ភ្នំពេញ៖ សមាជិកសហភាពសហព័ន្ធយុវជនកម្ពុជា ២៥រាជធានី-ខេត្តនៅថ្ងៃទី៣ ខែធ្នូ ឆ្នាំ២០២២ បានជួបជុំប្រមូលផ្ដុំគ្នារៀបចំពិធីអបអរសាទរគម្រប់ខួប ៤៤ឆ្នាំរបស់ខ្លួននៅទីតាំងវិមានឈ្នះឈ្នះ។ ការជួបជុំនេះជាព្រឹត្តិការណ៍ដ៏ធំប្រចាំឆ្នាំមួយ ដោយមានថ្នាក់ដឹកនាំ និងសមាជិក ស.ស.យ.ក. រាប់ពាន់នាក់ចូលរួម។
សហភាពសហព័ន្ធយុវជនកម្ពុជាហៅកាត់ ស.ស.យ.ក. បានរៀបចំកម្មវិធីអបអរសាទរគម្រប់ខួប ៤៤ឆ្នាំរបស់ខ្លួនក្នុងគោលបំណងរំលឹកដល់គុណ និងស្មារតីពលីកម្មរបស់យុវជនជារៀមច្បង ដែលជាស្ថាបនិកបង្កើតរណសិរ្សសាមគ្គីសង្គ្រោះជាតិកម្ពុជានាថ្ងៃទី០២ ខែធ្នូ ឆ្នាំ១៩៧៨ និងការរៀនសូត្រពីគំរូវីរភាពនៃការដឹកនាំចលនាយុវជនក្នុង «ស្មារតី២ធ្នូស្ថិតស្ថេរជាអមតៈ» រហូតដល់ដំណាក់កាលបន្តវេនប្រែក្លាយជាសហភាពសហព័ន្ធយុវជនកម្ពុជា ព្រមទាំងការចូលរួមរបស់យុវជនដើម្បីសម្រេចបានសមិទ្ធផលក្នុងបុព្វហេតុជាតិ និងមាតុភូមិ។
ក្នុងពិធីនេះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជាក៏បានលើកឡើងដែរថា ស.ស.យ.ក. កន្លងមកបានបំពេញការងារជាច្រើន ទាំងក្នុងវិស័យអប់រំ ការជួយសង្គ្រោះប្រជាពលរដ្ឋ វិស័យវប្បធម៌ សកម្មភាពសប្បុរសធម៌ ការងារសង្គម ការចូលរួមទប់ស្កាត់ការរីករាលដាលជំងឺកូវីដ និងកិច្ចការជាច្រើនផ្សេងទៀត។ ក្រៅពីសកម្មភាពទាំងអស់នេះ ស.ស.យ.ក. ប្ដេជ្ញាការពារទឹកដី បន្តថែរក្សាសុខសន្តិភាព បន្តជំរុញកម្ពុជាឱ្យកាន់តែមានការអភិវឌ្ឍ។ ឯកឧត្ដមក៏បានរម្លឹកផងដែរថា យុវជនគ្រប់រូបមិនត្រូវភ្លេចអតីតកាលនោះទេ។ អតីតកាលជាមេរៀន ជាកម្លាំងដែលយុវជនត្រូវប្រឹងប្រែងដើម្បីអនាគត។ កម្ពុជាគឺត្រូវការគ្រប់គ្នាទាំងអស់។
សមាជិក ស.ស.យ.ក ដែលបានចូលរួមក្នុងព្រឹត្តិការណ៍នេះក៏បង្ហាញភាពរីករាយ និងមើលឃើញពីសាមគ្គីភាពរបស់យុវជនផងដែរ។ ពួកគាត់លើកឡើងថា សាមគ្គីភាពជាគ្រឹះសំខាន់ក្នុងការសម្រេចការងារគ្រប់យ៉ាង។ កម្មវិធីរម្លឹកដឹងគុណ និងអបអរសាទរគម្រប់ខួប ៤៤ឆ្នាំនៃសហភាពសហព័ន្ធយុវជនកម្ពុជានេះ ក៏មានការតាំងបង្ហាញនូវពិព័រណ៍សមិទ្ធផលនៃសហភាពសហព័ន្ធយុវជនកម្ពុជារាជធានី-ខេត្ត ការទស្សនា សារមនី្ទរវិមានឈ្នះ ឈ្នះ រួមជាមួយនឹងស្តង់ម្ហូបអាហារដែលរៀបចំពេញមួយរសៀល ព្រមទាំងការប្រគំតន្ត្រីដោយមានការចូលរួមពីសិល្បករល្បីៗប្រចាំកម្ពុជាថែមទៀតផង៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
