មីយ៉ាន់ម៉ា៖ កាលពីថ្ងៃអាទិត្យម្សិលមិញ របបសឹកយោធាបានជំរុញឲ្យក្រុមមេដឹកនាំអាស៊ាន ផ្តល់កៅអីនៅកិច្ចប្រជុំស្ដីពីវិបត្តិនាសប្ដាហ៍នេះ និងមិនត្រូវមិនទទួលស្គាល់របបយោធា ដែលបានរឹបអូសអំណាចដោយការធ្វើរដ្ឋប្រហារ កាលពីខែកុម្ភៈកន្លងទៅនោះឡើយ។
មេដឹកនាំរបបយោធាសហភាពមីយ៉ាន់ម៉ា លោក មីន អ៊ុងលាំង ត្រូវបានគេរំពឹងថា នឹងចូលរួមកិច្ចប្រជុំកំពូលពិសេសរបស់សមាគមជាតិអាស៊ី-អាគ្នេយ៍ (អាស៊ាន) នៅថ្ងៃសៅរ៍ខាងមុខនេះនៅទីក្រុងហ្សាកាតា ប្រទេសឥណ្ឌូនេស៊ី ដែលជាដំណើរបំពេញទស្សនកិច្ចនៅបរទេសផ្លូវការលើកដំបូងរបស់លោក ចាប់តាំងពីការផ្តួលរំលំរដ្ឋាភិបាលស៊ីវិលរបស់លោកស្រី អ៊ុងសាន ស៊ូជី។ យោងតាមការអះអាងរបស់ក្រុមតាមដានក្នុងស្រុកបានឲ្យដឹងថា កងទ័ពបានចាត់វិធានការបំបែកបាតុកម្មទ្រង់ទ្រាយធំ ដែលប្រឆាំងនឹងការគ្រប់គ្រងអំណាចរបស់ពួកគេ ដោយបានសម្លាប់មនុស្សយ៉ាងហោច ៧៣០នាក់។ ទោះបីជាយ៉ាងណាក៏ដោយការអញ្ជើញលោក មីន អ៊ុងលាំង ឲ្យចូលរួមកិច្ចប្រជុំអាស៊ានបានបញ្ឆាបកំហឹង ពីក្រុមសកម្មជនដែលបានជំរុញឲ្យក្រុមមេដឹកនាំបរទេស មិនត្រូវទទួលស្គាល់ជាផ្លូវការរបបសឹកយោធាសហភាពមីយ៉ាន់ម៉ា។
លោក ម៉ូ ច អ៊ូ អនុរដ្ឋមន្ត្រីទទួលបន្ទុកកិច្ចការបរទេស របស់រដ្ឋាភិបាលរួបរួមជាតិដែលបានបង្កើតឡើងកាលពីថ្ងៃសុក្រ ដោយក្រុមតំណាងរាស្ត្រត្រូវគេទម្លាក់អំណាច ភាគច្រើនមកពីគណបក្សរបស់លោកស្រី អ៊ុងសាន ស៊ូជី បាននិយាយថា អាស៊ានមិនត្រូវគាំទ្រពួកគេនោះទេ។ លោកបាននិយាយប្រាប់សំឡេងវិទ្យុអាមេរិក-ភូមាថា បើសិនជាអាស៊ានចង់ជួយដោះស្រាយស្ថានភាពសហភាពមីយ៉ាន់ម៉ា ពួកគេនឹងមិនអាចសម្រេចបានសមិទ្ធផលណាមួយ ដោយគ្មានការពិគ្រោះយោបល់ និងចរចាជាមួយរដ្ឋាភិបាលរួបរួមជាតិ ដែលគាំទ្រដោយប្រជាជន និងមានភាពស្របច្បាប់ពេញលេញរបស់ខ្លួននោះឡើយ៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
