ភ្នំពេញ ៖ ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានអញ្ជើញ​បើក​សន្និសីទ​លើក​ទី៥ ស្តីពីជំងឺសើស្បែក នៃប្រទេសឥណ្ឌូចិន និងកិច្ចប្រជុំលើកទី៧ របស់សមាគមគ្រូពេទ្យសើស្បែកកម្ពុជា ក្រោម​ប្រធានបទ «សុខភាពស្បែក ក្រោយជំងឺកូវីដ-១៩» ដែល​ប្រ​ព្រឹត្ត​ទៅចាប់ពីថ្ងៃទី២ ដល់ថ្ងៃទី៣ ខែធ្នូ ឆ្នាំ២០២២។

​លោកវេជ្ជបណ្ឌិត ចាន់ វិចិត្រ ប្រធានសមាគមគ្រូពេទ្យសើស្បែកកម្ពុជា និងជាប្រធានរៀបចំកិច្ច​ប្រជុំ​លើក​ទី៥ ស្តីពីជំងឺសើស្បែកនៃបណ្តាប្រទេសឥណ្ឌូចិន រួមជាមួយនិងកិច្ចប្រជុំប្រចាំឆ្នាំលើកទី៧ របស់សមាគមគ្រូពេទ្យ​សើ​ស្បែកកម្ពុជាបានលើកឡើងថា សន្និសីទលើកទី៥ និងកិច្ចប្រជុំលើកទី៧នាពេលនេះ ប្រារព្ធឡើង​ក្នុង​គោល​បំណងចែករំលែកបទពិសោធន៍ជូនដល់សមាជិក សមាគមទាំងអស់ នៅក្នុងប្រទេសឥណ្ឌូចិន មានកម្ពុជា វៀតណាម ឡាវ និងផ្តល់ជូននូវចំណេះដឹង បទពិសោធន៍ថ្មីៗ ដែលបានមកពីវាគ្មិន ដែលបានអញ្ជើញ​មកពី​បណ្តា​ប្រទេសជាមិត្ត រួមមាន៖ សិង្ហបុរី ម៉ាឡេស៊ី ឥណ្ឌូនេស៊ី ថៃ វៀតណាម និងឡាវ។ ជាពិសេសកិច្ចប្រជុំនេះ បាននាំមកនូវការរួបរួមគ្នា សាមគ្គីគ្នា រវាងគ្រូពេទ្យដែលមានជំនាញប្រកបវិជ្ជាជីវៈផ្នែកជំងឺសើស្បែក។

​ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ថ្លែងក្នុងពិធីបើកសន្និសីទលើកទី៥ ស្ដីពីជំងឺសើស្បែក នៃប្រទេសឥណ្ឌូចិន និងកិច្ចប្រជុំលើកទី៧ របស់សមាគមគ្រូពេទ្យសើស្បែកកម្ពុជា ប្រារព្ធឡើងរយៈពេល០២ថ្ងៃ សូមអរគុណ និងកោតសរសើចំពោះគណៈកម្មការ រៀបចំកិច្ចប្រជុំនេះ ស្រប​ពេល​ដែល​ក្រសួងសុខាភិបាលបាននិងកំពុងយកចិត្តទុកដាក់ដល់សុខភាព ទូទៅរបស់ប្រជាពលរដ្ឋ (និយាយជារួម) និងសុខ​ភាពស្បែក (និយាយដោយឡែក)។ ដោយមានកិច្ចខិតខំប្រឹងប្រែងរបស់រាជរដ្ឋាភិបាល ក្រោម​ការ​ដឹក​នាំ​ដ៏​ឈ្លាស​វៃ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះ​រា​ជា​ណាចក្រកម្ពុជា យើងបានរួមគ្នាប្រយុទ្ធនឹងជំងឺកូវីដ-១៩ ពិសេសការចាក់វ៉ាក់សាំងកូវីដ-១៩ ជូនប្រជា​ពល​រដ្ឋ​ទូទាំង​ប្រទេស ទទួលបានជោគជ័យដែលជាលទ្ធផលនាំឲ្យយើងអាចជួបជុំគ្នា ក្នុងថ្ងៃនេះ។

ឯកឧត្តមសាស្ត្រាចារ្យ ម៉ម ប៊ុនហេង នៅសង្កេតឃើញថា ប្រជាពលរដ្ឋ​មួយចំនួន​កំពុងទទួលរងនូវ​ផល​ប៉ះ​ពាល់ ពីការប្រើប្រាស់​ផលិតផលថែរក្សាស្បែក និងឱសថព្យាបាលស្បែក ដែលផ្សព្វផ្សាយតាមបណ្ដាញសង្គម និង​លក់​តាមទីផ្សារ ដែលគ្មានការ​ត្រួតពិនិត្យពីអ្នកជំនាញសុខាភិបាល និងមានប្រជាពលរដ្ឋ មួយចំនួនទៀតនិយម​ទទួល​សេវាថែទាំព្យាបាលជំងឺស្បែក ដោយពុំបានពិគ្រោះយោបល់ជាមួយគ្រូពេទ្យជំនាញ។ ដូច្នេះការរៀប​ចំ​សន្និ​សីទ​លើកទី៥ ស្តីពីជំងឺសើស្បែកនៃប្រទេសឥណ្ឌូចិន និងកិច្ចប្រជុំលើកទី៧ របស់សមាគម​គ្រូពេទ្យ​សើ​ស្បែក​កម្ពុជា គឺជាការរួមចំណែកដល់វិស័យសុខាភិបាលកម្ពុជា ដើម្បីបណ្តុះបណ្តាលបន្តជូនដល់វេជ្ជបណ្ឌិត គ្រូពេទ្យ ក្មួយៗនិស្សិត នូវចំនេះដឹង និងបទពិសោធន៍ថ្មីៗ តាមរយៈបទបង្ហាញរបស់វាគ្មិនជាតិ-អន្តរជាតិ មកពីបណ្តា​ប្រទេស​ជាមិត្ត ដូចជាសិង្ហបុរី ឥណ្ឌូនេស៊ី ម៉ាឡេស៊ី ព្រះរាជាណាចក្រថៃ វៀតណាម និងឡាវ។

ឯកឧត្តម រដ្ឋមន្រី្ត សង្ឃឹមយ៉ាងមុតមាំថា តាមរយៈកិច្ចប្រជុំ២ថ្ងៃនេះ លោក លោកស្រី វេជ្ជបណ្ឌិត ទាំងអស់ នឹង​ទទួលបាននូវចំនេះដឹង បទពិសោធន៍ យកទៅអនុវត្តក្នុងការពិនិត្យ និងព្យាបាល ជំងឺជូនប្រជា​ពល​រដ្ឋឲ្យ​មាន​ប្រសិ​ទ្ធភាព និងទទួលបានការជឿ​ទុកចិត្តពី​ប្រជាពលរដ្ឋដោយប្រកាន់ ខ្ជាប់នូវក្រមសីលធម៌វិជ្ជាជីវៈគ្រូពេទ្យ៕ រូបភាព ៖ អត្ថបទ រដ្ឋា