កំពង់ឆ្នាំង៖ នាព្រឹកថ្ងៃទី០៥ ខែធ្នូ ឆ្នាំ ២០២២ ឯកឧត្តម ស៊ុន សុវណ្ណារិទ្ធិ អភិបាល​ខេត្តកំពង់ឆ្នាំង បានអញ្ជើញចូលរួមបើកវិញ្ញាសាប្រឡងសញ្ញាបត្រមធ្យមទុតិយភូមិ នៅវិទ្យាល័យ​ក្រុង​ព្រះបាទសុរាម្រឹត ដោយមានការអញ្ជើញចូលរួមពីថ្នាក់ដឹកនាំខេត្ត ឯកឧត្តម​រដ្ឋលេខាធិការ​ក្រសួងអប់រំ អង្គភាពប្រឆាំងអំពើពុករលួយ ស្នងការនគរបាលខេត្ត ប្រធានមន្ទីរអប់រំយុវជន និង​បេក្ខជន​ប្រឡងផងដែរ។

នាឱកាសនោះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បាន​ផ្ដាំផ្ញើ​ដល់​បេក្ខជន​ប្រឡង​ទាំង​អស់ ត្រូវយកចិត្តទុកដាក់ប្រមូលនូវចំណេះដឹងដែលខ្លួនមាន ដើម្បី​ប្រឡង​យក​សញ្ញាបត្រ​នេះ​ទៅ​ប​ន្តការរៀនសូត្រនៅថ្នាក់ឧត្តមសិក្សាជាបន្តទៀត។ កាល​ណាប្អូនៗ​មាន​ចំណេះ​ជំនាញ​ពិត​ប្រាកដ ប្អូនៗអាចយកទៅប្រើការក្នុងការងារចិញ្ចឹមជីវិតប្រចាំគ្រួសារ និងសង្គមជាតិ ក្រោម​ម្លប់​សន្តិភាព​ដែលដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី នៃ​ព្រះរាជា​ណា​ចក្រ​កម្ពុជា​។

ឯកឧត្តមអភិបាលខេត្ត បានបន្តថា សូមបេក្ខជនទាំងអស់ កុំលួចចម្លងគ្នា និង​សុំ​កុំ​លួច​ដាក់​ប្រ៊ីយ៉ុង​តាម​ខ្លួន ព្រោះករណីនេះ ប្រសិនបើគណៈកម្មការរៀបចំការប្រឡង ពិសេស​អង្គភាព​ប្រឆាំង​អំពើ​ពុករលួយចាប់បាន នឹងត្រូវធ្លាក់ដោយស្វ័យប្រវត្តិ។ ជាមួយ​នេះ​ដែ​រ​សូម​រក្សា​សណ្ដាប់​ធ្នាប់​របៀបរៀបរយ និងគោរពវិន័យឱ្យបានល្អក្នុងពេលប្រឡង និងចូលរួម​ទាំង​អស់​គ្នា​ក្នុង​ការ​អនុវត្ត​វិធាន​ការ​របស់ក្រសួងសុខាភិបាល គឺ៣កុំ និង៣ការពារ ដើម្បីចូលរួមទប់ស្កាត់ជំងឺកូវីដ-១៩ ទាំង​អស់​គ្នា។

ដោយឡែកលោក ស៊ឹម ប្រឹម ប្រធានមន្ទីរអប់រំ យុវជន និងកីឡាខេត្តកំពង់ឆ្នាំងបានឱ្យដឹងថា សម្រាប់​​សម័យប្រឡងសញ្ញាប័ត្រទុតិយភូមិ ឆ្នាំសិក្សា២០២១ និង២០២២នេះ ខេត្តកំពង់ឆ្នាំង មាន​បេក្ខជន​ប្រឡងចំនួន៤៣៦០នាក់ ស្រី២៣៩៨នាក់ ដោយបានចែកចេញជា ៨មណ្ឌល រួម​មាន​ថ្នាក់​វិទ្យាសាស្ត្រ ២មណ្ឌល និង​ថ្នាក់វិទ្យាសាស្ត្រសង្គម ៦មណ្ឌល ក្នុង​ចំណោម​៨​មណ្ឌល​ប្រឡង​នោះ ត្រូវបានចែកចេញជា ១៧៦បន្ទប់ផងដែរ។

សូមបញ្ជាក់ថា សម្រាប់​ការ​ត្រួតពិ​និត្យ​វិញ្ញាសា​ប្រលង​សញ្ញាប័ត្រមធ្យមសិក្សាទុតិយភូមិ​នៅ​ខេត្តកំពង់ឆ្នាំង​ឆ្នាំនេះ គឺបានដំណើរការទៅតាមកម្មវិធីដែលគ្រោងទុក ព្រមទាំងមាន​គណៈកម្មការ​ប្រលងថ្នាក់ជាតិ ថ្នាក់ខេត្ត ចូលរួមត្រួតពិនិត្យ​វិញ្ញាសា​ប្រកដ​ដោយ​ការ​យក​ចិត្ត​ទុក​ដាក់ និងសុវត្ថិភាព ដោយមានការចូលរួមចុះហត្ថលេខា ទទួល​ស្គាល់​ពី​បេក្ខជ​ន​ជា​ច្រើន​រូបផងដែរ៕ អត្ថបទ៖ ហុង វាស្នា