចពិភាក្សាទី៣ អភិបាលកិច្ចឌីជីថល។ កិច្ចពិភាក្សាទី៤ នគរូបនីយកម្មអាស៊ាន​ប្រកបដោយចីរភាព និងកិច្ចពិភាក្សាទី៥ ភាពធន និង អាកាសធាតុក្នុងទីក្រុង និងការកាត់បន្ថយហានិភ័យ​គ្រោះមហន្តរាយ​នៅក្នុងតំបន់អាស៊ាន៕ អត្ថបទ ៖​ប្រាក់ វ៉ាន់ដា