ភ្នំពេញ៖ ថ្នាក់ដឹកនាំជាន់ខ្ពស់នៃក្រសួងការបរទេសកម្ពុជា និងក្រសួងការបរទេសប្រេស៊ីល បានជួបពិភាក្សាគ្នា ដើម្បីបើកស្ថានទូតរៀងៗខ្លួន ក្នុងទីក្រុងប្រេស៊ីលៀ និងនៅទីក្រុងភ្នំពេញ រួមទាំង ពង្រីកទំហំពាណិជ្ជកម្មជាមួយគ្នា ខណៈវិស័យមួយនេះ រវាងប្រទេសទាំងពីរ នៅមានកម្រិតនៅឡើយ ។

យោងតាមសេចក្តីប្រកាសព័ត៌មានស្តីពី លទ្ធផលទស្សនកិច្ចរបស់ឯកឧត្តម អ៊ុច បូររិទ្ធ រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ទៅបំពេញទស្សនកិច្ចនៅប្រទេសប្រេស៊ីល ចាប់ពីថ្ងៃទី២៩ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០២២ ដើម្បីធ្វើជាសហប្រធានជាមួយ ឯកឧត្តម Carlos Alberto Franco França រដ្ឋមន្ត្រី ការបរទេសប្រេស៊ីល ក្នុងកិច្ចពិគ្រោះយោបល់ទ្វេភាគី កម្ពុជា-ប្រេស៊ីល លើកទី១ ភាគីទាំងពីរ បានពិភាក្សាលើវិស័យជាច្រើន នៃកិច្ចសហប្រតិបត្តិការទ្វេភាគី រួមមានទំនាក់ទំនងការទូត ពាណិជ្ជកម្ម វិនិយោគ អប់រំ កីឡា ទេសចរណ៍ កសិកម្ម ការជួញដូរមនុស្ស ការដោះមីន និងបេសសកកម្មថែរក្សាសន្តិភាព ។

ភាគីទាំងពីរ បង្ហាញទស្សនៈសុទិដ្ឋិនិយមថា កម្ពុជា-ប្រេស៊ីល នៅមានវិស័យសក្តានុពលជាច្រើនទៀតដើម្បីស្វែងយល់ពីគ្នា និងទាញយកផលប្រយោជន៍ ក្នុងពេលដែលកំពុងបន្តកសាងទំនាក់ទំនងការទូតឱ្យកាន់តែរឹងមាំ និងពង្រឹងកិច្ចសហប្រតិបត្តិការលើគ្រប់វិស័យ ដែលអាចសម្រេចបាន ហើយភាគីទាំងពីរ បានពិភាក្សាផ្លាស់ប្តូយោបល់លើកិច្ចសហការ ក្នុងការបើកស្ថានទូតរៀងៗខ្លួន ទាំងនៅទីក្រុងប្រេស៊ីលៀ និងនៅភ្នំពេញ ក្នុងពេលអនាគតដ៏ឆាប់ខាងមុខ ។

ដោយសារទំហំពាណិជ្ជកម្មរវាងប្រទេសទាំងពីរ នៅមានកម្រិតនៅឡើយ ជាមួយគ្នានេះឯកឧត្តម អ៊ុច បូររិទ្ធ បានស្នើឱ្យមានវេទិកាធុរកិច្ច រៀបចំឡើងនៅក្នុងឱកាស នៃកិច្ចប្រជុំពិគ្រោះយោបល់ទ្វេភាគីលើកទី២ នៅទីក្រុងភ្នំពេញ ដើម្បីពង្រីកសកម្មភាពធុរកិច្ចរវាងប្រទេសទាំងពីរ ។

អំពីការដោះមីន និងបេសកកម្មថែរក្សាសន្តិភាព ឯកឧត្តម បានលើកទឹកចិត្តភាគីប្រេស៊ីលក្នុងកិច្ចសហប្រតិបត្តិការជាមួយអាស៊ាន និងផ្ដល់ការហ្វឹកហ្វឺន តាមរយៈមជ្ឈមណ្ឌលសកម្មភាពកម្ចាត់មីនក្នុងតំបន់អាស៊ាន (ARMAC) ដែលមានទីតាំងនៅទីក្រុងភ្នំពេញ។

ក្នុងជំនួបនោះភាគីប្រេស៊ីល បានប្រកាសផ្តល់អាហារូបករណ៍ចំនួន ៥កន្លែង ដល់សិស្សនិស្សិតកម្ពុជា ក្នុងមួយឆ្នាំៗ ចំពោះវិស័យកសិកម្ម ខណៈប្រទេសទាំងពីរបានសម្តែងការប្តេជ្ញាចិត្តក្នុងការពង្រឹងកិច្ចសហប្រតិបត្តិការលើវិស័យកសិកម្ម តាមរយៈការចែករំលែកបច្ចេកវិទ្យា ការបណ្ដុះបណ្ដាល និងការផ្លាស់ប្តូរទស្សនកិច្ច របស់មន្ត្រីជំនាញទៅវិញទៅមក ។

ជាមួយគ្នានេះ ឯកឧត្តម Carlos França បានសម្តែងការកោតសរសើរ ចំពោះកិច្ចខិតខំប្រឹងប្រែងរបស់កម្ពុជា ក្នុងការធ្វើជាម្ចាស់ផ្ទះ និងជាប្រធានដឹកនាំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធប្រកបដោយជោគជ័យ នៅក្នុងពេលដែលមានបញ្ហាប្រឈម ផ្នែកភូមិសាស្ត្រនយោបាយដ៏លំបាក និងបានវាយតម្លៃខ្ពស់ លើការគាំទ្ររបស់កម្ពុជាចំពោះប្រេស៊ីល ក្នុងភាពជាដៃគូសន្ទនាតាមវិស័យរបស់អាស៊ាន ៕ អត្ថបទ បាន សុខរិទ្ធិ