​​អេស្ប៉ាញ៖ យោងតាម​ប្រព័ន្ធ​ផ្សព្វផ្សាយ La Sexta បាន​រាយការណ៍​ថា កញ្ចប់​បង្កប់​គ្រឿងផ្ទុះ​ចំនួន ​៦ ដែល​ត្រូវបាន​ផ្ញើរទៅកាន់​គោលដៅ​ផ្សេងៗ​គ្នា​នៅ​ទូទាំងប្រទេស​អេ​ស្ប៉ា​ញ​កាលពី​សប្តាហ៍​មុន ទំនងជា​ការងារ​រប​ស់​បុគ្គល​តែ​ម្នាក់​ក្នុងប្រទេស ដោយបាន​លើកឡើងថា ​អាជ្ញាធរ​កំពុង​ស៊ើបអង្កេត​បញ្ហា​នេះ​។ ប៉ុន្តែ​នគរបាល​បាន​ច្រានចោល​ការជាប់​ពាក់ព័ន្ធ​នៃ​អង្គភាព​សេវាកម្ម​ចារកម្ម​រុស្ស៊ី​។​

​កាលពី​សប្តាហ៍​មុន កញ្ចប់​សំបុត្រ​បង្កប់​គ្រឿងផ្ទុះ​ត្រូវបាន​ផ្ញើរ​ទៅកាន់​ស្ថានទូត​អ៊ុយ​ក្រែ​ន និង​ស្ថានទូត​សហរដ្ឋ​អាមេរិក​នៅ​ទីក្រុង​ម៉ា​ឌ្រី​ដ ក្រសួងការពារជាតិ​អេ​ស្ប៉ា​ញ លំនៅឋាន​របស់​នាយក​រដ្ឋមន្ត្រី​អេ​ស្ប៉ា​ញលោក​ Pedro Sanchez មជ្ឈមណ្ឌល​ផ្កាយរណប​នៅ​មូលដ្ឋាន​ទ័ពអាកាស​ Torrejon de Ardoz និង​រោងចក្រ​ផលិត​អាវុធ Instalaza ក្នុង​ទីក្រុង Zaragoza។​ រុស្ស៊ី​បាន​បដិសេធ​ការជាប់​ពាក់ព័ន្ធ​ណាមួយ ហើយ​ស្ថានទូត​របស់​ទីក្រុង​មូ​ស្គូ​ក្នុងប្រទេស​អេស្បាញ​បាន​បញ្ជាក់ថា ខ្លួន​ថ្កោលទោស​រាល់​ការគំរាមកំហែង ឬ​អំពើ​ភេរវកម្ម​ណាមួយ ជាពិសេស​អ្នក​ទាំង​ឡាយ​ណា​ដែល​ប្រព្រឹត្ត​ប្រឆាំង​បេសកកម្ម​ការទូត៕

អត្ថបទ៖ ប៊ុនថន