​ប្រណាំង​រថយន្ត៖ ​កីឡាករ​ប្រណាំង F1 ហូ​ឡង់ Max Verstappen បាន​ស្គាល់​ជ័យជំនះ​លើកដំបូង​ក្នុង​អាជីព​នៅ​លើ​ទឹកដី​អ៊ីតាលី បន្ទាប់ពី​ប្រជែង​ឈ្នះ​ការប្រកួត Emilia Romagna Grand Prix ដែល​មាន​ភ្លៀង​ធ្លាក់​រំខាន​ខ្លាំង​។

​​ភ្លៀង​ធ្លាក់​ខ្លាំង​នៅ​ពេល​ចាប់ផ្ដើម​ការប្រកួត ហើយ​ក៏​មាន​កីឡាករ​ជាច្រើន​នាក់​ដែរ​ មិន​អាច​បញ្ចប់​ការ​ប្រកួត​បាន​។ ​Max Verstappen បាន​ចាប់ផ្តើម​ការប្រកួត​ឡើងវិញ ​បន្ទាប់ពី​មាន​ទង់​ក្រហម​នោះ​ប្រជែង​នាំមុខ​លើ Lewis Hamilton ដើម្បី​នាំមុខ​តាំង​ពី​ដើម​រហូតដល់​ចប់​ការប្រកួត​។ ​ជើងឯក​ពិភពលោក ៧សម័យ Lewis Hamilton ក៏បាន​រអិល​រថយន្ត​របស់​ខ្លួន​ចេញពី​ទីលាន​ដែរ តែ​បាន​ត្រលប់​មកវិញ​រហូត​ប្រជែង​បាន​ចំណាត់ថ្នាក់​លេខ២ ក្នុង​ការ​ប្រកួត​នេះ​។ ​លេខ​៣ បាន​ទៅ​កីឡាករ Lando Norris របស់​ក្រុម McLaren ខណៈ​កីឡាករ Ferrari ទាំងពីរ​នាក់ Charles LeClerc លេខ៤ និង Carlos Sainz Jr. លេខ៥​។

​​មានការ​ប៉ះទង្គិច​គ្នា​ខ្លាំង​រវាង George Russell និង Valtteri Bottas ផង​ដែរ ​ខណៈ​អ្នក​ទាំងពីរ​កំពុង​ប្រជែង​តំណែង​គ្នា​ដើម្បី​កៅអី​នៅ​ក្រុម Mercedes ឆ្នាំ​ក្រោយ​។ ​ក្រោយ​ការប្រកួត​បាន​ពីរ​ទីលាន​រដូវ​កាល​នេះ Lewis Hamilton បន្ត​នាំ​មុខ​គេ​ក្នុង​តារាង​ពិន្ទុ​ជើងឯក​ពិភពលោក​មាន ៤៣​ពិន្ទុ​តាម​ពីក្រោយ ១​ពិន្ទុ​ដោយ Max Verstappen ខណៈ​លេខ៣ Lando Norris មាន ២៧ពិន្ទុ និង​លេខ៤ Charles LeClerc មាន ២០ពិន្ទុ​។ ​ទីលាន​បន្ទាប់​នៅ​រយៈពេល ២​សប្ដាហ៍​ទៀត​នឹង​ធ្វើ​នៅ​ទឹកដី​ព័រទុយហ្កាល់​៕

​អត្ថបទ​៖​នាង សុភា​វុ​ធ