កំពង់ឆ្នាំង៖ យ៉ាងហោចណាស់មានបេក្ខជនចំនួន ៩៤នាក់​បាន​អវត្តមាន​មិន​បាន​ចូលរួម​ប្រឡង​សញ្ញា​ប័ត្រ​មធ្យមសិក្សាទុតិយភូមិ ឆ្នាំសិក្សា២០២១-២០២២ នេះបើយោងតាម​ការ​បញ្ជាក់​របស់​លោក ស៊ឹម ប្រឹម ប្រធានមន្ទីរអប់រំយុវជន និងកីឡា ខេត្តកំពង់ឆ្នាំង នៅវេលា​ម៉ោង​១១ និង​១៥នាទី ថ្ងៃទី០៥ ខែធ្នូ ឆ្នាំ២០២២នេះ។ ចំណែកសន្តិសុខសណ្តាប់ធ្នាប់ជុំវិញមណ្ឌលប្រឡង និងក្នុងមណ្ឌលប្រឡង មានសភាពស្ងប់ស្ងាត់ល្អ មិនមានអ្វីចោទជាបញ្ហានោះឡើយ។

លោកបានបន្តថា ចាប់ពីម៉ោង៦ព្រឹកដល់ម៉ោង១១ថ្ងៃត្រង់ ថ្ងៃទី០៥ ខែធ្នូ ឆ្នាំ២០២២នេះ បេក្ខជន​ប្រឡងសញ្ញាប័ត្រមធ្យមសិក្សាទុតិយភូមិចំនួន ៩៤នាក់ បាន​អវត្តមា​នដោយ​មិន​ដឹង​ពី​មូល​ហេតុ​នោះឡើយ ចំណែកបេក្ខជនប្រមាណជាង ៤២០០នាក់ទៀត បាន និង​កំពុង​ប្រឡង​ទៅ​តាម​សមត្ថភាពរៀងខ្លួនយ៉ាងរលូន និងសុក្រឹតបំផុត ដោយមិនមាន​បេក្ខជ​ន​ណាម្នាក់​មាន​បញ្ហា​សុខភាព​អ្វីឡើយ។ ចំពោះសន្តិសុខសណ្តាប់ធ្នាប់នៅក្នុង និងក្រៅមណ្ឌលប្រឡងវិញ ក៏មាន​សភាព​ស្ងាត់​ជ្រងំ មិនមានផលរំខាន ឬមានបញ្ហាអ្វីឡើយ ដែលករណីនេះ ធ្វើអោយ​បេក្ខជន​ទាំង​អស់ បានបញ្ចេញនូវសមត្ថភាពរៀងៗខ្លួនក្នុងពេលប្រឡង ។ បើទោះបីស្ថានភាពជម្ងឺកូវីដ១៩ មិន​មានករណីឆ្លងនៅតាមសហគមន៍ក៏ដោយ ក៏គេឃើញបេក្ខជនទាំងអស់យកចិត្តទុកដាក់ ការ​ពារ​នូវ​សុខភាពរបស់ខ្លួនជាប់ជាប្រចាំ ដោយមានបេក្ខជនភាគច្រើនដែលមកប្រឡង បាន​ពាក់​ម៉ាស់​ផង​ដែរ។

សម្រាប់សម័យប្រឡងសញ្ញាប័ត្រទុតិយភូមិ ឆ្នាំសិក្សា២០២១ និង២០២២នេះ ខេត្តកំពង់ឆ្នាំង មាន​បេក្ខជនប្រឡងចំនួន៤៣៦០នាក់ ស្រី២៣៩៨នាក់ ដោយបានចែកចេញជា៨មណ្ឌល រួមមាន​ថ្នាក់វិទ្យាសាស្ត្រ២មណ្ឌល និងថ្នាក់វិទ្យាសាស្ត្រសង្គម៦មណ្ឌល ក្នុងចំណោម​៨​មណ្ឌល​ប្រឡង​នោះ ត្រូវបានចែកចេញជា១៧៦បន្ទប់ផងដែរ។ សម្រាប់ការត្រួត​ពិនិត្យ​វិញ្ញាសា​ប្រលង​ នៅ​ខេត្តកំពង់ឆ្នាំងឆ្នាំនេះ គឺបានដំណើរការទៅតាមកម្មវិធីដែលគ្រោងទុក ព្រមទាំង​មាន​គណៈកម្មការ​ប្រឡងថ្នាក់ជាតិ ថ្នាក់ខេត្ត ចូលរួមត្រួតពិនិត្យ​វិញ្ញាសា​ប្រកប​ដោយការ​យក​ចិត្ត​ទុក​ដាក់ និងសុវត្ថិភាព ដោយមានការចូលរួមចុះហត្ថលេខា ទទួល​ស្គាល់​ពី​បេក្ខជន​ជា​ច្រើន​រូប​ផង​ដែរ​៕ ហុង វាស្នា