ភ្នំពេញ៖ នៅថ្ងៃទី ៥ ខែធ្នូ ឆ្នាំ២០២២នេះ លោកជំទាវកិត្តិសង្គហបណ្ឌិត ឃួន សុដារី អនុប្រធានកាកបាទក្រហមកម្ពុជា តំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញដឹកនាំគណៈប្រតិភូកាកបាទក្រហមកម្ពុជា ចូលរួមគោរពវិញ្ញាណក្ខន្ធ ឯកឧត្តម ជាំង ជឺមីន អតីតប្រធានាធិបតី នៃសាធារណរដ្ឋប្រជាមានិតចិន ដែលបានទទួលមរណភាពកាលពីថ្ងៃទី៣០ ខែវិច្ឆិកា ឆ្នាំ២០២២។ ពិធីគោរពវិញ្ញាណក្ខន្ធនេះ ប្រព្រឹត្តទៅនៅស្ថានទូតចិន ប្រចាំនៅកម្ពុជា។

ស្ថិតក្នុងសមានទុក្ខដ៏ក្រៀមក្រំនោះ លោកជំទាវកិត្តិសង្គហបណ្ឌិត ឃួន សុដារី បានប្រគល់ជូន ឯកឧត្តម Wang Wentian ឯកអគ្គរដ្ឋទូត នៃសាធារណរដ្ឋប្រជាមានិតចិន នូវសារលិខិតរំលែក​មរណទុក្ខ​របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ដែលក្នុងសារលិខិតនោះ សម្តេចកិត្តិព្រឹទ្ធបណ្ឌិត ​បានចាត់ទុកថា មរណភាពរបស់ឯកឧត្តមអតីតប្រធានាធិបតី គឺជា​ការបាត់បង់​ដ៏ធំធេងនូវរដ្ឋបុរសដ៏អស្ចារ្យ របស់មិត្តចិន ដែលបានលះបង់ពេលវេលាពេញមួយជីវិត លើកកម្ពស់ជីវភាពរស់នៅប្រកបដោយវិបុលភាពនៃប្រជាជន ​និងប្រទេសចិន។ ក្នុងអំឡុងពេលនៃការដឹកនាំរបស់ឯកឧត្តម ប្រទេសចិនទទួលការរីកលូតលាស់សេដ្ឋកិច្ចយ៉ាងលឿន បានទទួលអធិបតេយ្យភាពហុងកុងត្រឡប់មកវិញ បានទទួលសិទ្ធិធ្វើជាម្ចាស់ផ្ទះកីឡា​អូឡាំពិក​ឆ្នាំ២០០៨ នៅទីក្រុងប៉េកាំង និងបានក្លាយជាសមាជិកអង្គការពាណិជ្ជកម្មពិភពលោកជាផ្លូវការ។ ភាពជាអ្នកដឹកនាំដ៏ប៉ិនប្រសព្វរបស់ឯកឧត្តម អតីតប្រធានាធិបតី មិនត្រឹមតែផ្តល់​ជាគម្រូ​វីរភាពដល់ប្រជាជនចិន​ប៉ុណ្ណោះទេ ប៉ុន្តែថែមទាំងទទួលបាននូវការគោរពស្រឡាញ់ពីប្រជាជន​ក្នុង​បណ្តាប្រទេសនានា​ នៅលើសកលលោក រួមទាំងព្រះរាជាណាចក្រកម្ពុជាផងដែរ។

ឯកឧត្តម ជាំង ជឺមីន គឺជាមិត្តដ៏ល្អរបស់កម្ពុជាដែលបានមកទស្សនកិច្ចផ្លូវការនៅកម្ពុជា នា​ឆ្នាំ២០០០ និងបានផ្តល់សារៈសំខាន់ជាប្រវត្តិសាស្ត្រក្នុងការលើក​កម្ពស់ទំនាក់ទំនង និង​កិច្ចសហប្រតិបត្តិការកម្ពុជា-ចិន។

បន្ថែមពីនេះ ក្នុងសារលិខិតរបស់សម្តេចកិត្តិព្រឹទ្ធបណ្ឌិត ក៏បានបញ្ជាក់ផងដែរថា «កិត្យានុភាព​របស់​ឯកឧត្តម អតីតប្រធានាធិបតី ​នឹងត្រូវបានចងចាំ ​និងគោរពស្រឡាញ់ជារៀងរហូត»។

ថ្នាក់ដឹកនាំ មន្ត្រី បុគ្គលិក អ្នកស្ម័គ្រចិត្ត ​និងយុវជននៃកាកបាទក្រហមកម្ពុជា សូមឧទ្ទិសបួងសួង​ដល់​ដួងវិញ្ញាណក្ខន្ធ ឯកឧត្តម ជាំង ជឺមីន ​បានទៅកាន់សុគតិភព កុំបីឃ្លៀងឃ្លាតឡើយ៕