ភ្នំពេញ៖ ឯកឧត្តមសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល ថ្លែងក្នុងឱកាសបើក​អង្គសិក្ខាសាលាផ្សព្វផ្សាយស្តីពី ដែនកំណត់ និងនិយាមវិជ្ជាជីវៈឆ្មប ថ្ងៃទី០៥ ខែធ្នូ ឆ្នាំ២០២២នេះ បានអៈអាងថា ឆ្មប ត្រូវមាំទាំ ទាំងបច្ចេកទេស ទាំងសីលធម៌ប្រកបវិជ្ជាជីវៈ។

ឯកឧត្តម សាស្រ្តាចារ្យ ធា គ្រុយ បានបន្តទៀតថា គណៈឆ្មបដើរតួនាទីសំខាន់ក្នុងការរៀបចំ និងដាក់ឲ្យអនុវត្តនូវសេចក្តីសម្រេចប្រកាសបទបញ្ញត្តិ និងច្បាប់នានា ដែលពាក់ព័ន្ធនិង​ការងារ​ឆ្មបដែលកំពុងប្រកបវិជ្ជាជីវៈទាំងអស់នៅក្នុងប្រទេសកម្ពុជា​ ទាំងឆ្មប ជនជាតិខ្មែរ និងបរទេស ទាំងសេវាសាធារណៈ ឯកជន អង្គការក្រៅរដ្ឋាភិបាល​ តាមរយៈព្រះរាជក្រឹត្យស្ដីពី ការបង្កើត​គណៈឆ្មបកម្ពុជា ដើម្បីធានាថាឆ្មប​ ត្រូវមានជំនាញគ្រប់គ្រាន់ ក្នុងការផ្តល់សេវាដែលមានគុណភាព​ជូនដល់ស្ត្រី មាតា និងទារក ក្នុងការចូលរួមចំណែកកាត់បន្ថយអត្រាមរណៈភាពមាតា ទារក និង​ឆ្លើយតបទៅនឹងយុទ្ធសាស្ត្រចំបងរបស់ក្រសួងសុខាភិបាល​ និងរាជរដ្ឋាភិបាលកម្ពុជា។ ការងាររបស់ឆ្មប មានគោលបំណងតែមួយគត់ គឺផ្តល់សេវាថែទាំ និងព្យាបាលផ្នែកសម្ភពជូន​ដល់​ស្ត្រី មាតា និងទារក ឆ្លងតាមយន្តការនៃការចុះបញ្ជីកា ​ផ្តល់​អាជ្ញាប័ណ្ណ និងបន្ត​អាជ្ញាប័ណ្ណ​ប្រកប​វិជ្ជាជីវៈដល់ឆ្មប ដែលចេញដោយគណៈវិជ្ជាជីវៈ។ ដូច្នេះឆ្មបទាំងអស់តម្រូវ​ ឲ្យមានអាជ្ញាប័ណ្ណ ដែលមានសុពលភាព ដើម្បីទទួលបានសិទ្ធិស្របច្បាប់ក្នុងការផ្តល់សេវាថែទាំ និងព្យាបាល ជូនដល់សាធារណៈជន។

បើតាមកញ្ញា ងួន សុភាព ប្រធានក្រុមប្រឹក្សាគណៈឆ្មបជាតិ បានឲ្យដឹងថា គណៈឆ្មបកម្ពុជា គឺជា​អង្គការស្វយ័តមួយដែលផ្តល់សិទិ្ធអនុវត្តច្បាប់ ​តាមរយៈព្រះរាជក្រឹត្យស្តីពីការបង្កើតគណៈឆ្មប កម្ពុជា ​ឆ្នាំ២០០៦ និងច្បាប់ស្តីពីការគ្រប់គ្រងអ្នកប្រកបវិជ្ជាជីវៈវិស័យសុខាភិបាល​ ឆ្នាំ២០១៦ បង្កើត​ដើម្បីថែរក្សា និង លើកកម្ពស់ការអនុវត្តច្បាប់​ ដែនកំណត់ និងនិយាមវិជ្ជាជីវៈឆ្មបនៅក្នុង​ព្រះរាជាណាចក្រ​កម្ពុជា។ ព្រះរាជក្រឹត្យនេះផ្ដល់ សិទ្ធិផ្នែកច្បាប់ឱ្យ គណៈឆ្មបកម្ពុជា ក្នុងការគ្រប់គ្រងការប្រកបវិជ្ជាជីវៈឆ្មបនៅកម្ពុជា សំដៅការពារសុខភាព សុវត្ថិភាព និង សុខុមាល​ភាព​របស់អតិថិជន។ ដើម្បីបំពេញលក្ខខណ្ឌតម្រូវនៃច្បាប់ គណៈឆ្មបកម្ពុជា បានរៀបចំ​បង្កើត​ឯកសារគតិយុត្តិ នានា ដូចជា៖ ក្រមសីលធម៌ ក្របខណ្ឌសមត្ថភាពស្នូលសម្រាប់វិជ្ជាជីវៈឆ្មប ក្របខណ្ឌនិយតកម្មនៃការអភិវឌ្ឍវិជ្ជាជីវៈបន្ត​ របស់ឆ្មប។ ​ជាពិសេសថ្ងៃនេះគណៈឆ្មប និង​ក្រុមការងារបានបញ្ចប់ដោយជោគជ័យនូវដែនកំណត់ និងនិយាមសម្រាប់ការប្រកប​វិជ្ជា​ជីវៈឆ្មប​នៅកម្ពុជា ​ដែលជាឯកសារនិយ័តកម្មជាសារវ័ន្តបន្ថែមមួយទៀត សម្រាប់ឆ្មប​ក្នុងផ្តល់​សេវា​ដោយមានគុណភាព សុវត្ថិភាព ​និងប្រសិទ្ធភាពខ្ពស់៕ អត្ថបទ រដ្ឋា