ភ្នំពេញ៖ សហគ្រិនឆ្នើម ដែលទទួលបានជោគជ័យ ពីការប្រកួតប្រជែងទទួលបានវិញ្ញាបនបត្រដណ្តើមយកពានរង្វាន់ ស៥ និងឧស្សាហកម្មបៃតងកម្ពុជា ចំនួន ៤៥ក្រុមហ៊ុន បានកំពុងចូលរួមជម្រុញការអភិវឌ្ឍឧស្សាហកម្ម ឆ្ពោះទៅរកបរិស្ថានបៃតង ធន់នឹងការប្រែប្រួលអាកាសធាតុ និងជាការចូលរួមលើកស្ទួយដល់វិស័យឧស្សាហកម្ម​នៅកម្ពុជា មានការអភិវឌ្ឍឈានមុខ និងប្រកបដោយនិរន្តភាព។

នៅថ្ងៃទី២ ខែធ្នូ ឆ្នាំ២០២២ នេះ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានរៀបចំពិធីប្រកាសជយលាភី ចែកវិញ្ញាបនបត្រ និងប្រគល់ពាន់រង្វាន់ឧស្សាហកម្មបៃតង ដល់សហគ្រិនឆ្នើមដែលមានអាជីវកម្មខុសៗគ្នា ដែលគម្រោងឧស្សាហកម្មបៃតងនេះ បង្កើតឡើងសម្រាប់ជួយគាំទ្រ និងលើកទឹកចិត្តដល់ឧស្សាហកម្ម រោងចក្រ សហគ្រាស ឲ្យអនុវត្តគោលការណ៍ សកម្មភាពបៃតងដូចជា ការកាត់បន្ថយការប្រើប្រាស់វត្ថុធាតុដើម ទឹក ថាមពល និងកាកសំណល់ ពោល គឺគម្រោងនេះ បានជួយលើកកម្ពស់​ដល់កិច្ចដំណើរការផលិតកម្ម និងការប្រកួតប្រជែងនៅក្នុងខ្សែច្រវ៉ាក់ផលិតកម្មដែលកំពុងប្រតិបត្តិនៅកម្ពុជា។

ពាក់ព័ន្ធការអនុវត្តគម្រោងឧស្សាហកម្មបៃតង គឺមានសារៈសំខាន់ណាស់ ជាពិសេសការកាត់បន្ថយការបំពុល ការប៉ះពាល់ដល់សេដ្ឋកិច្ច បរិស្ថាន និងជាដាស់តឿន ដល់រោងចក្រ សហគ្រាស ចូលរួមជាមួយសកម្មភាពសង្គម, ដោយក្នុងនោះការអនុវត្តគម្រោងនេះរបស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍​នាពេល​កន្លង​មក, ចំពោះរោងចក្រ សហគ្រាស ដែលបានចូលរួម គឺទទួលបានជោគជ័យក្នុងកិច្ចដំណើរការ​ខ្សែច្រវ៉ាក​ផលិតកម្ម​យ៉ាងខ្លាំងក្លា។

សូមបញ្ជាក់ថា៖ នៅក្នុងឆ្នាំ ២០២១ កន្លងមកនេះ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានរៀបចំកម្មវិធីពានរង្វាន់ឧស្សាហកម្មបៃតង ស្ថិតក្រោមគម្រោង ស្តីពី «ការអភិវឌ្ឍដែលបញ្ចេញកាបូនតិចដើម្បីបង្កើនផលិតភាព និងកាត់បន្ថយការប្រែប្រួលអាកាសធាតុ តាមរយៈការផ្ទេរបច្ចេកវិទ្យាអំណោយផលល្អដល់បរិស្ថាន» ដល់វិស័យឯកជន ដោយសហការរៀបចំធ្វើការវាយតម្លៃ និង​ដាក់ពិន្ទុលើរោងចក្រ សហគ្រាសធុនតូច និងមធ្យម និងសិប្បកម្ម ចំនួន ២៧ ដែលបានចូលរួម​ក្នុងកម្មវិធី​ពាន​រង្វាន់ឧស្សាហកម្មបៃតងកម្ពុជា ឆ្នាំ២០២១ ចំណែកនៅចុងឆ្នាំ ២០២២ នេះ ក្រសួង​នឹងលើកយក​គម្រោង​ថ្មីៗ​បន្តទៀត ដើម្បីការប្រកួតប្រជែងឧស្សាហកម្មបៃតង សម្រាប់ឧស្សាហកម្ម រោងចក្រ សហគ្រាស៕ អត្ថបទ៖ សុន រ៉ាឌី