​​បាល់ទាត់៖ ​ក្លិប​អង់គ្លេស Nottingham Forest បាន​ចុះហត្ថលេខា​នាំយក​ខ្សែបម្រើ​ប្រយុទ្ធ​ប្រេ​ស៊ី​ល Gustavo Scarpa ដោយ​គ្មាន​តម្លៃ​ផ្ទេរដែលជា​កីឡា​ករទី២៣ មកកាន់​ក្លិប​ឡើង​ថ្មី​មួយ​នេះ​។ កីឡាករ​វ័យ ២៨ឆ្នាំ​រូបនេះ​នឹង​ផ្លាស់​មកកាន់​ទឹកដី​អង់គ្លេស​លើ​កិច្ចសន្យា ៣ឆ្នាំកន្លះ​នៅ​ថ្ងៃទី១ ខែមករា​ខាងមុខ​បន្ទាប់ពី​ផុត​កិច្ចសន្យា​ជាមួយ​ក្លិប​ប្រេ​ស៊ី​ល Palmeiras​។

​​Gustavo Scarpa បាន​ស៊ុត​បញ្ចូល​ទី​សរុប ៣៧គ្រាប់​ក្នុងការ​បង្ហាញខ្លួន​សរុប​ឱ្យ​ក្លិប​ប្រេ​ស៊ី​ល ២១១លើក​ និង​ជា​សមាជិក​របស់ Palmeiras ដែល​ឈ្នះ​ពាន​លី​គ​កំពូល​ប្រេ​ស៊ី​ល​កាលពី​ខែ​មុន​។ ​​Scarpa នឹងចូលរួម​ជាមួយ Nottingham Forest ក្នុងការ​បោះជំរំ​ហ្វឹកហាត់​នៅ​ប្រទេស​ក្រិ​ក​សប្តាហ៍​ក្រោយ ដោយ​ក្រុម​របស់លោក Steve Cooper នឹងត្រូវ​ប្រកួត​មិត្តភាព​ជាមួយ​ក្លិប​ក្នុងស្រុក Olympiakos និង Atromitos​។ ​​Nottingham Forest នឹង​ជួប​ជាមួយ Blackburn Rovers ជុំ​ទី៣ ពានរង្វាន់ Carabao Cup នៅ​ថ្ងៃទី២១ ខែធ្នូ​នេះ មុនពេល​បន្ត​ការប្រកួត​ក្របខណ្ឌ English Premier League ឡើងវិញ​ដោយ​នឹងត្រូវ​ធ្វើដំណើរ​ទៅ​ទឹកដី Manchester United នៅ​ថ្ងៃទី២៧៕

​អត្ថបទ​៖​នាង សុភា​វុ​ធ