ភ្នំពេញ៖ នៅថ្ងៃទី៣ ខែធ្នូ ឆ្នាំ២០២២ សមាគម ID Investors Association និងក្រុមហ៊ុន ID Capital ដោយមានកិច្ចសហការ និងការគាំទ្រពីអគ្គកុងស៊ុលកិត្តិយសកម្ពុជា, សហគ្រិនខ្មែរ និង AmCham Cambodia បានរៀបចំសិក្ខាសាលាក្រោមប្រធានបទ «ការនាំចេញផលិតផលចំណីអាហារទៅកាន់ទីផ្សារសហរដ្ឋអាមេរិក» នៅរាជធានីភ្នំពេញ។
នៅក្នុងសិក្ខាសាលានេះលោក ហោ សេរីវឌ្ឍន៍ ប្រធានសមាគមវិនិយោគិននវានុវត្តន៍ និងអភិវឌ្ឍន៍ និងជាប្រធានក្រុមប្រឹក្សាភិបាលនៃក្រុមហ៊ុន ID Capital PLC បានថ្លែងឱ្យដឹងថា គោលបំណងនៃសិក្ខាសាលានេះរៀបចំឡើង ដើម្បីផ្តល់នូវទិដ្ឋភាពសង្ខេបអំពីទីផ្សារសហរដ្ឋអាមេរិក និងតម្រូវការមូលដ្ឋាន សម្រាប់ការនាំចេញផលិតផលចំណីអាហារពីកម្ពុជាទៅកាន់ទីផ្សារសហរដ្ឋអាមេរិក។ លោកបន្តថា គោលបំណងសំខាន់បន្ថែមទៀតនោះ គឺដើម្បីផ្តល់ឱកាសរវាងអ្នកបញ្ជាទិញ និងឈ្មួញកណ្តាលមកពីសហរដ្ឋអាមេរិក បានជួបនិងបង្កើតនូវទំនាក់ទំនងជាមួយតួអង្គសំខាន់ៗមកពីស្ថាប័នរដ្ឋ និងឯកជន ដែលជាប្រតិបត្តិករក្នុងវិស័យចំណីអាហារ និងកសិកម្មនៅកម្ពុជា។ អ្នកស្រី សុវណ្ណ ពិសី នាយិកាក្រុមហ៊ុនខ្មែរអូហ្គានិក (Khmer Organic) ដែលបានចូលរួមក្នុងសិក្ខាសាលានេះបានបង្ហាញក្តីសង្ឃឹមថា នឹងអាចពង្រីកទីផ្សារនាំចេញបន្ថែមទៀតទៅកាន់ទីផ្សារអាម៉េរិក ខណៈដែលបច្ចុប្បន្នផលិតផលមួយចំនួនរបស់អ្នកស្រី បាននាំចេញទៅទីផ្សារក្រៅស្រុកមួយចំនួនហើយ ដូចជានៅចិន និងអឺរ៉ុបជាដើម។
សិក្ខាសាលា «ការនាំចេញផលិតផលចំណីអាហារទៅកាន់ទីផ្សារសហរដ្ឋអាមេរិក» ប្រព្រឹត្តទៅរយៈពេលមួយថ្ងៃពេញ ដោយមានការអញ្ជើញចូលរួមផ្តល់ជាសុន្ទរកថា និងអនុសាសន៍ណែនាំមួយចំនួនរបស់មន្ត្រីជាន់ខ្ពស់នៃរាជរដ្ឋាភិបាលកម្ពុជា និងការធ្វើបទបង្ហាញស្តីអំពីបែបបទ និងតម្រូវការមូលដ្ឋានសម្រាប់ភាពអនុលោមតាមរបស់រដ្ឋបាលចំណីអាហារ និងឱសថ (FDA) ក្រសួងកសិកម្មអាម៉េរិក (USDA) គយ និងកិច្ចការការពារព្រំដែនអាម៉េរិក (US Customs) ដែលក្នុងនោះរួមមានជាអាទិ៍ ស្តង់ដារគុណភាព ការវេចខ្ចប់ ការដឹកជញ្ជូន ការរក្សាទុក ការដាក់តាំងបង្ហាញផលិតផលនៅតាមផ្សារទំនើបជាដើម។ សិក្ខាសាលានេះក៏បានបញ្ចូលនូវកិច្ចពិភាក្សាជាក្រុម និងកម្មវិធីសំណួរ-ចម្លើយ ក៏ដូចជាការពិព័រណ៍បង្ហាញផលិតផលរបស់សិក្ខាកាមចូលរួម និងការផ្ញើផលិតផលទាំងនោះទៅអ្នកបញ្ជាទិញនៅសហរដ្ឋអាមេរិកផងដែរ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
